ຕອນເຊົ້າຂອງວັນທີ 3 ພຶດສະພາ 2024, ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດພິທີເຊັນບົດບັນທຶກການປະສານງານ ລະຫວ່າງ ຄະນະກໍາມະ ການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ ກັບ ອົງການກາແດງແຂວງອຸດົມໄຊ, ໂດຍການເປັນປະທານຂອງທ່ານ ນ. ຄໍາພອນ ພິມມະຈັນ ຮອງປະທານສະພາປະຊາຊົນແຂວງ, ມີທ່ານ ຄໍາມະນີ ໄຊດວງຕາ ປະທານຄະນະກຳມະການວັດທະນະທໍາ-ສັງຄົມ ແລະ ບັນດາເຜົ່າ, ທ່ານ ດຣ ນ. ສິດທິວອນ ຫົງສາຄອນ ຫົວໜ້າອົງການກາແດງແຂວງອຸດົມໄຊ, ມີບັນດາທ່ານໃນຄະນະປະຈໍາສະພາປະຊາຊົນແຂວງ, ຮອງຫົວໜ້າອົງການກາແດງ ແລະ ພະນັກງານຂະແໜງກ່ຽວຂ້ອງ 2 ພາກສວນເຂົ້າຮ່ວມ.

ໃນພິທີທ່ານ ຄໍາມະນີ ໄຊດວງຕາ ປະທານຄະນະກຳມະການວັດທະນະທໍາ-ສັງ ຄົມ ແລະ ບັນດາເຜົ່າ ໄດ້ຕາງໜ້າຄະນະຮັບຜິດຊອບຜ່ານຮ່າງບົດບັນທຶກ ວ່າດ້ວຍການປະສານງານລະຫວ່າງ ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ ກັບ ອົງການກາແດງ ແຂວງອຸດົມໄຊ, ເຊິ່ງບົດບັນທຶກດັ່ງກ່າວມີ 4 ໝວດ, 18 ມາດຕາ, ໄດ້ກໍານົດຈຸດປະສົງ, ການປະສານງານ, ຫລັກການປະສານງານ, ຂອບເຂດການນໍາໃຊ້, ເນື້ອ ໃນການປະສານງານ ແລະ ອື່ນໆ.

ຫຼັງຈາກນັ້ນຜູ້ເຂົ້າຮ່ວມພິທີໄດ້ປະກອບຄໍາຄິດຄໍາເຫັນໃສ່ຮ່າງບົດບັນທຶກເພີ່ມເຕີ່ມ ແລະ ໄດ້ເຊັນບົດບັນທຶກດັ່ງກ່າວຢ່າງເປັນທາງການ.

ໂອກາດດັ່ງກ່າວ, ຍັງໄດ້ຮັບຟັງການໂອ້ລົມຈາກປະທານພິທີ ແລະ ໄດ້ມີການມອບໂຊລາແຊວ(ໄຟຟ້າແສງຕາເວັນ) ຈໍານວນ 1 ຊຸດ ໃຫ້ອົງການກາແດງຕື່ມອີກ.

ພາບ/ຂ່າວ: ສະພາປະຊາຊົນແຂວງ.