(ສພຊ) ວັນທີ 8 ກຸມພາ 2019 ທີ່ຫ້ອງປະຊຸມສະພາປະຊາຊົນແຂວງ (ສພຂ) ອຸດົມໄຊ ໄດ້ເປີດກອງປະຊຸມປຶກສາຫາລືກ່ຽວກັບເນື້ອໃນທີ່ຈະນຳເຂົ້າຜ່ານກອງປະຊຸມສະໄໝສາມັນເທື່ອທີ 6 ຂອງ ສພຂ ອຸດົມໄຊ ຊຸດທີ I ພາຍໃຕ້ການເປັນປະທານຂອງທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ; ເຂົ້າຮ່ວມມີທ່ານ ນາງ ສົມຈັນ ຈິດວົງເດືອນ ຮອງປະທານ ສພຂ, ບັນດາທ່ານຄະນະປະຈຳ ສພຂ, ຄະນະຮັບຜິດຊອບວຽກງານເຂດເລືອກຕັ້ງ, ບັນດາຫົວໜ້າ-ຮອງຫົວໜ້າພະແນກການກ່ຽວຂ້ອງ, ຫົວໜ້າ-ຮອງຫົວໜ້າຂະແໜງ ແລະ ພະນັກງານວິຊາການທີ່ຢູ່ໃນອະນຸກຳມະການເນື້ອໃນເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງການລາຍງານຈາກທ່ານ ນາງ ສົມຈັນ ຈິດວົງເດືອນ ກ່ຽວກັບການກະກຽມຄວາມພ້ອມທາງດ້ານພິທີການ, ວັນເວລາ ແລະ ສະຖານທີ່ ເຫັນວ່າການກະກຽມມີຄວາມພ້ອມ 100% ສຳລັບການດຳເນີນກອງປະຊຸມ; ຈາກນັ້ນ, ທ່ານ ວົງສະຫວັນ ໄຊຍະວົງ ໄດ້ລາຍງານກ່ຽວກັບການກະກຽມບັນດາເນື້ອໃນຕ່າງໆເຊັ່ນ: ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນການລົງທຶນຂອງລັດປະຈຳປີ 2018 ແລະ ທິດທາງແຜນການປີ 2019 ຂອງແຂວງ, ບົດລາຍງານການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2018 ແລະ ທິດທາງແຜນການ 2019 ຂອງແຂວງ, ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2018 ແລະ ທິດທາງແຜນການ ປະຈຳປີ 2019 ຂອງອົງການໄອຍະການປະຊາຊົນ ແລະ ສານປະຊາຊົນແຂວງ ແລະ ບົດລາຍງານຂອງຄະນະປະຈຳ ສພຂ ກ່ຽວກັບການເຄື່ອນໄຫວວຽກງານຂອງ ສພຂ ປະຈຳປີ 2018 ແລະ ທິດທາງແຜນການປີ 2019 ເຫັນວ່າການກະກຽມທາງດ້ານເນື້ອໃນແມ່ນສໍາເລັດເກືອບ 100% ຍັງຄົງຄ້າງບາງຕົວເລກທີ່ຍັງບໍ່ຄົບຖ້ວນ, ຈະແຈ້ງ ແລະ ເປັນເອກະພາບຈາກອົງການປົກຄອງແຂວງ ເຊິ່ງຈະໄດ້ຮັບການຊີ້ນຳເພີ່ມເຕີມຈາກຄະນະຮັບຜິດຊອບຮັບເຂດເລືອກຕັ້ງຕື່ມອີກ.
ຈາກນັ້ນ, ປະທ່ານກອງປະຊຸມໄດ້ມີຄຳເຫັນໂອ້ລົມ ແລະ ເນັ້ນໜັກໃຫ້ເອົາໃຈໃສ່ທາງດ້ານເນື້ອໃນຂອງບັນດາພະແນກການ, ເອົາໃຈໃສ່ປະຕິບັດຕາມ 3 ພາລະບົດບາດ, ສິດ ແລະ ໜ້າທີ່ຂອງ ສພຂ ໃຫ້ສົມກັບການເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ.
(ແສງພອນ ອິນນະລົງ)