ວັນທີ 9 ມັງກອນ 2024 ຜ່ານມານີ້ ທ່ານ ສົມສັກ ດອນຈານິດ ຮອງປະທານສະພາປະຊາຊົນ ແຂວງຫົວພັນ ພ້ອມດ້ວຍ ພະແນກການ, ຂະແໜງການທີ່ກ່ຽວຂ້ອງ ຮ່ວມກັບການນຳເມືອງຊ່ອນ ຕະຫຼອດຮອດພໍ່ແມ່ປະຊາຊົນບັນດາເຜົ່າ 5 ບ້ານ ເຂົ້າຮ່ວມພິທີສະເຫຼີມສະຫຼອງບຸນປະເພນີ ບຸນເກຣິຫ ຂອງເຜົາກຶມມຸຢູ່ທີ່ບ້ານ ນາກຽນ ເມືອງຊ່ອນ ແຂວງຫົວພັນ, ໃນພິທີ ທ່ານ ແສງຈັນ ຢາງນ້າວຊົວ ປະທານ ແນວລາວສ້າງຊາດເມືອງຊ່ອນ ທັງເປັນປະທານ ຈັດງານບຸນ ເກຣິຫ ໃນຄັ້ງນີ້ ໄດ້ຂຶ້ນກ່າວຈຸດປະສົງ ແລະ ເລົ່າປະຫວັດຄວາມເປັນມາ ຂອງບຸນເກຣິຫ

              ບຸນເກຣິຫ ແມ່ນຈັດຂຶ້ນໃນເດືອນ ຈຽງ ຫາ ເດືອນ ຍີ່ ກົງກັບ ເດືອນສິບສອງຕໍ່ໃສ່ເດືອນຫນຶ່ງສາກົນ ພາຍຫຼັງທີ່ເກັບກູ້ຜົນຜະລິດ ຂົນເຂົ້າຂຶ້ນເລົ້າຂຶ້ນເຍຍສໍາເລັດແລ້ວ ເຜົ່າກຶມມຸ ກໍ່ຈະພ້ອມກັນຈັດງານບຸນດັ່ງກ່າວຂຶ້ນ ຕາມເງື່ອນໄຂ ແລະ ຄວາມສາມາດຂອງແຕ່ລະຄອບຄົວ ແລະ ແຕ່ລະບ້ານ ຫຼືຫຼາຍບ້ານໂຮມກັນ ບຸນເກຣິຫ ເປັນບຸນໃຫຍ່ ຂອງເຜົ່າກຶມມຸ ທີ່ເຄີຍປະຕິບັດ ແລະ ສືບທອດກັນມາແຕ່ບູຮານນະການ ເພື່ອເປັນການລະນຶກເຖິງຜົນງານ, ການອອກແຮງງານ ເພີ່ມພູນຜະລິດຜົນ ຮູ້ໄດ້ບຸນຄຸນ ຂອງຜົນລະປູກ ແລະ ລະນຶກເຖິງບຸນຄຸນ ຂອງຜີສາງນາງໄມ້ ທີ່ອາໄສຢູ່ພູຢູ່ປ່າ, ນາງ ທໍລະນີ ອາໄສຢູ່ແມ່ນໍ້າເຂດດິນ ທີ່ຊ່ວຍເບິ່ງແຍງຜົນລະປູກໃນ ການຫຼໍ່ລ້ຽງຊີບເຂົາເຈົ້າ ແລະ ຍັງເປັນການເຮັດບຸນສິນກິນທານໄປເຖິງບັນພະບູລຸດ ພໍ່ແມ່, ປູ່ຍ່າ, ຕານາຍ ຜູ້ທີລ່ວງລັບໄປແລ້ວ ໃຫ້ໄດ້ຢູ່ໄດ້ກິນ ມາປົກປ້ອງຄຸ້ມຄອງເຂົາເຈົ້າໃຫ້ມີແຕ່ສິ່ງດີໆ ໃນຊີວິດ ແລະ ເປັນການສະຫຼຸບ ປີເກົ່າຕ້ອນຮັບປີ ໃໝ່,

                ຈາກນັ້ນໄດ້ບາສີສູ່ຂວັນ, ຜູກແຂນອວຍພອນເຊິ່ງກັນ ແລະ ກັນ ພ້ອມທັງສ້າງກິດຈະກຳຕ່າງໆ ເຊັ່ນ: ການສະແດງສິລະປະວັນນະຄະດີພື້ນເມືອງ ແລະ ການຟ້ອນໃນບົດຟ້ອນຕ່າງໆ ຂອງໜ່ວຍສິລະປະສະໝັກຫຼິ້ນ ຈາກ 5 ບ້ານຄື: ໜ່ວຍສິລະປະຈາກບ້ານ ນາກຽນ, ບ້ານ ສົບຕິ້ວ, ບ້ານ ວັງແຟນ, ບ້ານວັງຄວ້າງ ແລະ ບ້ານ ສາມສຸມ ຕາມຮີດຄອງຂອງເຜົ່າກຶມມຸ ດ້ວຍຄວາມເບີກບານມ່ວນຊື່ນ ເພື່ອເປັນການອານຸລັກ ຮັກສາຮີດຄອງປະເພນີ ວັດທະນະທຳອັນດີງາມຂອງເຜົ່າຕົນໃຫ້ມີຄວາມຍືນຍົງຄູ່ກັບຊາດລາວຕະຫລອດໄປ.