ໃນລະຫວ່າງວັນທີ 26-28 ສິງຫາ 2024, ທ່ານ ນາງ ແກ້ວລາ ມະນີຈິດ ຄະນະປະຈຳ, ປະທານຄະນະກໍາມະການວັດທະນະທໍາ–ສັງຄົມ ແລະ ບັນດາເຜົ່າ, ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນານ, ລົງເຄື່ອນໄຫວພົບປະຜູ້ມີສິດເລືອກຕັ້ງ ເພື່ອເຜີຍແຜ່ຜົນສຳເລັດ ກອງປະຊຸມສະໄຫມສາມັນ ເທື່ອທີ 7 ຂອງ ສະພາປະຊາຊົນແຂວງ ຊຸດທີ II ຢູ່ 4ຈຸດ, ລວມມີ 4 ບ້ານຄື: ບ້ານນາເມືອງໃຫ່ຍ, ບ້ານປົ່ງດົ່ງ, ບ້ານໂພນແກ້ວ ແລະ ບ້ານດ່ານ ເມືອງນານ ແຂວງຫຼວງພະບາງ ເຊິ່ງແຕ່ລະຈຸດ ມີຜູ້ເຂົ້າຮ່ວມຮັບຟັງການເຜີຍແຜ່ ມີອຳນາດການປົກຄອງບ້ານ, ເຖົ້າແກ່ແນວໂຮມ ຕະຫຼອດພໍ່ແມ່ປະຊາຊົນບັນດາເຜົ່າ ທັງຫມົດລວມມີ 386 ຄົນ, ຍິງ 223 ຄົນ;

ການລົງເຄື່ອນໄຫວວຽກງານ ຂອງ ທ່ານ ໃນຄັ້ງນີ້ ກໍ່ເພື່ອນໍາເອົາເນື້ອໃນຜົນສໍາເລັດ ຂອງ ກອງປະຊຸມສະໄໝສາມັນ ເທື່ອທີ 7ຂອງ ສະພາປະຊາຊົນແຂວງ ຊຸດທີ II, ມາເຜີຍແຜ່ໃຫ້ ປະຊາຊົນບັນດາເຜົ່າ ໄດ້ຮັບຮູ້ການເຄື່ອນໄຫວວຽກງານ ຂອງ ອົງການປົກຄອງແຂວງ, ວຽກງານສະພາປະຊາຊົນແຂວງ, ວຽກງານອົງການຕຸລາການ ແລະ ວຽກງານອື່ນໆ ທີ່ໄດ້ຄົ້ນຄ້ວາ,ພິຈາລະນາ ແລະ ຮັບຮອງ ຢູ່ໃນກອງປະຊຸມສະພາປະຊາຊົນແຂວງ ນຳມາເຜີຍແຜ່ໃຫ້ ພະນັກງານ–ລັດຖະກອນ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ໃຫ້ໄດ້ຮັບຮູ້ ເຂົ້າໃຈ ນໍາໄປຈັດຕັ້ງຜັນຂະຫຍາຍ ເຂົ້າສູ່ວຽກງານຕົວຈິງຢູ່ທ້ອງຖິ່ນຮາກຖານເມືອງ ແລະ ບ້ານ; ເຊິ່ງໃນການລົງເຄື່ອນໄຫວແຕ່ລະຈຸດນັ້ນ ໄດ້ຮັບຟັງສະພາບການພັດທະນາເສດຖະກິດ–ສັງຄົມ ພາຍໃນບ້ານ ແຕ່ລະບ້ານ ສ່ວນໃຫຍ່ແມ່ນມີອາຊີບການບໍລິການ, ຄ້າຂາຍ, ປູກຝັງ ແລະ ລ້ຽງສັດເປັນຕົ້ນຕໍ, ຄຽງຄູ່ກັນນັ້ນ ທ່ານຍັງໄດ້ໂອ້ລົມ, ຮັບຟັງຄໍາຄິດຄໍາເຫັນ, ຄໍາສະເໜີຂອງ ປະຊາຊົນບັນດາເຜົ່າ ຕິດພັນກັບການເກັບກໍາສະພາບການຄຸ້ມຄອງລັດ, ຄຸ້ມຄອງເສດຖະກິດ–ສັງຄົມ ຢູ່ພາຍໃນເມືອງນານ.

ໃນໂອກາດດັ່ງກ່າວ ທ່ານ ນາງ ແກ້ວລາ ມະນີຈິດ ໄດ້ຮຽກຮ້ອງໃຫ້ອໍານາດການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າ ມີຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະກັນ, ເຊື່ອໝັ້ນຕໍ່ການນໍາພາຂອງ ພັກ–ລັດ, ເປັນເຈົ້າການໃນການສຶກສາອົບຮົມລູກຫຼານໃຫ້ເປັນພົນລະເມືອງດີ, ເອົາໃຈໃສ່ຜະລິດສິນຄ້າກະສິກໍາທີ່ເປັນທ່າແຮງຂອງບ້ານ ທີ່ເມືອງສົ່ງເສີມ ແລະ ມີຕະຫຼາດຮອງຮັບ ສ່ວນຄໍາສະເໜີທີ່ປະຊາຊົນສະເໜີນັ້ນບາງຄຳສະເໜີແມ່ນໄດ້ຊີ້ແຈງກັບທີ, ມີບາງຄຳສະເໜີຈະໄດ້ສັງລວມ ແລະ ສົມທົບກັບພາກສ່ວນກ່ຽວຂ້ອງ ເພື່ອລົງກວດກາແລະ ແກ້ໄຂໃຫ້ທັນຕາມສະພາບການ.

ໂດຍ: ເພັດສະໝອນ ທໍາມຸງຄຸນ

​