(ສພຊ) ວັນທີ 9 ກັນຍາ 2019, ທ່ານ ພົທ. ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ (ສພຊ) ພ້ອມດ້ວຍຄະນະ ປະກອບດ້ວຍທ່ານ ນາງ ຄໍາເພັງ ວິໄລທອງ ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ, ທ່ານ ນາງ ແກ້ວວຽງໄຊ ຈັນສະໄໝ ສະມາຊິກສະພາປະຊາຊົນແຂວງ (ສສຂ) ສະຫວັນນະເຂດ ໄດ້ເຄື່ອນໄຫວພົບປະຜູ້ມີສິດເລືອກຕັ້ງ ແລະ ໂຄສະນາເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ແລະ ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ (ສພຂ) ສະຫວັນນະເຂດ ຊຸດທີ I ຢູ່ສອງຈຸດຄື: ຈຸດທີໜຶ່ງ ຢູ່ກອງບັນຊາການທະຫານແຂວງສະຫວັນນະເຂດ ໂດຍການເຂົ້າຮ່ວມຂອງນາຍ ແລະ ພົນທະຫານ ກອງບັນຊາການປ້ອງກັນຊາດ, ນາຍ ແລະ ພົນຕໍາຫລວດກອງບັນຊາການປ້ອງກັນຄວາມສະຫງົບ ແຂວງສະຫວັນນະເຂດ; ຈຸດທີສອງ ຢູ່ກອງພົນທະຫານຮາບທີ 4 ເມືອງອຸທຸມພອນ, ໂດຍການເຂົ້າຮ່ວມຂອງເຈົ້າເມືອງໆອຸທຸມພອນ, ນາຍ ແລະ ພົນທະຫານ ກອງພົນທະຫານຮາບທີ 4, ໂຮງໝໍ 109, ໂຮງງານປະສານເຫລົ່າພາກກາງ ແລະ ກອງພັນໃຫຍ່ 644.
ພາຍຫລັງໄດ້ຮັບຟັງລາຍງານສະພາບການໂດຍຫຍໍ້ ຂອງແຕ່ລະຄະນະພັກ-ຄະນະກອງບັນຊາການ, ທ່ານ ພົທ. ແສງນວນ ໄຊຍະລາດ ໄດ້ມີຄໍາເຫັນ ໂດຍໄດ້ສະແດງຄວາມເປັນຫ່ວງເປັນໃຍຕໍ່ເຫດການໄພພິບັດໃນພາກໃຕ້ຂອງລາວ ກໍຄືແຂວງສະຫວັນນະເຂດ ແລະ ໄດ້ສະແດງຄວາມຊົມເຊີຍໃນການເອົາໃຈໃສ່ຂອງກອງກໍາລັງປ້ອງກັນ ຊາດ-ປ້ອງກັນຄວາມສະຫງົບ ໃນການຊ່ວຍເຫລືອ-ບັນເທົາທຸກປະຊາຊົນ ຜູ້ໄດ້ຮັບຜົນກະທົບ; ທ່ານຍັງໄດ້ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ເຊິ່ງໄດ້ພິຈາລະນາ ແລະ ຮັບຮອງເອົາຫລາຍບັນຫາສໍາຄັນຂອງຊາດຄື: ໄດ້ພິຈາລະນາ ແລະ ຮັບຮອງເອົາບົດລາຍງານຂອງນາຍົກລັດຖະມົນຕີ ກ່ຽວກັບການປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 4 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2019; ບົດລາຍງານກ່ຽວກັບການພັດທະນາຊັບພະຍາກອນມະນຸດ ທີ່ຕິດພັນກັບການພັດທະນາເສດຖະກິດ-ສັງຄົມໃນແຕ່ລະໄລຍະ; ການຊີ້ແຈງຕໍ່ຄໍາຊັກຖາມຂອງສະພາແຫ່ງຊາດ ກ່ຽວກັບການຄຸ້ມຄອງ, ການອອກໃບຕາດິນຊໍ້າຊ້ອນໃນໄລຍະຜ່ານມາ ແລະ ມາດຕະການແກ້ໄຂໃນຕໍ່ໜ້າ, ກ່ຽວກັບການຟື້ນຟູປ່າ ແລະ ປູກປ່າ; ການເລືອກຕັ້ງປະທານສານປະຊາຊົນສູງສຸດ ແລະ ບົດລາຍງານຂອງອົງການໄອຍະການປະຊາຊົນສູງສຸດກ່ຽວກັບການປະຕິບັດກົດໝາຍຂອງອົງການສືບສວນ-ສອບສວນ. ກອງປະຊຸມຍັງໄດ້ຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 10 ສະບັບ, ໃນນັ້ນ ກົດໝາຍສ້າງໃໝ່ 5 ສະບັບຄື: ກົດໝາຍວ່າດ້ວຍອາກອນລາຍໄດ້, ກົດໝາຍວ່າດ້ວຍອາກອນຊົມໃຊ້, ກົດໝາຍວ່າດ້ວຍການຕອບໂຕ້ການທຸ້ມຕະຫລາດ ແລະ ການຊ່ວຍໜູນ, ກົດໝາຍວ່າດ້ວຍການຄຸ້ມຄອງໄພພິບັດ ແລະ ກົດໝາຍວ່າດ້ວຍເອກະສານ; ປັບປຸງກົດໝາຍ 5 ສະບັບຄື: ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍປ່າໄມ້, ກົດໝາຍວ່າດ້ວຍການຄຸ້ມຄອງສ່ວຍສາອາກອນ, ກົດໝາຍວ່າດ້ວຍຄ່າທໍານຽມສານ ແລະ ກົດໝາຍວ່າດ້ວຍອາຊີວະສຶກສາ.
ທ່ານ ນາງ ຄໍາເພັງ ວິໄລທອງ ແລະ ທ່ານ ນາງ ແກ້ວວຽງໄຊ ຈັນສະໄໝ ໄດ້ຜັດປ່ຽນກັນເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງ ສພຂ ສະຫວັນນະເຂດ ຊຸດທີ I ເຊິ່ງໄດ້ພິຈາລະນາ ແລະ ຮັບຮອງເອົາບັນ ຫາສຳຄັນຕ່າງໆຂອງແຂວງ ດ້ວຍບັນຍາກາດສ້າງສັນ ແລະ ຄວາມເປັນເອກະພາບສູງຄື: ພິຈາລະນາ ແລະ ປະກອບຄຳເຫັນໃສ່ບົດລາຍງານຂອງທ່ານເຈົ້າແຂວງໆສະຫວັນນະເຂດ ກ່ຽວກັບສະພາບການພັດທະນາເສດຖະກິດ-ສັງຄົມ ໄລຍະ 5 ເດືອນ, ຄາດຄະເນ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ 2019; ພິຈາລະນາ ແລະ ຮັບຮອງເອົາຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍການຄຸ້ມຄອງ ແລະ ປົກປັກຮັກສາເຂດສະຫງວນທາງຫລວງ ພາຍໃນແຂວງສະຫວັນນະເຂດ; ພິຈາລະນາ ແລະ ຮັບຮອງເອົາການຍົກຍ້າຍ, ການແຕ່ງຕັ້ງບຸກຄະລາກອນ ຂອງອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ຫົວໜ້າພະແນກການຂອງອົງການປົກຄອງແຂວງ; ພິຈາລະນາ ແລະ ຮັບຮອງເອົາແຜນດັດແກ້ແຜນລາຍຮັບວິຊາການ 6 ເດືອນທ້າຍປີ 2019 ຂອງອົງການປົກຄອງແຂວງ; ພິຈາລະນາ ແລະ ຮັບຮອງເອົາມາດຕະການໃນການຄຸ້ມຄອງການຜະລິດຖ່ານດຳ ແລະ ມາດຕະການຕໍ່ການອອກອະນຸຍາດ ແລະ ການຄຸ້ມຄອງໂຮງງານຜະລິດຖ່ານຂາວພາຍໃນແຂວງສະຫວັນນະເຂດ.,ຮັບຮອງມພວກເຮົາຮອງເຈົ້າແຂວງໆ 4ປ
ກອງປະຊຸມຍັງໄດ້ເປີດໂອກາດໃຫ້ຜູ້ມີສິດເລືອກຕັ້ງປະກອບຄໍາຄິດຄໍາເຫັນ ແລະ ມີຄໍາສະເໜີຕ່າງໆເຊັ່ນ: ບັນຫາສະພາບຄວາມແອອັດຄັບແຄບຂອງຄ້າຍຄຸມຂັງ-ດັດສ້າງ, ບັນຫາການຊໍາລະຊັກຊ້າຕໍ່ບັນດາໂຄງການຮັບເໝົາ ທີ່ສໍາເລັດແລ້ວ ແລະ ກໍາລັງດໍາເນີນຢູ່ ແລະ ບັນຫາອື່ນໆ.
ທ່ານຮອງປະທານສະພາແຫ່ງຊາດ ຍັງໄດ້ໃຫ້ທິດຊີ້ນໍາກ່ຽວກັບການສ້າງຂະບວນການຂໍ່ານັບຮັບຕ້ອນ ກອງປະຊຸມໃຫຍ່ 3 ຂັ້ນ ຂອງພັກ ແລະ ກອງປະຊຸມໃຫຍ່ຄັ້ງທີ XI ຂອງພັກ ໃຫ້ມີບັນຍາກາດຟົດຟື້ນເຊັ່ນ: ຂະບວນການກໍ່ສ້າງໜ່ວຍພັກປອດໃສ ເຂັ້ມແຂງ ແລະ ໜັກແໜ້ນ, ຂະບວນການຜະລິດເປັນສິນຄ້າ ໜຶ່ງເມືອງ-ໜຶ່ງຜະລິດ ຕະພັນ ກໍຄືຂະບວນການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ຂະບວນການປ້ອງກັນຊາດ-ປ້ອງກັນຄວາມສະຫງົບ ຕ້ານປາກົດການຫຍໍ້ທໍ້ ຕ້ອງເປັນແບບຢ່າງໃນການປະຕິບັດລະບຽບ ແລະ ກົດໝາຍ, ຂະບວນການສິລະປະວັນນະຄະດີ ແລະ ກິລາກາຍະກໍາຕ່າງໆ.