ຕອນບ່າຍຂອງວັນຈັນວັນທີ 14 ພະຈິກ 2022 ຢູ່ທີ່ຫ້ອງປະຊຸມສະພາປະຊາຊົນແຂວງອຸດົມໄຊ, ໄດ້ຈັດພິທີເຊັນບົດບັນທຶກຮ່ວມການປະສານງານ ລະຫວ່າງ ຄະນະກໍາມະການຍຸຕິທຳ, ປ້ອງກັນຊາດ ແລະ ປ້ອງກັນຄວາມສະ ຫງົບ ສະພາປະຊາຊົນແຂວງ ກັບ 3 ອົງການ, ໂດຍການເປັນປະທານຂອງທ່ານ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ, ຮອງປະທານສະພາປະຊາຊົນແຂວງ, ມີທ່ານ ນ. ຈັນສະໝອນ ທິບພະຫົງ ກໍາມະການປະຈໍາພັກແຂວງ,ປະ ທານອົງການກວດກາລັດແຂວງ, ທ່ານ ທອງຄານ ວັດສະດາກອນ ປະທານຄະນະກໍາມະການຍຸຕິທຳ, ປ້ອງກັນຊາດ ແລະ ປ້ອງກັນຄວາມສະຫງົບ(ສພຂ), ມີບັນດາທ່ານຄະນະປະຈໍາສະພາປະຊາຊົນແຂວງ, ສະມາຊິກສະພາປະຊາຊົນແຂວງ, ຜູ້ຕາງໜ້າກອງບັນຊາການທະຫານແຂວງ, ສະຫະພັນນັກຮົບເກົ່າແຂວງ, ຫົວໜ້າຂະແໜງ ແລະ ວິຊາການຂະແໜງກ່ຽວຂ້ອງພາຍໃນສະພາປະຊາຊົນແຂວງເຂົ້າຮ່ວມ.
ຈຸດປະສົງຂອງການເຊັນບົດບັນທຶກໃນຄັ້ງນີ້ ແມ່ນເພື່ອເປັນການຈັດຕັ້ງຜັນຂະຫຍາຍຂໍ້ຕົກລົງຮ່ວມ ລະ ຫວ່າງ ສະພາປະຊາຊົນແຂວງ ກັບ ອົງການປົກຄອງແຂວງ ສະບັບເລກທີ 70/ອຊ, ລົງວັນທີ 04 ກຸມພາ 2022, ເພື່ອເຮັດໃຫ້ການປະສານງານ ແລະ ການສະໜອງຂໍ້ມູນເຊິ່ງກັນ ແລະ ກັນ ມີຄວາມສະດວກ, ວ່ອງໄວທັນກັບເວ ລາ. ໃນພິທີຄະນະຮັບຜິດຊອບໄດ້ຜ່ານບົດບັນທຶກຮ່ວມການປະສານງານ ລະຫວ່າງ ຄະນະກໍາມະການຍຸຕິທຳ, ປ້ອງກັນຊາດ ແລະ ປ້ອງກັນຄວາມສະຫງົບ ສະພາປະຊາຊົນແຂວງ ກັບ 3 ອົງການຄື: ອົງການກວດກາລັດແຂວງ, ກອງບັນຊາການທະຫານແຂວງ, ສະຫະພັນນັກຮົບເກົ່າແຂວງ, ເຊິ່ງເນື້ອໃນບົດບັນທຶກປະກອບມີ 3 ໝວດ, 7 ມາດຕາ,ໄດ້ກໍານົດຫຼັກການ, ຂັ້ນຕອນ, ເນື້ອໃນ ແລະ ກົນໄກການປະສານງານ ແນໃສ່ເຮັດໃຫ້ການປະຕິບັດພາລະບົດບາດ, ສິດ ແລະ ໜ້າທີ່ຂອງແຕ່ລະພາກສ່ວນໃຫ້ສອດຄ່ອງກັບແນວທາງພັກ ແລະ ຖືກຕ້ອງຕາມລະບຽບກົດໝາຍ.
ຕອນທ້າຍພິທີ ປະທານໄດ້ສະແດງຄວາມຊົມເຊີຍຕໍ່ຄະນະຮັບຜິຊອບຮ່າງບົດບັນທຶກ, ໃນການກະກຽມຮ່າງບົດບັນທຶກການປະສານງານດັ່ງກ່າວນີ້ ແລະ ສົ່ງໃຫ້ອົງການກ່ຽວຂ້ອງປະກອບຄໍາຄິດເຫັນໃສ່ເຮັດໃຫ້ບົດບັນທຶກດັ່ງກ່າວສົມບູນ ແລະ ໄດ້ຕົກລົງເຫັນດີເປັນເອກະພາບເຊັນບົດບັນທຶກນີ້ ແລະ ທານໄດ້ເນັ້ນໜັກໃຫ້ອົງການກ່ຽວຂ້ອງ ນໍາເອົາເນື້ອໃນບົດບັນທຶກໄປຈັດຕັ້ງເຊື່ອມຊຶມໃຫ້ແກ່ພະນັກງານ-ລັດຖະກອນ ແລະ ກໍາລັງ ພາຍໃນກົມກອງຂອງຕົນ ໃຫ້ຮັບຮູ້, ເຂົ້າໃຈ ແລະ ໃຫ້ເອົາໃຈໃສ່ໃນການຈັດຕັ້ງປະຕິບັດບົດບັນທຶກຮ່ວມດັ່ງກ່າວໃຫ້ປະກົດຜົນເປັນຈິງ. 
( ພາບ/ຂ່າວ: ແສງພອນ ອິິນນະລົງ).