(ສພຊ) ໃນລະຫວ່າງວັນທີ 14-16 ກຸມພາ 2022 ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ (ສພຊ) ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 7 ແຂວງໄຊຍະບູລີ ພ້ອມດ້ວຍຄະນະ ຮ່ວມກັບທ່ານ ເພັງນິລັນ ຄໍາພັນເພັງ ປະທານສະພາປະຊາຊົນແຂວງ ແລະ ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ ໄດ້ຢ້ຽມຢາມພົບປະກັບຜູ້ມີສິດເລືອກຕັ້ງທີ່ສະໂມສອນກອງພົນທີ 2 ກະຊວງປ້ອງກັນປະເທດ ໂດຍການຕ້ອນຮັບຂອງທ່ານ ພັທ. ບຸນເດີມ ດວງຈໍາປາ ຮອງຫົວໜ້າການເມືອງກອງພົນທີ 2, ມີບັນດາຄະນະພັກຄະນະນໍາ, ນາຍ ແລະ ພົນທະຫານພາຍໃນກອງພົນທີ 2 ເຂົ້າຮ່ວມ.
ທັງນີ້ ເພື່ອເປັນການປະຕິບັດລັດຖະທໍາມະນູນ ແລະ ກົດໝາຍ, ມະຕິຂອງຄະນະປະຈໍາສະພາແຫ່ງຊາດ ກ່ຽວກັບພາລະບົດບາດ, ສິດ ແລະ ໜ້າທີ່ຂອງ ສສຊ ປະຈໍາເຂດເລືອກຕັ້ງ ໃນການເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ ແລະ ໂຄສະນາເຜີຍແຜ່ບັນດາເນື້ອໃນບັນຫາສໍາຄັນຕ່າງໆ ທີ່ລັດຖະບານສະເໜີຕໍ່ກອງປະຊຸມສະພາແຫ່ງຊາດພິຈາລະນາ ໃຫ້ຜູ້ມີສິດເລືອກຕັ້ງໄດ້ຮັບຮູ້ ແລະ ເຂົ້າໃຈ ທັງເປັນການພົບປະຜູ້ມີສິດເລືອກຕັ້ງ ເພື່ອເກັບກໍາຄໍາຄິດຄໍາເຫັນຕໍ່ວຽກງານຄຸ້ມຄອງບໍລິຫານລັດ.
ໂອກາດດັ່ງກ່າວ, ຄະນະ ໄດ້ຮັບຟັງການລາຍງານຫຍໍ້ກ່ຽວກັບສະພາບການເຄື່ອນໄຫວ, ຜົນງານອັນພົ້ນເດັ່ນທີ່ກອງພົນທີ 2 ຍາດມາໄດ້ໃນໄລຍະຜ່ານມາ ແລະ ຄໍາສະເໜີຕ່າງໆອີກຈຳນວນໜຶ່ງ; ຈາກນັ້ນ, ບັນດາທ່ານສສຊ ກໍໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທືອທີ 2 ຂອງສະພາປະຊາຊົນແຂວງໄຊຍະບູລີ ຊຸດທີ II ພ້ອມທັງຕອບຂໍ້ຂ້ອງໃຈ ແລະ ບັນດາບັນຫາທີ່ຄະນະພັກຄະນະນໍາກອງພົນທີ 2 ນໍາມາສະເໜີຕາມສະພາບຄວາມເປັນຈິງ.
ໂອກາດດັ່ງກ່າວ, ທ່ານຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມຕໍ່ຄະນະພັກຄະນະນໍາກອງພົນທີ 2 ໂດຍທ່ານໄດ້ຍ້ອງຍໍຊົມເຊີຍຕໍ່ຜົນງານພົ້ນເດັ່ນທີ່ທາງກອງພົນທີ 2 ຍາດມາໄດ້ ແລະ ຍົກໃຫ້ເຫັນມູນເຊື້ອພິລະອາດຫານທີ່ມີມາແຕ່ອາດີດໃນພາລະກິດປົດປ່ອຍປະເທດຊາດ ຈົນເຖິງພາລະກິດປົກປັກຮັກສາປະເທດຊາດ; ຍົກໃຫ້ເຫັນຫລາຍບັນຫາສໍາຄັນທີ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ໄດ້ພິຈາລະນາຮັບຮອງເອົາ; ພ້ອມນັ້ນ, ຍັງໄດ້ເນັ້ນໃຫ້ບັນດາຄະນະພັກຄະນະນໍາ ແລະ ອ້າຍນ້ອງນາຍ ແລະ ພົນທະຫານ ພາຍໃນກອງພົນທີ 2 ສືບຕໍ່ຮັກສາມູນເຊື້ອອັນດີງາມທີ່ເຄີຍມີມາ, ໃຫ້ເປັນແບບຢ່າງນໍາໜ້າໃນການປະຕິບັດເຄົາລົບລັດຖະທໍາມູນ, ກົດໝາຍ, ໃຫ້ເຂົ້າຮ່ວມປະກອບສ່ວນຕັ້ງໜ້າແກ້ໄຂບັນຫາຂໍ້ຫຍຸ້ງຍາກ ແລະ ຄຽງບ່າຄຽງໄລ່ກັບກໍາລັງປ້ອງກັນຄວາມສະຫງົບແຂວງ ແລະ ປະຊາຊົນ ໃນການປະຕິບັດສອງວາລະແຫ່ງຊາດ ໃຫ້ມີຜົນສໍາເລັດ, ຮັກສາຄວາມສະຫງົບຄວາມສາມັກຄີພາຍໃນຢ່າງໜັກແໜ້ນ ເອົາໃຈໃສ່ສືບຕໍ່ປະຕິບັດມາດຕະການການດໍາລົງຊີວິດປົກກະຕິແບບໃໝ່ ພາຍໃຕ້ເງື່ອນໄຂຂອງການຕ້ານການແຜ່ລະບາດຂອງພະຍາດໂຄວິດ-19; ຈາກນັ້ນ, ຄະນະ ໄດ້ມອບເຄື່ອງກິລາຈໍານວນໜຶ່ງໃຫ້ກອງພົນທີ 2.
ໃນຕອນເຊົ້າຂອງວັນທີ 14 ກຸມພາ ຄະນະ ຍັງໄດ້ພົບປະກັບອ້າຍນ້ອງນາຍ ແລະ ພົນຕໍາຫລວດຢູ່ສະໂມສອນກອງບັນຊາການປ້ອງກັນຄວາມສະຫງົບແຂວງ ແລະ ໄດ້ມອບຄອມພິວເຕີ 1 ຊຸດ ແລະ ອຸປະກອນກິລາຈໍານວນໜຶ່ງ* ພ້ອມນັ້ນ, ຄະນະ ສສຊ ຍັງໄດ້ພົບປະຜູ້ມີສິດເລືອກຕັ້ງຢູ່ບັນດາພະແນກການອ້ອມຂ້າງຂອງແຂວງ, ພົບປະກັບປະຊາຊົນຢູ່ບ້ານປາກຮຸ່ງເມືອງ ແລະ ຈຸດອື່ນໆຕື່ມອີກ.
(ພາບ ແລະ ຂ່າວ: ສອນສັກ ວັນວິໄຊ)