(ສພຊ) – ວັນທີ 3-4 ເມສານີ້ ທີ່ສະພາແຫ່ງຊາດ (ສພຊ) ໄດ້ມີກອງປະຊຸມຮຽບ ຮຽງເນື້ອໃນກົດໝາຍວ່າດ້ວຍການປົກຄອງທ້ອງຖິ່ນ (ສະບັບປັບປຸງ) ໂດຍການເປັນປະທານຂອງທ່ານ ຄຳໃບ ດຳລັດ ຮອງປະທານສະພາແຫ່ງຊາດ; ເຂົ້າຮ່ວມມີບັນດາປະທານ ແລະ ຮອງປະທານກຳມາທິການຂອງ ສພຊ, ຮອງລັດຖະມົນຕີກະຊວງພາຍໃນ, ຮອງລັດຖະມົນຕີກະຊວງຍຸຕິທຳ, ຮອງຫົວໜ້າຫ້ອງວ່າການສຳນັກງານປະທານປະເທດ, ຮອງຫົວໜ້າຫ້ອງວ່າການສໍານັກງານນາຍົກລັດຖະມົນຕີ, ຄະນະທີ່ປຶກສາທາງດ້ານກົດໝາຍຂອງຄະນະປະຈຳສະພາແຫ່ງຊາດ ແລະ ພາກສ່ວນທີ່ກ່ຽວຂ້ອງ.
ທ່ານ ຄຳໃບ ດຳລັດ ໄດ້ກ່າວວ່າ: ການປະກອບຄໍາເຫັນຂອງບັນດາທ່ານສະມາຊິກສະພາແຫ່ງຊາດ (ສສຊ) ໃນກອງປະຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ຄັ້ງວັນທີ 18 ມີນາ 2025 ເຊິ່ງກວມເອົາ 27 ມາດຕາ, 102 ເນື້ອໃນ ແລະ ໃນຕອນເຊົ້າຂອງວັນທີ 20 ມີນາ 2025 ກົດໝາຍວ່າດ້ວຍການປົກຄອງທ້ອງຖິ່ນ ສະບັບປັບປຸງ ໄດ້ຜ່ານການຮັບຮອງເອົາໂດຍການເຫັນດີ 148 ທ່ານ ເທົ່າກັບ 97.36%; ຫຼັງຈາກນັ້ນ, ບັນດາກົມທີ່ກ່ຽວຂ້ອງຂອງສະພາແຫ່ງຊາດ ໄດ້ປະສານສົມທົບກັບກະຊວງພາຍໃນ ເພື່ອຈັດກອງປະຊຸມຄົ້ນຄວ້າຕໍ່ບັນດາຄຳເຫັນຂອງ ສສຊ. ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອຮັບຟັງການລາຍງານຂອງຄະນະວິຊາການທີ່ໄດ້ຄົ້ນຄວ້າບັນດາຄຳເຫັນຂອງ ສສຊ ແລະ ເລືອກເຟັ້ນເອົາຄຳເຫັນທີ່ມີເຫດມີຜົນປັບປຸງໃສ່ກົດໝາຍວ່າດ້ວຍການປົກຄອງທ້ອງຖິ່ນ ເພື່ອຮັບປະກັນໃຫ້ບັນດາຄໍາເຫັນນັ້ນ ໄດ້ຮັບການຄົ້ນຄວ້າພິຈາລະນາຢ່າງເລິກເຊິ່ງ ເພື່ອເຮັດໃຫ້ກົດໝາຍສະບັບນີ້ ມີເນື້ອໃນຄົບຖ້ວນ, ຮັດກຸມ ເມື່ອປະກາດໃຊ້ແລ້ວ ໄດ້ຮັບການຈັດຕັ້ງປະຕິບັດຢ່າງມີປະສິດຜົນ.
(ນາງ ອາລິນ ສຸພິມມະປະດິດ)