ໃນລະຫວ່າງວັນທີ 26-28-29 ກັນຍາ 2023 ທ່ານ ນາງ ບັງອອນ ໄຊຍະສິດ ຮອງປະທານ ຄະນະສະມາຊິກ ສະພາແຫ່ງຊາດ ປະຈໍາເຂດເລືອກຕັ້ງ (ຄສຊຂ) 12 ແຂວງຄໍາມ່ວນ, ຮອງປະທານສະພາປະຊາຊົນແຂວງຄໍາມ່ວນ ພ້ອມດ້ວຍ ຄະນະສະມາຊິກສະພາປະຊາຊົນຂັ້ນແຂວງ ປະຈໍາເຂດເລືອກຕັ້ງເມືອງຫີນບູນ, ໄດ້ເຄື່ອນໄຫວພົບປະ ປະຊາຊົນທີຕິດພັນກັບການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ຜົນສໍາເລັດ ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II ຢູ່ 6 ຈຸດ ຂອງເມືອງຫີນບູນຄື: ທີ່ ບ້ານເລົ່າຄາ, ຫ້ວຍສະກຸບ, ບົງ, ນາຄໍາບໍ່, ນໍ້າດິກ ແລະ ບ້ານ ໂພນມ່ວງ; ໂດຍເປັນກຽດເຂົ້າຮ່ວມຕ້ອນຮັບ ແລະ ເຂົ້າຮ່ວມຮັບຟັງມີບັນດາທ່ານກຳມະການພັກເມືອງຜູ້ຊີ້ນຳແຕ່ລະເຂດ, ມີກຳລັງປກຊ-ປກສ, ອຳນາດການປົກຄອງຂັ້ນບ້ານ ຕະຫລອດຮອດພໍ່ແມ່ປະຊາຊົນ ເຂົ້າຮ່ວມທັງໝົດ 603 ເທື່ອຄົນ, ຍິງ 238 ເທື່ອຄົນ.
ຈຸດປະສົງໃນການລົງເຄື່ອນໄຫວພົບປະຢ້ຽມຢາມ ແລະ ເຮັດວຽກຄັ້ງນີ້: ກໍເພື່ອນໍາເອົາເນື້ອໃນຜົນສໍາເລັດ ຂອງການດໍາເນີນກອງປະຊຸມສະໄໝສາມັນ ເທື່ອທີ 5 ຂອງສະພາທັງ 2 ຂັ້ນ ເຜີຍແຜ່ໃຫ້ພະນັກງານ-ລັດຖະກອນ, ກຳລັງປກຊ-ປກສ, ອຳນາດການປົກຄອງຂັ້ນບ້ານ ຕະຫລອດຮອດພໍ່ແມ່ປະຊາຊົນໄດ້ຮັບຮູ້, ເຂົ້າໃຈຕໍ່ແນວທາງນະໂຍບາຍຂອງພັກເວົ້າລວມ, ເວົ້າສະເພາະກໍຄືວຽກງານຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ຕິດພັນກັບການລົງຢ້ຽມຢຽມຖາມຂ່າວ ແລະ ຮັບຟັງຄໍາຄິດເຫັນ, ຄໍາສະເໜີ, ຂໍ້ຂັດຂ້ອງໝອງໃຈຂອງປະຊາຊົນ ເພື່ອນໍາໄປຊຸກຍູ້ໃຫ້ພາກສ່ວນທີ່ກ່ຽວຂ້ອງແກ້ໄຂໃນຕໍ່ໜ້າ.
ໂດຍ: ເອື້ອ ມະໂນສິງ