ໃນວັນທີ 27 ພຶດສະພາ 2025 ທ່ານ ນວນທອງ ສຸວັນວິໄຊ ຮອງເລຂາທິການສະພາແຫ່ງຊາດ ພ້ອມຄະນະ ໄດ້ເຄື່ອນໄຫວເຮັດວຽກຢູ່ແຂວງສະຫວັນນະເຂດ ຊຶ່ງທາງຄະນະໄດ້ເຂົ້າພົບທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງສະຫວັນນະເຂດ ເພື່ອແຈ້ງຈຸດປະສົງຂອງການມາເຮັດວຽກໃນຄັ້ງນີ້ ຈາກນັ້ນກໍໄດ້ ຈັດກອງປະຊຸມຮ່ວມກັບສະພາປະຊາຊົນແຂວງ ໂດຍການເປັນປະທານຮ່ວມ ຂອງທ່ານ ຄຳຜັນ ຄູນສະຫວັນ ຄະນະປະຈຳພັກແຂວງ ຮອງປະທານສະພາປະຊາຊົນແຂວງ ມີບັນດາທ່ານຄະນະເລຂາທິການ, ຮອງປະທານກຳມະການ, ຫົວໜ້າຂະແໝງ-ຮອງຫົວໜ້າຂະແໜງເຂົ້າຮ່ວມ.
ທາງຄະນະໄດ້ຟັງການລາຍງານການຈັດຕັ້ງປະຕິບັດໜ້າທີ່ວຽກງານຂອງຄະນະເລຂາທິການສະພາປະຊາຊົນແຂວງ ໃນໄລຍະຜ່ານມາໂດຍສັງເຂບຈາກທ່ານ ພູທອນ ພຸດທະຂັນຕິ ເລຂາທິການສະພາປະຊາຊົນແຂວງ ເປັນຕົ້ນວຽກງານຂະແໜງບໍລິຫານ-ການເງິນ; ວຽກງານຂະແໜງຈັດຕັ້ງ-ກວດກາ; ວຽກງານຄົ້ນຄວ້າ-ສັງລວມ ແລະ ຂໍ້ມູນຂ່າວສານ, ວຽກງານຂະແໜງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ; ວຽກງານຂະແໜງນິຕິກຳ ແລະ ຍຸຕິທຳ; ວຽກງານຂະແໜງປ້ອງກັນຊາດ-ປ້ອງກັນຄວາມສະຫງົບ; ວຽກງານຂະແໜງເສດຖະກິດ; ວຽກງານຂະແໜງແຜນການ ແລະ ການເງິນ; ວຽກງານຂະແໜງວັດທະນະທຳ-ສັງຄົມ; ວຽກງານຂະແໜງບັນດາເຜົ່າ ຊຶ່ງໄດ້ຍົກໃຫ້ເຫັນເຖິງຂໍ້ສະດວກ ແລະ ຂໍ້ຄົງຄ້າງ ໃນການຈັດຕັ້ງປະຕິບັດວຽກງານໃນໄລຍະຜ່ານມາ; ຈາກນັ້ນ, ບັນດາຜູ້ເຂົ້າຮ່ວມ ກໍໄດ້ປະກອບຄຳຄິດຄຳເຫັນດ້ວຍຄວາມຮັບຜິດຊອບສູງ ເພື່ອປຶກສາຫາລື, ແລກປ່ຽນບົດຮຽນເຊິ່ງກັນແລະກັນ ໂດຍສະເພາະຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານຕ່າງໆ ເພື່ອພ້ອມກັນຊອກຫາວິທີການແກ້ໄຂໃນຕໍ່ໜ້າໃຫ້ດີຂຶ້ນກວ່າເກົ່າ.
