(ສພຊ) ວັນທີ 7 ຕຸລາ 2018, ທີ່ສະພາແຫ່ງຊາດ (ສພຊ), ສະຫາຍ ສົມພັນ ແພງຄໍາມີ ຮອງປະທານ ສພຊ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ເລ ກວາງ ຮຸງ ຮອງລັດຖະມົນຕີກະຊວງກໍ່ສ້າງ ສສ.ຫວຽດນາມ ເນື່ອງໃນໂອກາດເດີນທາງມາຕິດຕາມຄວາມຄືບໜ້າຂອງໂຄງການກໍ່ສ້າງຫໍສະພາແຫ່ງຊາດລາວ ຫລັງໃໝ່.

ໂອກາດດັ່ງກ່າວ, ສະຫາຍ ສົມພັນ ແພງຄໍາມີ ໄດ້ສະແດງຄວາມຍິນດີຕ້ອນຮັບ ສະຫາຍ ເລ ກວາງ ຮຸງ ພ້ອມດ້ວຍຄະນະ ດ້ວຍຄວາມຈິງໃຈ ແລະ ຕີລາຄາສູງຕໍ່ການເດີນທາງມາຢ້ຽມຢາມເຮັດວຽກຢູ່ ສປປລາວ ໃນຄັ້ງນີ້ ພ້ອມທັງແຈ້ງໃຫ້ຊາບກ່ຽວກັບການປະຕິບັດວຽກງານຂອງໂຄງການກໍ່ສ້າງຫໍສະພາແຫ່ງຊາດລາວ ຫລັງໃໝ່ ເຊິ່ງທາງ ສປປ ລາວ ແມ່ນໃຫ້ຄວາມຮ່ວມມືເຕັມທີ່ ແລະ ແຈ້ງໃຫ້ຊາບອີກວ່າ: ສ່ວນລວດລາຍຕ່າງໆທີ່ເປັນເອກະ ລັກວັດທະນະທໍາລາວ ແມ່ນຕົກລົງເອົານາຍຊ່າງທີ່ເປັນຄົນລາວ.

ໃນການຢ້ຽມຂໍ່ານັບຄັ້ງນີ້, ສະຫາຍ ເລ ກວາງ ຮຸງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງສະຫາຍຮອງປະທານ ສພຊ ແລະ ພ້ອມທີ່ຈະຮ່ວມມືທຸກດ້ານໃນການປະຕິບັດໂຄງການກໍ່ສ້າງຫໍສະພາແຫ່ງຊາດລາວ ຫລັງໃໝ່ ເພື່ອໃຫ້ໂຄງການບັນລຸຜົນສໍາເລັດຕາມແຜນການທີ່ວາງໄວ້.