(ສພຊ) ເພື່ອເປັນການຄົ້ນຄວ້າບັນດາຄຳເຫັນຂອງສະມາຊິກສະພາແຫ່ງຊາດ ທີ່ໄດ້ມີຄຳເຫັນສະເໜີໃຫ້ປັບປຸງໃສ່ກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍສານປະຊາຊົນ ເຊິ່ງຖືກ​ຮັບຮອງ​ໃນ​ກອງ​ປະຊຸມ​ສະ​ໄໝ​ສາມັນ​ເທື່ອທີ 3 ຂອງ​ສະພາ​ແຫ່ງ​ຊາດ ຊຸດ​ທີ IX ​​ເມື່ອ​ວັນ​ທີ 7 ກໍລະກົດ 2022 ຜ່ານມາ ໂດຍມີສະມາຊິກສະພາແຫ່ງຊາດ ເຂົ້າຮ່ວມ 155 ທ່ານ, ເຫັນດີ 149 ທ່ານ ເທົ່າກັບ 96,13% ບໍ່ເຫັນດີ 6 ທ່ານ ເທົ່າກັບ 3,87% ແນໃສ່ເຮັດໃຫ້ເນື້ອໃນຂອງກົດໝາຍມີຄວາມຄົບຖ້ວນ, ສົມບູນ ແລະ ສາມາດຈັດຕັ້ງປະຕິບັດໄດ້.

ກອງ​ປະຊຸມ​ຮຽບຮຽງ​ກົດໝາຍວ່າດ້ວຍ​ການປັບປຸງບາງມາດຕາຂອງກົດໝາຍວ່າດ້ວຍສານປະຊາຊົນ ຕາມ​ການ​ປະກອບ​ຄຳ​ເຫັນ​ຂອງ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 3 ຂອງ​ສະພາ​ແຫ່ງ​ຊາດ ຊຸດ​ທີ IX ​ເຊິ່ງ​ບັນດາທ່ານສະມາຊິກສະພາແຫ່ງຊາດ ​ໄດ້ປະກອບຄຳເຫັນ ທັງໝົດ 19 ທ່ານ ແລະ ສົ່ງເອກະສານປະກອບຄຳເຫັນ ຈຳນວນ 5 ທ່ານ ກວມເອົາ 4 ມາດຕາ, 36 ເນື້ອໃນ ໄດ້​​ໄຂ​ຂຶ້ນ​ໃນ​ວັນ​ທີ 3 ສິງຫາ 2022 ຢູ່ທີ່ລ່ອງງື່ມວິວ ລີສອດ ເມືອງແກ້ວອຸດົມ ແຂວງວຽງຈັນ ​ໂດຍ​ການ​ເປັນ​ປະທານຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດໝາຍ ສະພາແຫ່ງຊາດ; ມີທ່ານ ຄຳແພງ ວິລະພັນ ປະທານກຳມາທິການຍຸຕິທຳ, ທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ, ຮອງລັດຖະມົນຕີກະຊວງຍຸຕິທຳ, ບັນດາທ່ານຮອງປະທານກຳມາທິການຍຸຕິທຳ, ກຳມາທິການກົດໝາຍ, ຄະນະທີ່ປືກສາດ້ານກົດໝາຍຂອງຄະນະປະຈຳສະພາແຫ່ງຊາດ, ຫົວໜ້າ-ຮອງຫົວໜ້າກົມ ແລະ ພະນັກງານ-ລັດຖະກອນ ຈາກພາກສ່ວນກ່ຽວຂ້ອງເຂົ້າຮ່ວມ.

(ພາບ ແລະ ຂ່າວ: ນາງ ປາກາລັກ ພົມມີໄຊ)