ໃນວັນທີ 7 ກຸມພາ 2023 ຜ່ານມານີ້ ທີ່ຫ້ອງວ່າການແຂວງ ເຊກອງ, ທ່ານ ເຫລັກໄຫລ ສີວິໄລ ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ ພ້ອມດ້ວຍ ຄະນະນໍາຂັ້ນສູງຂອງແຂວງ-ຂອງສະພາ ໄດ້ຕ້ອນຮັບ ທ່ານ ຄໍາແພງ ວິລະພັນ ກໍາມະການຄະນະປະຈຳສະພາແຫ່ງຊາດ, ປະທານກຳມາທິການຍຸຕິທໍາ ສະພາແຫ່ງຊາດ ໃນໂອກາດມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງເຊກອງ.

         ທ່ານ ຄໍາແພງ ວິລະພັນ ໄດ້ລາຍງານໃຫ້ ທ່ານ ເຈົ້າ ແຂວງເຊກອງ ຮູ້ເຖິງຈຸດປະສົງໃນການລົງມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງເຊກອງ ໃນຄັ້ງນີ້ແມ່ນເພື່ອລົງມາຈັດກອງປະຊຸມສໍາມະນາວຽກງານການປະຕິບັດພາລະບົດບາດຂອງກໍາມາທິການສູນກາງ ແລະ ຄະນະກໍາມະການທ້ອງຖິ່ນ ໃນຂົງເຂດວຽກງານຍຸຕິທໍາໃຫ້ແກ່ 07 ແຂວງຄື: ແຂວງ ບໍລິຄໍາໄຊ, ຄໍາມ່ວນ, ສະຫວັນນະເຂດ, ຈໍາປາສັກ, ເຊກອງ, ອັດຕະປື ແລະ ສາລະວັນ ເຊິ່ງກອງປະຊຸມດັ່ງກ່າວຈະໄດ້ຈັດຂຶ້ນຢູ່ສະໂມສອນສະພາປະຊາຊົນແຂວງ ເຊກອງ ໂດຍຈະໃຊ້ເວລາຢູ່ 2 ວັນຄື: ວັນທີ 8-9 ກຸມພາ 2023 ນີ້, ທັງນີ້ກໍເພື່ອເປັນການພົບປະແລກປ່ຽນ, ຖອດຖອນບົດຮຽນເຊິ່ງກັນ ແລະ ກັນ ແລະ ທັງເປັນການສ້າງຄວາມຮັບຮູ້ເຂົ້າໃຈຢ່າງເລິກເຊິ່ງຕໍ່ພາລະບົດບາດ, ສິດ ແລະ ໜ້າທີ່ ແລະ ກົດໝາຍທີ່ເປັນບ່ອນອີງໃຫ້ແກ່ການປະຕິບັດວຽກງານ ຂອງບັນດາສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ພະນັກງານ-ລັດຖະກອນ ແລະ ສໍານັກງານອົງການ ຂົງເຂດຍຸຕິທໍາ ຂັ້ນສູນກາງ ແລະ ທ້ອງຖິ່ນ ໃຫ້ກວ້າງຂວາງຂຶ້ນກວ່າເກົ່າ.

         ໂອກາດນີ້, ທ່ານ ເຫລັກໄຫລ ສີວິໄລ ກໍໄດ້ສະແດງການຕ້ອນຮັບຢ່າງອົບອຸ່ນ ແລະ ພ້ອມທີ່ຈະໃຫ້ການຮ່ວມມືຕໍ່ ທ່ານ ຄໍາແພງ ວິລະພັນ ຕະຫລອດໄລຍະການມາເຄື່ອນໄຫວວຽກງານຢູ່ ແຂວງເຊກອງ ແລະ ເຈົ້າແຂວງເຊກອງ ຍັງໄດ້ອວຍພອນໄຊອັນປະເສີດໃຫ້ທ່ານ ປະທານກໍາມາທິການຍຸຕິທໍາ ສະພາແຫ່ງຊາດ ພ້ອມຄະນະ ຈົ່ງມີສຸຂະພາບແຂງແຮງ ມີພະລານາໄມທີ່ສົມບູນ, ມີແຕ່ຄວາມສຸກກາຍສະບາຍໃຈ, ປະສົບຜົນສໍາເລັດໃນໜ້າທີ່ວຽກງານທຸກປະການ ແລະ ສືບຕໍ່ນໍາພາ-ຊີ້ນໍາວຽກງານຍຸຕິທໍາຂັ້ນສູນກາງ ແລະ ທ້ອງຖິ່ນໃຫ້ມີຄວາມແຂງແຮງຍິ່ງໆຂຶ້ນ.

#ໂດຍ: ນັກຂ່າວ ສພຂ ເຊກອງ.