ໃນວັນທີ 23 ພະຈິກ 2023, ທ່ານ ບຸນທາມ ພຸດທະວົງສາ, ກຳມະການ ປະຈຳພັກ ນວ, ຮອງປະທານ ສະພາປະຊາຊົນ ນວ, ມີບັນດາທ່ານ ປະທານ, ຮອງປະທານ ຄະນະກຳມະການຂອງສະພາປະຊາຊົນ ນວ, ຄະນະສະມາຊິກສະພາປະຊາຊົນ ປະຈຳເຂດເລືອກຕັ້ງເມືອງໄຊທານີ ໄດ້ລົງຕິດຕາມກວດກາ ແລະ ຊຸກຍູ້ ເພື່ອເກັບກຳບັນຫາ, ສະພາບຂໍ້ສະດວກ, ຂໍ້ຫຍຸ້ງຍາກໃນການຈັດຕັງປະຕິບັດວຽກງານດັ່ງກ່າວ ຢູ່ທີ່ສະໂມສອນ ບ້ານນາຕານ ເມືອງໄຊທານີ ນວ ໂດຍການຕ້ອນຮັບຂອງ ທ່ານ ໜູກີ ສີຫາລາດ, ຮັກສາການເລຂາພັກເມືອງ, ຮັກສາການເຈົ້າເມືອງ ໄຊທານີ ນວ, ເຊິ່ງມີບັນດາພະແນກການ ນວ, ຄະນະນຳເມືອງໄຊທານີ  ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນການລົງເຄື່ອນໄຫວຄັ້ງນີ້, ຄະນະຮັບຜິດຊອບຄົ້ນຄວ້າການສ້າງຕັ້ງເມືອງໃໝ່ ໄດ້ລາຍງານໃຫ້ຊາບວ່າ: ການ ສ້າງເມືອງ ແມ່ນໃຫ້ເປັນຍຸດທະສາດ, ເປັນເມືອງແນວຫຼັງຂອງວຽກງານປ້ອງກັນຊາດ-ປ້ອງກັນຄວາມສະຫງົບ, ປ້ອງກັນ ນະຄອນຫຼວງ, ຍ້ອນ ນະຄອນຫຼວງວຽງຈັນ ມີຊາຍແດນຕິດກັບປະເທດທີ່ມີລະບອບການເມືອງທີ່ແຕກຕ່າງກັນ, ສ້າງໃຫ້ເປັນນິເວດ ອີໂກຊິຕີ້ (Eco City) ຕາມທິດ 6 ສໍ, ມີທິວທັດທໍາມະຊາດ, ພັດທະນາເຂດການປະຕິວັດເກົ່າ ໃຫ້ມີຄວາມຈະເລີນສີວິໄລ, ເປັນບ່ອນຮອງຮັບການເພີ່ມຂຶ້ນຂອງພົນລະເມືອງ ຊາວນະຄອນຫຼວງ ເຊິ່ງປີໜຶ່ງ ເພີ່ມຂຶ້ນ 25.000 ຄົນ/ປີ, ຫຼຸດຜ່ອນຄວາມແອອັດໃນຕົວເມືອງ. ນອກຈາກນີ້, ໄດ້ລາຍງານຄວາມຄືບໜ້າໃນການສ້າງຕັ້ງເມືອງໃໝ່, ເຊິ່ງມາເຖິງປະຈຸບັນໄດ້ສໍາເລັດບັນດາໜ້າວຽກ ເປັນຕົ້ນ ການຂຽນບົດວິພາກສ້າງຕັ້ງເມືອງໃໝ່, ການສໍາຫຼວດ-ອອກແບບແຜນຜັງເມືອງໃໝ່ (ເທດສະບານເມືອງໃໝ່), ການສໍາຫຼວດເຂດແດນເຊື່ອມຕໍ່ ລະຫວ່າງ ບ້ານຕໍ່ບ້ານ, ເມືອງຕໍ່ເມືອງ, ສາມາດກໍານົດຂອບເຂດຄົ້ນຄວ້າສ້າງຕັ້ງເມືອງໃໝ່ ຕາມໃບຢັ້ງຢືນຂອງພະແນກພາຍໃນ ສະບັບເລກທີ 1227/ພນນວ, ລົງວັນທີ 12 ກັນຍາ 2022 ແລະ ໄດ້ການເກັບກໍາຂໍ້ມູນ ທາງດ້ານເສດຖະກິດ-ສັງຄົມ ຢູ່ໃນ 24 ບ້ານເປົ້າໝາຍ ທີ່ຈະສ້າງເມືອງໃໝ່.