(ສປນວ) ວັນທີ 10 ພະຈິກ 2022 ນໍາພາໂດຍ ທ່ານ ບຸນທາມ ພຸດທະວົງສາ ຮອງປະທານ ສະພາປະຊາຊົນ​ ນວ​ ພ້ອມດ້ວຍຄະນະ ລົງເຄື່ອນໄຫວຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ຢູ່ສານປະຊາຊົນ ເຂດ III ນວ ໂດຍການຕ້ອນຮັບຂອງ ທ່ານ ສົມສະຫວາດ ກົມໄຊຊະນະ ປະທານ ສານປະຊາຊົນ ເຂດ III ແລະ ທ່ານ ຮອງເຈົ້າເມືອງສີສັດຕະນາກ, ທ່ານ ຮອງເຈົ້າເມືອງຈັນທະບູລີ, ຄະນະນຳໄອຍະການປະຊາຊົນ ເຂດ III, ກອງບັນຊາການ ປກສ ເມືອງສີສັດຕະນາກ, ເມືອງຈັນທະບູລີ, ຄະນະນໍາຫ້ອງການຍຸຕິທໍາ ເມືອງສີສັດຕະນາກ ແລະ ເມືອງຈັນທະບູລີ ແລະ ພະນັກງານຈໍານວນໜຶ່ງ ເຂົ້າຮ່ວມ.

ໃນການລົງເຮັດວຽກຄັ້ງນີ້, ໄດ້ຮັບຟັງການລາຍງານຈາກພາກສ່ວນທີ່ກ່ຽວຂ້ອງ 08 ພາກສ່ວນ ຄື: ສານປະຊາຊົນ ເຂດ III, ອົງການໄອຍະການປະຊາຊົນ ເຂດ III, ກອງບັນຊາການ ປກສ ເມືອງສີສັດຕະນາກ, ເມືອງຈັນທະບູລີ; ຫ້ອງການຍຸຕິທຳ ແລະ ຫ້ອງວ່າການ ເມືອງສີສັດຕະນາກ, ເມືອງຈັນທະບູລີ; ໃນນັ້ນ, ທ່ານ ສົມສະຫວາດ ກົມໄຊຊະນະ ປະທານ ສານປະຊາຊົນ ເຂດ III ໄດ້ລາຍງານໃຫ້ຮູ້ວ່າ: ໃນໄລຍະຜ່ານມາ ສານປະຊາຊົນເຂດ III ແມ່ນໄດ້ປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ຕາມທີ່ໄດ້ກຳນົດໄວ້ໃນ ມາດຕາ 27 ຂອງກົດໝາຍວ່າດ້ວຍສານປະຊາຊົນ ສະບັບປີ 2017 ກໍຄືການພິຈາລະນາຄະດີເປັນຂັ້ນຕົ້ນໃນຄະດີທີ່ເກີດຂຶ້ນຢູ່ 02 ເມືອງຄື: ເມືອງສີສັດຕະນາກ ແລະ ເມືອງຈັນທະບູລີ ເຊິ່ງໃນໄລຍະຕົ້ນປີ 2022 ເຖີງປັດຈຸບັນ ມີຄະດີ ທັງໝົດ 278 ເລື່ອງ, ສາມາດພິຈາລະນາຕັດສິນໄດ້ 128 ເລື່ອງ ເທົ່າກັບ 66,5%. ພາຍຫຼັງຮັບຟັງການລາຍງານຂອງພາກສ່ວນຕ່າງໆ ບັນດາທ່ານຜູ້ເຂົ້າຮ່ວມ ໄດ້ມີຄຳເຫັນແລກປ່ຽນເຊິ່ງກັນ ແລະ ກັນ ເພື່ອຊອກຫາວິທີແກ້ໄຂບັນດາຂໍ້ຄົງຄ້າງໃນການປະຕິບັດວຽກງານຂອງແຕ່ລະຂົງເຂດ ໃນໄລຍະຜ່ານມາ.

ໃນໂອກາດດັ່ງກ່າວ ທ່ານ ບຸນທາມ ພຸດທະວົງສາ ຮອງປະທານ ສະພາປະຊາຊົນ ນວ ໄດ້ມີຄຳເຫັນຊຸກຍູ້ໃຫ້ແຕ່ລະພາກສ່ວນເອົາໃຈໃສ່ຕື່ມຕໍ່ການຈັດຕັ້ງປະຕິບັດໜ້າທີ່ວິຊາສະເພາະຂອງຕົນ ໂດຍສຸມໃສ່ການຈັດຕັ້ງປະຕິບັດວາລະແຫ່ງຊາດ ວ່າ ດ້ວຍການແກ້ໄຂບັນຫາຢາເສບຕິດຕາມຄວາມຮັບຜິດຊອບຢ່າງເຂັ້ມງວດ ໂດຍອີງໃສ່ ຂໍ້ຕົກລົງ ສະ ບັບເລກທີ 841/ຈນວ, ລົງວັນທີ 25 ຕຸລາ 2021 ແລະ ໃນຕອນທ້າຍ ກໍສະແດງຄວາມຍ້ອງຍໍຊົມເຊີຍຕໍ່ຄະນະນໍາຂອງແຕ່ລະຂົງເຂດວຽກງານທີ່ໄດ້ຕັ້ງໜ້າປະຕິບັດໜ້າທີ່ດ້ວຍຄວາມຮັບຜິດຊອບສູງ ແລະ ເນັ້ນໃຫ້ແຕ່ລະພາກສ່ວນສືບຕໍ່ເອົາໃຈໃສ່ປະຕິບັດບັນດາຄາດໝາຍ ແລະ ທິດທາງໃນຕໍ່ໜ້າທີ່ກຳນົດໄວ້ໃນແຜນການເຄື່ອນໄຫວໃຫ້ໄດ້ຮັບຜົນສຳ ເລັດຕາມຄາດໝາຍ ທີ່ວາງໄວ້.