(ສພຊ) ເພື່ອເປັນການປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັັກຄີພິເສດ ແລະ ການຮ່ວມມືຮອບດ້ານຂອງສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ; ໃນວັນທີ 24 ທັນວາຜ່ານມາ ທີ່ຫ້ອງປະຊຸມ ໂຮງແຮມເມືອງແທ໋ງ ນະຄອນຫລວງວຽງຈັນ, ສະຫາຍ ສົມພັນ ແພງຄຳມີ ກຳມະການສູນກາງພັກ, ຮອງປະທານສະພາແຫ່ງຊາດ (ສພຊ) ທັງເປັນປະທານຄະນະສັນຕິພາບ ແລະ ສາມັກຄີລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງສະຫາຍ ນາງ ຫງວຽນ ເຟືອງ ງາ ເລຂາຄະນະພັກສະຫະພັນບັນດາອົງການຈັດຕັ້ງມິດຕະພາບ, ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ພ້ອມດ້ວຍຄະນະສະມາຄົມມູນເຊື້ອທະຫານອາສາສະໝັກຫວຽດນາມ ແລະ ຊ່ຽວຊານຫວຽດນາມຢູ່ລາວ ໃນໂອກາດທີ່ເດີນທາງມາຢ້ຽມຢາມ ແລະ ເຂົ້າຮ່ວມພິທີໂຮມຊຸມນຸມໃຫຍ່ສະເຫລີມສະຫລອງວັນມູນເຊື້ອທະຫານອາສາສະໝັກ ແລະ ຊ່ຽວຊານຫວຽດນາມຢູ່ລາວ ຄົບຮອບ 70 ປີ.

ສະຫາຍ ສົມພັນ ແພງຄຳມີ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ບັນດາຜົນສຳເລັດຂອງປະຊາຊົນຫວຽດນາມອ້າຍນ້ອງຍາດມາໄດ້ໃນພາລະກິດປົກປັກຮັກສາ ແລະ ສ້າງສາປະເທດຊາດໃນໄລຍະຜ່ານມາ; ພ້ອມທັງສະແດງຄວາມຮູ້ບຸນຄຸນຢ່າງສູງຕໍ່ຜູ້ມີຄຸນງາມຄວາມດີຕໍ່ປະເທດລາວ ທີ່ໄດ້ມາຮ່ວມຮົບຢູ່ໃນສະໜາມຮົບ ຕໍ່ສູ້ປົດປ່ອຍຊາດ ໃນເມື່ອກ່ອນ; ພ້ອມນັ້ນ, ສະຫາຍຍັງໄດ້ກ່າວວ່າ: ຄະນະມິດຕະພາບ ແລະ ສາມັກຄີຂອງ ສປປລາວ ເປັນຮຸ່ນທີ 3 ຢູ່ພາຍໃຕ້ການຊີ້ນຳຄຸ້ມຄອງຂອງຄະນະພົວພັນຕ່າງປະເທດສູນກາງພັກ ໃນໄລຍະຜ່ານມາໄດ້ຕັ້ງໜ້າເຕົ້າໂຮມຂະບວນການເພື່ອສັນຕິພາບ ແລະ ສາມັກຄີຢ່າງຕັ້ງໜ້າ ໂດຍສະເພາະກໍໄດ້ມີການພົວພັນກັບແຕ່ລະຄະນະສັນຕິພາບຂອງຫວຽດນາມ ໃນການແລກປ່ຽນຄຳຄິດຄຳເຫັນ, ການເຄື່ອນໄຫວວຽກງານຢູ່ພາຍໃນພາກພື້ນ ແລະ ສາກົນ ແລະ ໄດ້ຮັບກຽດເປັນເຈົ້າພາບຈັດກອງປະຊຸມສັນຕິພາບໂລກໃນຂົງເຂດພາກພື້ນອາຊີປາຊີຟິກ ແລະ ກອງປະຊຸມຄະນະເລຂາທິການສະພາສັນຕິພາບໂລກ; ທັງສະເໜີໃຫ້ສືບຕໍ່ຊີ້ນຳຊ່ວຍເຫລືອຄະນະມິດຕະພາບ ແລະ ສາມັກຄີ ເພື່ອໃຫ້ການຈັດຕັ້ງຂອງສອງຄະນະລາວ-ຫວຽດນາມ ໄດ້ມີການເຄື່ອນໄຫວຢ່າງຖືກຕ້ອງ ແລະ ກວ້າງຂວາງກວ່າເກົ່າ.

ໂອກາດດັ່ງກ່າວ, ສະຫາຍ ນາງ ຫງວຽນ ເຟືອງ ງາ      ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ແລະ ລາຍງານໃຫ້ຮູ້ວ່າ: ຄະນະທີ່ເດີນທາງມາໃນຄັ້ງນີ້ ປະກອບມີ 40 ສະຫາຍ ທີ່ເປັນອາສາສະໝັກ ແລະ ຊ່ຽວຊານຫວຽດນາມທີ່ໄດ້ມາຮ່ວມສູ້ຮົບຄຽງບ່າຄຽງໄຫລ່ຢູ່ ລາວ ເພື່ອກອບກູ້ເອກະລາດ ແລະ ຍາດເອົາສັນຕິພາບມາໃຫ້ແກ່ສອງຊາດ ລາວ-ຫວຽດນາມ; ທັງເປັນການສະແດງຄວາມຮູ້ບຸນຄຸນອັນຍິ່ງໃຫຍ່ຕໍ່ພັກ-ລັດ, ພໍ່ແມ່ປະຊາຊົນລາວທີ່ມີຄວາມເປັນຈິດໜຶ່ງໃຈດຽວໃຫ້ຄວາມຊ່ວຍເຫລືອອຸປະຖຳຄ້ຳຊູ ໃຫ້ແກ່ທະຫານອາສາສະໝັກ ແລະ ຊ່ຽວຊານຫວຽດນາມ ໃນສະໄໝຕໍ່ສູ້ກູ້ຊາດທີ່ແສນຈະຫຍຸ້ງຍາກສັບສົນ ຈົນສາມາດເຮັດສຳເລັດໜ້າທີ່ທີ່ສອງພັກ, ສອງລັດມອບໝາຍໃຫ້ ເຊິ່ງສະແດງໃຫ້ເຫັນເຖິງມູນເຊື້ອອັນດີງາມຮອບດ້ານຂອງສອງພັກສອງລັດ ແລະ ປະຊາຊົນສອງຊາດທີ່ໄດ້ຮັບການເສີມຂະຫຍາຍເປັນເວລາດົນນານ; ພ້ອມທັງລາຍງານຈຸດປະສົງ ແລະ ການເຄື່ອນໄຫວໃນການມາຢ້ຽມຢາມໃນຄັ້ງນີ້ຕື່ມອີກ.