ເພື່ອເປັນການປະຕິບັດຕາມຄໍາແນະນໍາ ເລກທີ 19 /ຄປຈ, ລົງວັນທີ 26 ມັງກອນ 2024 ແລະ ແຜນການ ລົງເຄື່ອນໄຫວເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II ເລກທີ20 /ຄປຈ, ລົງວັນທີ 26 ມັງກອນ 2024.
ສະນັ້ນ, ໃນລະຫວ່າງວັນທີ 11 – 14 ມີນາ 2024, ທ່ານ ສິງຕັນ ໄຊລືຊົ່ງຄະນະປະຈຳພັກແຂວງ, ຮອງປະທານ ຄະນະປະຈຳສະພາປະຊາຊົນແຂວງໄດ້ລົງໂຄສະນາເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຕິດພັນກັບຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຢູ່ທີ່ສຳນັກເມືອງ, ບ້ານ ນາແຈ່ນ, ບ້ານ ວັງປ່ານ, ບ້ານ ຫ້ວຍແອນ ແລະ ບ້ານ ກິ່ວດອກແຄ, ເມືອງໂພນທອງ.
ສຳລັບ ຢູ່ສຳນັກເມືອງ ປະກອບມີເປົ້າໝາຍເຂົ້າຮ່ວມຄື: ຫົວໜ້າຄະນະສະມາຊິກສະພາປະຊາຊົນແຂວງ ປະຈຳເມືອງ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າ–ຮອງຫົວໜ້າ ຫ້ອງການ, ພະນັກງານ–ລັດຖະກອນ ພ້ອມດ້ວຍການຈັດຕັ້ງບ້ານ, ເຖົ້າແກ່ແນວໂຮມ ແລະ ປະຊາຊົນບ້ານ ວັງຊຽງ; ສຳລັບ ຢູ່ບ້ານ ນາແຈ່ນ, ບ້ານ ວັງປ່ານ, ບ້ານ ຫ້ວຍແອນແລະ ບ້ານ ກິ່ວດອກແຄ ປະກອບມີເປົ້າໝາຍເຂົ້າຮ່ວມຄື: ການຈັດຕັ້ງບ້ານ, ເຖົ້າແກ່ແນວໂຮມ ແລະ ປະຊາຊົນ ພາຍໃນບ້ານດັ່ງກ່າວ; ເຊິ່ງ 5 ຈຸດດັ່ງກ່າວມີຜູ້ເຂົ້າຮ່ວມທັງໝົດ ຈຳນວນ 365 ຄົນ, ຍິງ 140 ຄົນ.
ຈຸດປະສົງ ການລົງໂຄສະນາເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຕິດພັນກັບຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ໃນຄັ້ງນີ້ ແມ່ນເພື່ອເປັນການສືບຕໍ່ ເຮັດໃຫ້ຜູ້ມີສິດເລືອກຕັ້ງ ໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງ, ທົ່ວເຖິງ ກ່ຽວກັບຜົນສຳເລັດກອງປະຊຸມດັ່ງກ່າວ, ທັງເປັນການລົງຮາກຖານໃນການພົບປະ ປະຊາຊົນຜູ້ມີສິດເລືອກຕັ້ງ ເພື່ອຮັບຟັງຄໍາຄິດ, ຄໍາເຫັນ ແລະ ເກັບກຳສະພາບການຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍ ໃຫ້ນັບມື້ນັບມີຄວາມສັກສິດ ແລະ ເຂັ້ມງວດຍິ່ງຂຶ້ນ.
ການລົງເຮັດວຽກໃນຄັ້ງນີ້ ໄດ້ຮັບຟັງການລາຍງານສະພາບໂດຍຫຍໍ້ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ–ສັງຄົມ ຂອງເມືອງ, ບ້ານ ແລະ ທິດທາງແຜນການໃນຕໍ່ໜ້າ ຈາກອົງການປົກຄອງເມືອງແລະ ອົງການປົກຄອງບ້ານເປົ້າໝາຍ; ຈາກນັ້ນ ກໍໄດ້ຮັບຟັງການເຜີຍແຜ່ບັນດາເນືອໃນຈິດໃຈຜົນສຳເລັດກອງປະຊຸມສະ ໄໝສາມັນ ເທື່ອທີ 6 ຂອງສະພາແຫ່ງຊາດ ຕິດພັນກັບຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຈາກ ທ່ານ ສິງຕັນ ໄຊລືຊົ່ງ ຄະນະປະຈຳພັກແຂວງ, ຮອງປະທານ ຄະນະປະຈຳສະພາປະຊາຊົນແຂວງ ທີ່ໄດ້ພິຈາລະນາແລະ ຮັບຮອງເອົາ ຫຼາຍບັນຫາສຳຄັນພື້ນຖານຂອງຊາດ, ຂອງແຂວງ; ນອກນີ້ ຍັງໄດ້ຮັບການສະ ເໜີບັນຫາຕ່າງໆຈໍານວນໜຶ່ງ ຈາກຜູ້ມີສິດເລືອກຕັ້ງ, ໃນນີ້ ບາງຄໍາສະເໜີ ກໍໄດ້ມີການອະທິບາຍ ແລະ ຊີ້ແຈງກັບທີ່, ສ່ວນຄໍາສະເໜີໃດທີ່ພົວພັນເຖິງພາກສ່ວນອື່ນ ກໍຈະໄດ້ຈັດສົ່ງໃຫ້ພາກສ່ວນກ່ຽວຂ້ອງ ພິຈາລະນາແກ້ໄຂ ຫຼື ມີຄໍາຕອບໃຫ້ປະຊາຊົນ ຕາມພາລະບົດບາດ.
ຕອນທ້າຍ ທ່ານ ສິງຕັນ ໄຊລືຊົ່ງ ຄະນະປະຈຳພັກແຂວງ, ຮອງປະທານ ຄະນະປະຈຳສະພາປະຊາຊົນແຂວງ ໄດ້ໃຫ້ກຽດມີຄໍາເຫັນ ຊີ້ນໍາແລະ ໂອ້ລົມ ຕໍ່ຄະນະພັກ–ຄະນະນໍາຂອງເມືອງ, ການຈັດຕັ້ງບ້ານ ໃຫ້ສືບຕໍ່ສຶກສາອົບຮົມປະຊາຊົນ ພາຍໃນບ້ານເປົ້າໝາຍ ໃຫ້ກຳໄດ້ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ສືບຕໍ່ປະຕິບັດສອງວາລະແຫ່ງຊາດ ໃຫ້ປະກົດຜົນເປັນຈິງ ຕິດພັນກັບການຍົກສູງຄວາມຮັບຜິດຊອບປະກອບສ່ວນເຂົ້າໃນການປະຕິບັດ ມະຕິກອງປະຊຸມສະພາປະຊາຊົນແຂວງ ກໍຄືແຜນພັດທະນາເສດຖະກິດ–ສັງຄົມຂອງເມືອງ, ຂອງບ້ານ ໃຫ້ບັນລຸຕາມແຜນທີ່ວາງໄວ້ ທັງເປັນການສືບຕໍ່ສ້າງຂະບວນການ ເພື່ອຂໍ່ານັບຮັບຕ້ອນກອງປະຊູມໃຫຍ່ 3 ຂັ້ນ ໃຫ້ສໍາເລັດຕາມຈຸດປະສົງ ແລະ ລະດັບຄາດໝາຍທີ່ຂັ້ນເທິງວາງໄວ້.