ທ່ານ ນາງ ລຳພອຍ ສີອັກຄະຈັນ, ຮອງປະທານສະພາປະຊາຊົນນະຄອນຫຼວງວຽງຈັນ (ສປນວ) ແລະ ທ່ານ ສາລະພິດ ສູນວໍລະວົງ, ສະມາຊິກສະພາປະຊາຊົນ ນະຄອນຫຼວງວຽງຈັນ (ສສນວ) ພ້ອມດ້ວຍຄະນະ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ໂຄສະນາເຜີຍແຜ່ຜົນສຳເລັດກອງປະຊຸມສະ ໄໝສາມັນ ເທື່ອທີ 7 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນນະຄອນຫຼວງ ຊຸດທີ II ໃນວັນທີ 20 ສິງຫາ 2024 ຢູ່ພະແນກຍຸຕິທຳ ນະຄອນຫຼວງວຽງຈັນ ໂດຍການຕ້ອນຮັບຂອງ ທ່ານ ພູທອນ ແກ້ວດວງມະນີ, ຫົວໜ້າພະແນກຍຸຕິທຳ ນະຄອນຫຼວງວຽງຈັນ, ມີ ທ່ານ ຄຳສຸກ ແສງມີໄຊ, ຫົວໜ້າອົງການໄອຍະການປະຊາຊົນ ນະຄອນຫລວງ, ຕາງໜ້າຈາກອົງການກວດສອບປະຈຳພາກກາງ1, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນວ ພ້ອມພະນັກງານ-ລັດຖະກອນອ້ອມຂ້າງເຂົ້າຮ່ວມ.
ການລົງເຜີຍແຜ່ກອງປະຊຸມຄັ້ງນີ້ ພາຍຫຼັງໄດ້ຟັງລາຍງານການຈັດຕັ້ງປະຕິບັດວຽກງານໂດຍສັງເຂບຂອງຂອງພະແນກຍຸຕິທຳ ນວ ທ່ານ ນາງ ລຳພອຍ ສີອັກຄະຈັນ ແລະ ທ່ານ ສາລະພິດ ສູນວໍລະວົງ ໄດ້ພັດປ່ຽນເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 7 ຂອງ ສພຊ ຊຸດທີ IX ແລະ ກອງປະຊຸມສະໄໝສາມັນ ເທື່ອທີ7 ຂອງ ສປນວ ຊຸດທີ II ໂດຍໄດ້ຍົກໃຫ້ເຫັນການພິຈາລະນາຮັບຮອງເອົາບັນຫາສຳຄັນພື້ນຖານຂອງປະເທດຊາດໃນຂົງເຂດ ສພຊ ເຊິ່ງປະກອບມີມະຕິ 6 ສະບັບ ການຮັບຮອງການສ້າງ ແລະ ປັບປຸງກົດ ໝາຍ 13 ສະບັບ ລວມທັງວຽກງານ ສພຊ ແລະ ສປນວ ໄລຍະແຕ່ກອງປະຊຸມສະໄໝສາມັນເທື່ອທີ 6 ຫາເທື່ອທີ 7 ແລະ ແຜນການເຄື່ອນໄຫວຮອດກອງປະຊຸມສະໄໝສາມັນເທື່ອທີ8.
ນອກຈາກນີ້, ກໍໄດ້ເປີດໂອກາດໃຫ້ພະນັກງານລັດຖະກອນແຕ່ລະພາກສ່ວນສະເໜີຄວາມຂັດຂ້ອງໃຈຂອງຕົນ ທີ່ຕິດພັນກັບແກ້ໄຂຄະດີຕ່າງໆໃນຂົງເຂດຍຸຕິທຳ ເປັນຕົ້ນ ອົງການໄອຍະການປະຊາຊົນ ນວ ໄດ້ສະເໜີກ່ຽວກັບການປະຕິບັດໜ້າທີ່ວຽກງານຂອງຕົນ ໂດຍພື້ນຖານຜ່ານມາວຽກງານໄດ້ຮັບການຈັດຕັ້ງປະຕິບັດຕາມກົດໝາຍ ແຕ່ຍັງພົບບັນຫາມີການແຊກແຊງ ຂົ່ມຂູ່ຈາກບຸກຄົນທີ່ມີອິດທິພົນ ຜູ້ບໍ່ຫວັງດີດ້ວຍຮູບການຕ່າງໆ ເຮັດໃຫ້ພົບຄວາມຫຍຸ້ງຍາກໃນການປະຕິບັດໜ້າຢ້ານກົວ ແລະ ທໍ້ຖອຍ ສະເໜີໃຫ້ສະພາປະຊາຊົນນະຄອນຫຼວງວຽງຈັນຊ່ວຍປົກປ້ອງ ແລະ ເປັນທີ່ເພິ່ງໃຫ້ອົງການໄອຍະການປະຊາຊົນ ພ້ອມນີ້ ຍັງພົບເຫັນມີຫຼາຍບໍລິສັດໄດ້ສ້າງຕັ້ງຂຶ້ນບໍ່ຖືກຕ້ອງຕາມກົດໝາຍ ມີການປິດບັງກິດຈະການຂອງບໍລິສັດດໍາເນີນທຸລະກິດບໍ່ຖືກຕ້ອງຕາມທີ່ໄດ້ຮັບອະນຸຍາດ ບາງບໍລິສັດມີການເຊື່ອງອໍາໂດຍອອກຊື່ຄົນລາວແຕ່ເຈົ້າຂອງແມ່ນຄົນຕ່າງປະເທດ ເພື່ອຫຼີກລ່ຽງການປະຕິບັດບາງຂໍ້ກໍານົດຂອງກົດໝາຍ ສະເໜີພາກສ່ວນກ່ຽວຂ້ອງຕິດຕາມກວດກາແກ້ໄຂໃຫ້ຖືກຕ້ອງສອດຄ່ອງ ສະເໜີໃຫ້ ສສນວ ປັບປຸງແກ້ໄຂການລົງພົບປະຜູ້ມີສິດເລືອກຕັ້ງຂອງສະມາຊິກສະພາຢູ່ອົງການຈັດຕັ້ງໃດໜຶ່ງໃຫ້ມີການພົວພັນປະສານງານກັນຢ່າງເປັນເອກະພາບ ເພື່ອໃຫ້ການລົງໂຄສະນາເຜີຍແຜ່ນຳແຕ່ລະພາກສ່ວນມີປະສິດທິຜົນຫຼາຍຂຶ້ນ ສະເໜີຄັ້ງຕໍ່ໄປໃຫ້ເຊີນບັນດາອົງການຈັດຕັ້ງໃນຂົງເຂດວຽກງານທີ່ມີການພົວພັນປະສານງານກັນມາເຕົ້າໂຮມຢູ່ຈຸດດຽວເພື່ອເປັນໂອກາດແລກປ່ຽນຄໍາຄິດຄໍາເຫັນໄປພ້ອມ ສະເໜີໃຫ້ກວດກາບັນດາໂຄງການ ແລະ ປະກົດການ ຂຸດຄົ້ນແຮ່ທາດ ເພື່ອແກ້ໄຂໃຫ້ຖືກຕ້ອງຕາມກົດໝາຍ ມີຄຸນນະພາບ ແລະ ອື່ນໆ.