ຕອນເຊົ້າຂອງວັນອັງຄານ, ວັນທີ 24 ພຶດສະພາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ, ໄດ້ຈັດພິທີເຊັນບົດບັນທຶກ​ຮ່ວມວ່າ​ດ້ວຍການ​ປະສານງານ​ລະ​ຫວ່າງຄະນະກໍາມະການເສດຖະກິດ, ແຜນການ ແລະ ການເງິນ ສພຂ  ກັບ 3 ພະແນກການຄື: ພະແນກພະລັງງານ ແລະ ບໍ່ແຮ່ແຂວງ, ພະແນກອຸດສາຫະກໍາ ແລະ ການຄ້າແຂວງ, ພະແນກກະສິກໍາ ແລະ ປ່າໄມ້ແຂວງ, ໂດຍການເປັນປະທານຂອງທ່ານ ຄໍາເຜີຍ ງອນວັນຄຳ ກຳມະການປະຈໍາພັກແຂວງ, ຮອງປະທານ ສພຂ, ມີທ່ານ ທອງໄຊ ທໍ່ຈົງເລ່ຍຈີ ປະທານຄະນະກໍາມະການເສດຖະກິດ, ແຜນການ ແລະ ການເງິນ ສພຂ, ​ທ່ານ ຄຳພອນ ມູນລະໄມ ຫົວໜ້າພະແນກກະສິກໍາ ແລະ ປ່າໄມ້ແຂວງ, ທ່ານ ສອນທະນູ ສິງດາລາ ຫົວໜ້າພະແນກອຸດສາຫະກໍາ ແລະ ການຄ້າແຂວງ, ຜູ້ຕາງໜ້າຈາກພະແນກພະລັງງານ ແລະ ບໍ່ແຮ່ແຂວງ, ບັນດາທ່ານຄະນະປະຈໍາສະພາປະຊາຊົນແຂວງ, ຫົວໜ້າ​-ຮອງ​ຫົວໜ້າ​ຂະແໜງກ່ຽວຂ້ອງຂອງ ເຂົ້າຮ່ວມ.

ຈຸດປະສົງຂອງການເຊັນບົດບັນທຶກ​ຮ່ວມຄັ້ງນີ້ແມ່ນເພື່ອຈັດຕັ້ງຜັນຂະຫຍາຍເນື້ອໃນຈິດໃຈ ຂອງກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ ຂໍ້ຕົກລົງຮ່ວມວ່າດ້ວຍການພົວພັນລະຫວ່າງ ສະພາປະຊາຊົນແຂວງ ແລະ ອົງການປົກຄອງແຂວງເປັນຕົ້ນ: ການສ້າງ ແລະ ປັບປຸງນິຕິກຳ, ການຄົ້ນຄວ້າບັນຫາສໍາຄັນຂອງທ້ອງຖິ່ນ, ການຄົ້ນຄວ້າປຶກສາຫາລືກ່ຽວກັບການແກ້ໄຂຄຳຮ້ອງທຸກ, ການເຂົ້າຮ່ວມຕິດຕາມກວດກາ ແລະ ເຂົ້າຮ່ວມຊີ້ແຈງ, ລາຍງານຕໍ່ກອງປະຊຸມ ສພຂ ຂອງຂົງເຂດເສດຖະກິດ ໃຫ້ມີປະສິດທິພາບ ແລະ ປະສິດທິຜົນ. ດັ່ງນັ້ນ, ຄະນະກໍາມະການເສດຖະກິດ, ແຜນການ ແລະ ການເງິນ ສພຂ ຈຶ່ງໄດ້ເອກະພາບກັນ ກັບ 3 ພະແນກການ, ເຮັດບົດບັນທຶກຮ່ວມວ່າດ້ວຍການປະສານງານຮ່ວມກັນ.

ບົດບັນທຶກຮ່ວມດັ່ງກ່າວປະກອບມີ 3 ໝວດ, 6 ມາດຕາ, ໄດ້ກໍານົດຫຼັກການ, ເນື້ອໃນ ແລະ ວິທີການປະສານງານລະຫວ່າງ ຄະນະກໍາມະການເສດຖະກິດ, ແຜນການ ແລະ ການເງິນ ສພຂ ກັບ 3 ພະແນກການ ເພື່ອຮັບປະກັນໃນການຄົ້ນຄວ້າປຶກສາຫາລື, ແລກປ່ຽນຂໍ້ມູນ, ສະໜອງຂໍ້ມູນ, ແນໃສ່ເຮັດໃຫ້ການຈັດຕັ້ງປະຕິບັດວຽກງານ ໃຫ້ສອດຄ່ອງກັບແນວທາງຂອງພັກ ແລະ ກົດໝາຍຂອງລັດ ໃນການຄຸ້ມຄອງ, ກວດກາ, ຊຸກຍູ້ສົ່ງເສີມ ແລະ ພັດທະນາວຽກງານຕ່າງໆ ໃຫ້ເຂັ້ມແຂງ, ໂປ່ງໄສ, ມີປະສິດທິຜົນສູງເພື່ອຮັບໃຊ້ໃຫ້ແກ່ການພັດທະນາເສດຖະກິດສັງຄົມພາຍໃນແຂວງ ໃຫ້ຂະຫຍາຍຕົວຢ່າງຕໍ່ເນື່ອງ, ຜູ້ເຂົ້າຮ່ວມພິທີໄດ້ປະກອບຄໍາຄິດຄໍາເຫັນໃສ່ບົດບັນທຶກຮ່ວມເພີ່ມເຕີ່ມບາງບາບັນຫາ ແລະ ຫຼັງຈາກນັ້ນໄດ້ລົງລາຍເຊັນຮ່ວມກັນຢ່າງເປັນທາງການ.

ປະທານພິທີໄດ້ມີຄໍາເຫັນໂອ້ລົມເຊິ່ງທ່ານໄດ້ເນັ້ນໜັກໃຫ້ເອົາໃຈໃສ່ໃນການປະສານງານວຽກງານຕ່າງໆ ໃຫ້ກົມ ກຽວກັນ, ວາງແຜນການເຄື່ອນໄຫວຮ່ວມກັນ, ຄົ້ນຄວ້າແກ້ໄຂບັນຫາທີ່ມີຄວາມຫຍຸ້ງຍາກ ເພື່ອເຮັດໃຫ້ໜ້າທີ່ວຽກງານຂອງແຕ່ລະຝ່າຍນັບມືນັບດີຂຶ້ນກວ່າເກົ່າ ແລະ ຫວັງຢ່າງຍິ່ງວ່າ ໃນຕໍ່ໜ້າພວກເຮົາຈະໄດ້ຮ່ວມໄມຮ່ວມມືກັນ, ພ້ອມກັນຈັດຕັ້ງປະບັດໜ້າວຽກ ຕາມພາລະບົດບາດຂອງຕົນໃຫ້ສຳເລັດຕາມຄາດໝາຍ.

 ພາບ-ຂ່າວ: ແສງພອນ ອິນນະລົງ.