(ສພຊ) ໃນລະຫວ່າງວັນທີ 10-11 ກັນຍາ 2018 ທີ່ເມືອງວິລະບູລີ ແຂວງສະຫວັນນະ ເຂດ, ທ່ານ ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ ທັງເປັນ ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 13 ແຂວງສະຫວັນເຂດ ພ້ອມດ້ວຍບັນ ດາທ່ານ ສສຊ ແລະ ສະມາຊິກສະພາປະຊາຊົນແຂວງ (ສສຂ) ປະຈໍາເມືອງ ໄດ້ເຄື່ອນໄຫວພົບປະຜູ້ມີສິດເລືອກຕັ້ງ ແລະ ໂຄສະນາເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ (ສພຊ) ຊຸດທີ VIII ແລະ ສະພາປະຊາຊົນແຂວງ (ສພຂ) ຊຸດທີ I; ໃນນີ້, ໄດ້ລົງພົບປະ ແລະ ເຜີຍແຜ່ຢູ່ອົງການປົກຄອງເມືອງວິລະບູລີ, ບ້ານນາມະລຸ, ແລະ ບ້ານນໍ້າຈະໂລະ; ເຂົ້າຮ່ວມມີບັນດາທ່ານຄະນະປະຈໍາພັກເມືອງ, ພະນັກງານ-ລັດຖະກອນ, ທະຫານ-ຕໍາຫລວດ, ພະ ນັກງານອາວຸໂສບໍານານ ຕະຫລອດຮອດພໍ່ແມ່ປະຊາຊົນອ້ອມຂ້າງເມືອງ ແລະ ບ້ານ.
ການເຄື່ອນໄຫວໃນຄັ້ງນີ້, ໄດ້ຮັບຟັງການລາຍງານໂດຍສັງເຂບກ່ຽວກັບສະພາບແຜນພັດທະນາເສດຖະກິດ-ສັງຄົມຂອງເມືອງ ແລະ ບ້ານ ເຊິ່ງໃຫ້ເຫັນໄດ້ຂໍ້ສະດວກ ແລະ ຂໍ້ຫຍຸ້ງຍາກ ພ້ອມທັງໃຫ້ຮູ້ເຖິງຜົນກະທົບຂອງບັນດາໄພພິບັດທໍາມະຊາດ ເປັນຕົ້ນ: ສະພາບນໍ້າຖ້ວມ ເຮັດໃຫ້ປະຊາຊົນພົບຄວາມຫຍຸ້ງຍາກໃນການດໍາລົງຊີວິດ; ຈາກນັ້ນ, ບັນດາທ່ານ ສສຊ ແລະ ສສຂ ໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມດັ່ງກ່າວ. ໃນນີ້, ທ່ານຮອງປະທານສະພາແຫ່ງຊາດ ໄດ້ເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 5 ຂອງ ສພຊ ຊຸດທີ VIII ເຊິ່ງຈັດຂຶ້້ນລະຫວ່າງ 5-28 ມິຖຸນາ 2018 ເຊິ່ງໄດ້ພິຈາລະນາຮັບຮອງຫລາຍບັນຫາໃນກອງປະຊຸມ ເປັນຕົ້ນພິຈາລະນາ, ຮອງຮັບເອົາມະຕິຂອງກອງປະຊຸມ ສພຊ 4 ສະບັບ; ໃນນັ້ນ, ມະຕິກ່ຽວກັບວຽກງານຂອງລັດຖະບານ 3 ສະບັບ ແລະ ກ່ຽວກັບສານປະຊາຊົນສູງສຸດ 1 ສະບັບ; ຮັບຟັງການລາຍງານຂອງລັດຖະບານກ່ຽວກັບການປະຕິບັດມະຕິກອງປະຊຸມ ສພຊ ວ່າດ້ວຍການອອກນິຕິກໍາລຸ່ມກົດໝາຍ ແລະ ຜົນກະທົບຈາກການນໍາໃຊ້ສານເຄມີອັນຕະລາຍເກີນຄ່າມາດຕະຖານ ຕໍ່ສິ່ງແວດລ້ອມ ແລະ ທໍາມະຊາດ, ຮັບຟັງການຊີ້ແຈງຈາກທ່ານນາຍົກລັດຖະມົນຕີ ແລະ ບັນດາລັດຖະມົນຕີ 5 ກະຊວງຕໍ່ຄໍາຖາມຂອງ ສພຊ; ຮັບຟັງການລາຍງານຂອງ ສພຊ ກ່ຽວກັບການປະຕິບັດແຜນການເຄື່ອນໄຫວວຽກງານຂອງຄະນະປະຈໍາສະພາແຫ່ງຊາດ ລະຫວ່າງກອງປະຊຸມສະໄໝສາມັນເທື່ອທີ 4 ຫາເທື່ອທີ 5 ແລະ ທິດທາງແຕ່ນີ້ຮອດກອງປະຊຸມສະໄໝສາມັນເທື່ອທີ 6; ພິຈາລະນາ, ຮັບຮອງເອົາການສ້າງ ແລະ ປັບປຸງກົດໝາຍທັງຫມົດ 13 ສະບັບ ເຊິ່ງປະກອບມີກົດໝາຍສ້າງໃຫມ່ 5 ສະບັບ ແລະ ກົດໝາຍປັບປຸງ 8 ສະບັບ.
ໃນການລົງພົບປະ ແລະ ເຜີຍແຜ່ຜົນສໍາເລັດໃນຄັ້ງນີ້, ບັນດາທ່ານ ສສຊ ແລະ ສສຂ ໄດ້ລົງຕິດຕາມ ແລະ ຢ້ຽມຢາມໂຮງງານຜະລິດເຈ້ຍຊັນເປເປີ້ ຢູ່ເມືອງເຊໂປນ; ພ້ອມທັງໄດ້ຮັບຟັງຄໍາສະ ເໜີ, ຄໍາຄິດເຫັນ ຈາກປະຊາຊົນທີ່ພົບຄວາມຫຍຸ້ງຍາກໃນການດຳລົງຊີວິດ ແລະ ບັນຫາຕ່າງໆທີ່ ເກີດຂຶ້ນຕົວຈິງ ເປັນຕົ້ນ: ບັນຫາເສັ້ນທາງມີຄວາມຫຍຸ້ງຍາກໃນການໄປມາຫາສູ່ໃນລະດູຝົນ, ບັນຫານໍ້າສະອາດ, ໄຟຟ້າ, ໂຮງຮຽນ, ໂທລະໂຄ່ງປະຈໍາບ້ານ, ທຶນບຸກເບີກເນື້ອທີ່ນາ ແລະ ຊ້າງປ່າທີ່ເຂົ້າມາທໍາລາຍຜົນຜະລິດເຄື່ອງປູກຂອງຝັງຂອງປະຊາຊົນເຂດບ້ານນາມະລຸ; ພ້ອມກັນນັ້ນ, ບັນ ດາທ່ານ ສສຊ ແລະ ສສຂ ກໍໄດ້ໃຫ້ມີຄໍາຄິດຄຳເຫັນໃນການແກ້ໄຂບັນຫາເບື້ອງຕົ້ນ ແລະ ຮັບເອົາບັນດາຄໍາສະເໜີຂອງປະຊົນໄປນໍາສະເໜີຕໍ່ພາກສ່ວນທີ່ກ່ຽວຂ້ອງ ເພື່ອຫາວິທີການແກ້ໄຂໃນຕໍ່ໜ້າ.
(ສົມນຶກ ແກ້ວໄຊຍະຈັກ)