(ສພຊ) ວັນທີ 12 ທັນວາ 2023 ທີ່ຫໍສະພາແຫ່ງຊາດ ໄດ້ມີກອງປະຊຸມຮຽບຮຽງເນື້ອໃນຂອງຮ່າງກົດໝາຍວ່າດ້ວຍການບັນຊີ (ສະບັບປັບປຸງ) ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ; ເຂົ້າຮ່ວມມີທ່ານ ປອ. ພູທອນ ວໍລະເພັດ ຮອງປະທານກຳມາທິການກົດໝາຍ; ທ່ານ ທັນຕາ ກອງຜາລີ ຮອງປະທານກຳມາທິການແຜນການ, ການເງິນ ແລະ ການກວດສອບ ແລະ ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ; ບັນດາທ່ານທີ່ປຶກສາທາງດ້ານກົດໝາຍ, ຫ້ອງວ່າການສຳນັກງານປະທານປະເທດ, ສຳນັກງານນາຍົກລັດຖະມົນຕີ, ກະຊວງຍຸຕິທຳ, ຄະນະກົມ, ຄະນະພະແນກ ພ້ອມດ້ວຍພາກສ່ວນທີ່ກ່ຽວຂ້ອງຈາກສະພາແຫ່ງຊາດ ແລະ ກະຊວງການເງິນ.

ກອງປະຊຸມຄັ້ງນີ້, ໄດ້ຮັບຟັງການສະເໜີບັນດາຄຳເຫັນຂອງສະມາຊິກສະພາແຫ່ງຊາດ (ສສຊ) ທີ່ໄດ້ປະກອບຄຳເຫັນຢູ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ຈາກຕາງໜ້າກົມກົດໝາຍຂອງສະພາແຫ່ງຊາດ; ຈາກນັ້ນ, ບັນດາຜູ້ເຂົ້າຮ່ວມໄດ້ພ້ອມກັນສຸມໃສ່ຄົ້ນຄວ້າ, ເລືອກເຟັ້ນເອົາບັນດາຄຳຄິດເຫັນຂອງ ສສຊ ທີ່ມີເຫດ ຜົນ ມາປັບປຸງໃສ່ຮ່າງກົດໝາຍສະບັບດັ່ງກ່າວ.

ໃນກອງປະຊຸມ, ທ່ານ ປອ. ນາງ ສູນທອນ ໄຊຍະຈັກ ໄດ້ມີຄຳເຫັນວ່າ: ກອງປະຊຸມຄົ້ນຄວ້າ ແລະ ຮຽບຮຽງເນື້ອໃນຂອງກົດໝາຍທີ່ຜ່ານການພິຈາລະນາຮັບຮອງເອົາໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ຄື ກົດໝາຍວ່າດ້ວຍການບັນຊີ (ສະບັບປັບປຸງ) ຕາມການປະກອບຄໍາເຫັນຂອງບັນດາທ່ານສະມາຊິກສະພາແຫ່ງຊາດ ໃນຄັ້ງວັນທີ 14 ພະຈິກ 2023 ເຊິ່ງການຄົ້ນຄວ້າ ແລະ ປະກອບຄໍາເຫັນຂອງບັນດາທ່ານ ສສຊ ມີຈໍານວນ 24 ທ່ານ ກວມເອົາ 30 ມາດຕາ, 55 ເນື້ອໃນ; ຈາກນັ້ນ, ຄະນະຮັບຜິດຊອບປັບປຸງກົດໝາຍວ່າດ້ວຍການບັນຊີ ກໍໄດ້ຄົ້ນຄວ້າພິຈາລະນາບັນດາຄໍາເຫັນຂອງບັນດາທ່ານ ສສຊ ສຳເລັດໂດຍພື້ນຖານແລ້ວ ໃນນີ້, ສາມາດປັບປຸງຕາມການປະກອບຄໍາເຫັນຂອງ ສສຊ ຈໍານວນ 15 ມາດຕາ ແລະ ສະເໜີຮັກສາໄວ້ຄືເກົ່າ ຈຳນວນ 15 ມາດຕາ ເຊິ່ງກົດໝາຍສະບັບນີ້ ເປັນກົດໝາຍສະບັບໜຶ່ງທີ່ຜ່ານການຮັບຮອງຈາກສະມາຊິກສະພາແຫ່ງຊາດ ດ້ວຍຄະແນນ 99,34 ສ່ວນຮ້ອຍ ເປັນຄະແນນທີ່ສູງກວ່າໝູ່ໃນຈໍານວນກົດໝາຍທີ່ຖືກພິຈາລະນາຮັບຮອງເອົາໃນກອງປະຊຸມສະໄໝສາມັນ ເທື່ອທີ 6. ກອງປະຊຸມຂອງພວກເຮົາ ດຳເນີນໄປເປັນເວລາ 1 ວັນ ເພື່ອພ້ອມກັນຄົ້ນຄວ້າຄືນບັນດາຄຳເຫັນຂອງສະມາຊິກສະພາແຫ່ງຊາດ ເພື່ອເລືອກເຟັ້ນເອົາຄຳເຫັນທີ່ມີເຫດມີຜົນປັບປຸງໃສ່ກົດໝາຍ ແນໃສ່ເຮັດໃຫ້ເນື້ອໃນຂອງກົດໝາຍມີຄວາມຄົບຖ້ວນ, ສົມບູນ ແລະ ສາມາດຈັດຕັ້ງປະຕິບັດໄດ້ ເຊິ່ງມີ 15 ມາດຕາ ສາມາດປັບປຸງໄດ້ ແລະ ຍັງອີກ 15 ມາດຕາ ບໍ່ສາມາດປັບປຸງໄດ້; ສະນັ້ນ, ເພື່ອຮັບປະກັນໃຫ້ບັນດາຄໍາເຫັນທີ່ ສສຊ ໄດ້ປະກອບຄຳເຫັນໃສ່ ໄດ້ຮັບການຄົ້ນຄວ້າພິຈາລະນາຢ່າງເລິກເຊິ່ງ ສະເໜີໃຫ້ບັນດາທ່ານໄດ້ພ້ອມກັນຄົ້ນຄວ້າຕື່ມຕໍ່ຄໍາເຫັນທີ່ບໍ່ສາມາດປັບປຸງໄດ້ນັ້ນ ຄະນະຮັບຜິດຊອບໄດ້ໃຫ້ເຫດຜົນພຽງພໍແລ້ວບໍ່ ຫຼື ຕ້ອງໄດ້ປັບປຸງຄືແນວໃດ ເພື່ອເຮັດໃຫ້ກົດໝາຍສະບັບນີ້ປະກາດໃຊ້ ແລ້ວໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)