ຕອນເຊົ້າວັນທີ 17 ກຸມພາ 2022 ນີ້, ທີ່ຫ້ອງຮັບແຂກຫ້ອງວ່າການປົກຄອງ ແຂວງ ເຊກອງ ທ່ານ ເຫຼັກໄຫຼ ສີວິໄລ ເລຂາພັກແຂວງ, ເຈົ້າແຂວງ ເຊກອງ ໄດ້ໃຫ້ກຽດຕ້ອນຮັບ ທ່ານ ຄໍາສິງ ໄຊສົມແພງ ຮອງປະທານກໍາມາທິການວຽກງານສະມາຊິກສະພາແຫ່ງຊາດ (ສສຊ) ທັງແມ່ນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14 ແຂວງ ສາລະວັນ ພ້ອມດ້ວຍຄະນະ ເຂົ້າພົບປະຢ້ຽມຢາມ ເນື່ອງໃນໂອກາດທີ່ທ່ານ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງ ເຊກອງ ນັບແຕ່ວັນທີ 17-18 ກຸມພາ 2022 ນີ້.

         ໃນໂອກາດນີ້, ທ່ານ ເຫຼັກໄຫຼ ສີວິໄລ ໄດ້ສະແດງຄວາມຕ້ອນຮັບ ແລະ ແຈ້ງໃຫ້ຮູ້ກ່ຽວກັບສະພາບການຈັດຕັ້ງປະຕິບັດວຽກງານຢູ່ແຂວງ ເຊກອງ ໂດຍສະເພາະການພັດທະນາເສດຖະກິດ-ສັງຄົມຢູ່ແຂວງ ເຊກອງ ໃນໄລຍະຜ່ານມາເຫັນວ່າມີການຂະຫຍາຍຕົວຢ່າງຕໍ່ເນື່ອງ, ໃນນີ້ ສະເພາະວຽກງານສະພາປະຊາຊົນແຂວງ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ແມ່ນໄດ້ພ້ອມກັນເອົາໃຈໃສ່ປະຕິບັດ 03 ພາລະບົດບາດຂອງຕົນ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ຢ່າງແຂງແຮງ, ໄດ້ຍົກສູງຄວາມຮັບຜິດຊອບປະສານສົມທົບກັບອົງການປົກຄອງທ້ອງຖິ່ນ ແລະ ບັນດາຂະແໜງການທີ່ກ່ຽວຂ້ອງ ໃນການຄວ້າຄວ້າ ແລະ ແກ້ໄຂບັນຫາທີ່ສໍາຄັນໄດ້ທ່ວງທັນ, ສັງຄົມມີຄວາມສະຫງົບໂດຍພື້ນຖານ.

        ໃນຕອນທ້າຍ ທ່ານ ຄໍາສິງ ໄຊສົມແພງ ໄດ້ສະແດງຄວາມຂອບໃຈ ແລະ ນັບຖືຢ່າງສູງຕໍ່ ທ່ານ ເຈົ້າແຂວງ ເຊກອງ ທີ່ໃຫ້ການຕ້ອນຮັບການເຂົ້າພົບປະຢ້ຽມຢາມໃນຄັ້ງນີ້ ຢ່າງອົບອຸ່ນ, ເປັນກັນເອງ  ແລະ ອຳນວຍຄວາມສະດວກ ໃນໄລຍະການຢ້ຽມຢາມດັ່ງກ່າວ ພ້ອມທັງແຈ້ງຈຸດປະສົງການລົງເຄື່ອນໄຫວວຽກງານຄັ້ງນີ້ ເພື່ອຕິດຕາມກວດກາການຈັດ ຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍ ແລະ ການເຄື່ອນໄຫວວຽກງານອື່ນໆ ຂອງຄະນະ ສສຊ ປະຈໍາເຂດເລືອກຕັ້ງທີ 16 ແຂວງເຊກອງ; ພ້ອມນັ້ນ ກໍຈະໄດ້ເຮັດວຽກຮ່ວມກັບການນໍາຂອງ ແລະ ບັນດາຂະແໜງການກ່ຽວຂອງແຂວງ ເພື່ອປຶກສາລືວຽກງານຕ່າງໆ ໂດຍສະເພາະແມ່ນໂຄງປະກອບກົງຈັກການຈັດຕັ້ງບຸກຄະລາກອນ ເພື່ອຍົກສູງບາດບາດ ແລະ ເຮັດໃຫ້ການເຄື່ອນໄຫວວຽກງານໃນຖານະເປັນຕົວແທນຂອງປະຊາຊົນ ຂອງຄະນະ ສສຊ ປະຈໍາເຂດເລືອກຕັ້ງທີ 16  ແລະ ສສຂ ເຊກອງ ມີຄວາມເຂັ້ມແຂງ ແລະ ດີຂຶ້ນເປັນກ້າວໆ.

#ໂດຍ: ນັກຂ່າວ  ເຂດທີ 16