ໃນຕອນບ່າຍວັນທີ 4 ກຸມພາ 2022 ຜ່ານມານີ້ ທີ່ສະໂມສອນ ສະພາປະຊາຊົນແຂວງ ເຊກອງ (ສພຂ) ກົມສື່ມວນຊົນ ສະພາແຫ່ງຊາດ (ສພຊ) ໄດ້ເຄື່ອນໄຫວເຝີກອົບຮົມຍຸດທະສາດໃໝ່ແຫ່ງການກະຈາຍຂໍ້ມູນ-ຂ່າວສານຜ່ານລະບົບແອັບພິເຄຊັນຂອງມືຖື (LAONA) ໃຫ້ແກ່ຄະນະເລຂາທິການ ແລະ ພະນັກງານວິຊາການ ທີ່ຮັບຜິດຊອບວຽກງານຂໍ້ມູນ-ຂ່າວສານ ສະພາປະຊາຊົນແຂວງເຊກອງ ນຳໂດຍ ທ່ານ ຂັນທະວີ ວົງພະຈັນ ຮອງຫົວໜ້າກົມສື່ມວນຊົນ ສພຊ ພ້ອມຄະນະ, ເຊິ່ງໃຫ້ກຽດຕ້ອນຮັບຂອງ ທ່ານ ນາງ ຄໍາໄພ ວິລະສານ ຄະນະປະຈໍາ ເລຂາທິການ ສພຂ, ມີຄະນະເລຂາທິການ, ພະນັກງານ-ລັດຖະກອນໃນຂະແໜງຄົ້ນຄວ້າ-ສັງລວມ ແລະ ຂໍ້ມູນ-ຂ່າວສານ, ວິຊາການຂະແໜງຊ່ວຍວຽກ ສສຊ ພ້ອມດ້ວຍວິຊາການ 03 ກໍາມະການ ເຂົ້າຮ່ວມ.              ຊຸດຝຶກອົບຮົມໄດ້ດໍາເນີນເປັນເວລາ 01 ຄາບ ໂດຍໄດ້ຮັບຟັງຄໍາແນະນໍາ, ຂັ້ນຕອນ ໃນການເຂົ້າລະຫັດຂອງ ສພຂ ໃນເວັບໄຊ໌ຂອງສະພາແຫ່ງຊາດ ແລະ ວິທີການນຳເອົາຮູບພາບ, ເນື້ອໃນຂອງຂ່າວ, ການແກ້ໄຂຂ່າວ ທີ່ລົງໃນເວັບໄຊ໌ຂອງສະພາແຫ່ງຊາດ (ສພຊ). ພ້ອມທັງຮຽນຮູ້ວິການການຕັ້ງແອັບພິເຄຊັນຜ່ານລະບົບມືຖື (LAONA) ທີ່ສາມາດລິ້ງກັນກັບ ເວັບໄຊ໌ www.na.gov.la ຂອງ ສພຊ.                                                                                                                      ພ້ອມກັນນັ້ນ, ນັກສໍາມະນາກອນທີ່ເຂົ້າຮ່ວມຊຸດຝຶກອົບຮົມ ຍັງໄດ້ພ້ອມກັນເຊີດຊູຄວາມຮັບຜິດຊອບສູງ, ໂດຍໄດ້ສຸມໃສ່ຮຽນຮູ້, ສົນທະນາແລກປ່ຽນ, ຖອດຖອນບົດຮຽນ ເຊິ່ງກັນ ແລະ ກັນດ້ວຍບັນຍາການທີ່ຄຶກຄື້ນ.        ທັງນີ້, ກໍເພື່ອເປັນການຍົກສູງຄຸນນະພາບຂອງວຽກງານຂ່າວສານ ຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ ໃນການໂຄສະນາເຜີຍແຜ່ການເຄື່ອນໄຫວວຽກງານຂອງສະພາແຫ່ງຊາດ, ສະພາປະຊາຊົນຂັ້ນແຂວງ ໃຫ້ມີຄວາມຖືກຕ້ອງສອດຄ່ອງ, ມີຄວາມວ່ອງໄວທັນຕໍ່ເຫດການ, ພ້ອມທັງ ຂະຫຍາຍກະບອກສຽງໃຫ້ແກ່ສະພາແຫ່ງຊາດ ແລະ ສະພາປະຊາຊົນແຂວງ ໃນການໂຄສະນາເຜີຍແຜ່ຂໍ້ມູນ-ຂ່າວສານ ບັນດາແນວທາງນະໂຍບາຍຕ່າງໆຂອງພັກ, ລະບຽບກົດໝາຍຂອງລັດ, ການເຄື່ອນໄຫວວຽກງານຂອງ ສສຊ, ສສຂ ໃນຂອບເຂດທົ່ວປະເທດ ຜ່ານລະບົບທີ່ທັນສະໄໝ ສາມາດເຮັດໃຫ້ພໍ່ແມ່ປະຊາຊົນໄດ້ຮັບຮູ້ຂໍ້ມູນຂ່າວ-ສານ ຢ່າງທົ່ວເຖິງ ແລະ ທັນຕໍ່ເຫດການ.