(ສພຊ) – ເພື່ອຮັບປະກັນໃຫ້ທຸກຄຳເຫັນຂອງບັນດາທ່ານສະມາຊິກສະພາແຫ່ງຊາດ (ສສຊ) ໄດ້ຮັບການຄົ້ນຄວ້າ, ວິເຄາະ, ວິໄຈ ແນໃສ່ປັບປຸງຮ່າງລັດຖະທຳມະນູນໃຫ້ມີເນື້ອໃນຄົບຖ້ວນ, ຮັດກຸມ, ແທດຕົວຈິງ ແລະ ສາມາດຈັດຕັ້ງປະຕິບັດຢ່າງມີປະສິດທິຜົນ; ຄະນະກໍາມະການລະດັບຊາດປັບປຸງລັດຖະທໍາມະນູນ ແຫ່ງ ສປປລາວ ສະບັບປີ 2015 (ຄລຊ) ໄດ້ຈັດກອງປະຊຸມຄົ້ນຄວ້າປັບປຸງເນື້ອໃນລັດຖະທຳມະນູນຕາມການຊີ້ນຳຂອງກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ເພື່ອຄົ້ນຄວ້າ, ປັບປຸງ, ຮຽບຮຽງ ເນື້ອໃນຂອງຮ່າງລັດຖະທຳມະນູນ ກ່ອນຈະນຳໄປຜ່ານກອງປະຊຸມຄົບຄະນະຂອງ ຄລຊ ໃນໄວໆນີ້ ເພື່ອນຳໄປທາບທາມຄວາມເຫັນຂອງປະຊາຊົນລາວບັນດາເຜົ່າໃນທົ່ວປະເທດ ໃນຕົ້ນປີ 2025.

ກອງປະຊຸມໄດ້ຈັດຂຶ້ນເມື່ອວັນເສົາທີ 7 ທັນວາຜ່ານມາ ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ຮອງປະທານຜູ້ປະຈຳການຄະນະກໍາມະການລະດັບຊາດປັບປຸງລັດຖະທໍາມະນູນ ເຊິ່ງມີບັນດາທ່ານກຳມະການ, ກອງເລຂາ, ອະນຸກໍາມະການເນື້ອໃນ ແລະ ອະນຸກຳ ມະການຕ່າງໆຂອງ ຄລຊ ເຂົ້າຮ່ວມ.

ທ່ານ ສຈ. ປອ. ຈະເລີນ ເຢຍປາວເຮີ ໄດ້ເນັ້ນໜັກເຖິງຈຸດປະສົງ ແລະ ເນື້ອໃນຕົ້ນຕໍຂອງກອງປະຊຸມຄັ້ງນີ້ ແມ່ນເພື່ອຄົ້ນຄວ້າ, ຮຽບຮຽງຮ່າງລັດຖະທຳມະນູນສະບັບປັບປຸງ ຕາມຄຳເຫັນຂອງບັນດາທ່ານສະມາຊິກສະພາແຫ່ງຊາດໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃນນີ້, ມີບາງມາດຕາ ເຊັ່ນມາດຕາ 99 ພົວ ພັນເຖິງກົດໝາຍໄອຍະການປະຊາຊົນ ບໍ່ໄດ້ປັບປຸງ, ແຕ່ຈະໄດ້ພິຈາລະນາປັບປຸງ.

ຜູ້ເຂົ້າຮ່ວມໄດ້ເອົາໃຈໃສ່ຄົ້ນຄວ້າ, ວິເຄາະ, ວິໄຈ ປະກອບຄຳເຫັນຕໍ່ການປັບປຸງຮ່າງລັດຖະທຳມະນູນດ້ວຍຄວາມຮັບຜິດຊອບສູງ ເຮັດໃຫ້ກອງປະຊຸມຄັ້ງນີ້ ບັນລຸຜົນສຳເລັດຕາມຄາດໝາຍທີ່ວາງໄວ້.

(ນາງ ອາລິນ ສຸພິມມະປະດິດ)