(ສພຊ) ໃນລະຫວ່າງວັນທີ 29-31 ມັງກອນ 2024 ທ່ານ ພົຈວ. ສົມວັນ ທຳມາໄຊ ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫົງບ (ກປຊສ) ທັງເປັນສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 18 ແຂວງໄຊສົມບູນ ສົມທົບກັບ ສສຊ ປະຈໍາເຂດເລືອກຕັ້ງ ແລະ ສະມາຊິກສະພາປະຊົນແຂວງ (ສສຂ) ໄຊສົມບູນ ພ້ອມດ້ວຍຄະນະ ໄດ້ເຄື່ອນໄຫວພົບປະພະນັກງານຫຼັກແຫຼ່ງ ແລະ ຜູ້ມີສິດເລືອກຕັ້ງຢູ່ເມືອງລ້ອງຊານ ເພື່ອເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ (ສພຊ) ຊຸດທີ IX ແລະ ຂອງສະພາປະຊາຊົນແຂວງ (ສພຂ) ໄຊສົມບູນ ຊຸດທີ II ຢູ່ 5 ຈຸດຄື: ກອງບັນຊາການທະຫານເມືອງ, ຫ້ອງການອ້ອມຂ້າງເມືອງ, ບ້ານຄອນວັດ-ນ້ຳຄຸຍ-ຫີນສໍ, ກອງບັນຊາການປ້ອງກັນຄວາມສະຫງົບເມືອງ, ບ້ານໂພນມ່ວງ; ໂດຍມີບັນດາທ່ານຄະນະປະຈໍາ-ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ພະນັກງານບໍານານ, ພະນັກງານ-ລັດຖະກອນ, ທະຫານ, ຕໍາຫຼວດ, ອົງການປົກຄອງບ້ານອ້ອມຂ້າງເທສະບານເມືອງ ແລະ ປະຊາຊົນບັນດາເຜົ່າຜູ້ມີສິດເລືອກຕັ້ງ ເຂົ້າຮ່ວມຮັບຟັງທັງໝົດ 221 ທ່ານ ຍິງ 80 ທ່ານ.
ໃນໂອກາດນີ້, ຫົວໜ້າກອງບັນຊາການທະຫານ ແລະ ຫົວໜ້າກອງບັນຊາການ ປກສ ເມືອງລ້ອງຊານ ໄດ້ລາຍງານໂດຍຫຍໍ້ສະພາບການເຄື່ອນໄຫວຂອງກົມກອງ ໂດຍສະເພາະແມ່ນຈຸດທີ່ຕັ້ງຂອງເມືອງ, ກົມກອງ, ຜົນສຳເລັດໃນການຈັດຕັ້ງປະຕິບັດແຕ່ລະຂົງເຂດວຽກງານ ເປັນຕົ້ນວຽກງານການເມືອງ, ການທະຫານ, ຕຳຫຼວດ ແລະ ພາລາທິການ.
ຫຼັງຈາກນັ້ນ, ສສຊ ແລະ ສສຂ ກໍໄດ້ຜັດປ່ຽນກັນເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ IX ແລະ ຂອງ ສພຂ ຊຸດທີ II; ຜ່ານການຮັບຟັງການເຜີຍແຜ່, ບັນດາຜູ້ເຂົ້າຮ່ວມແມ່ນມີຄວາມເຂົ້າໃຈຕໍ່ບັນດາເອກະສານ ແລະ ມີຄວາມເອກະພາບສູງຕໍ່ການເຜີຍແຜ່ໃນຄັ້ງນີ້ ພ້ອມທັງສະເໜີຂໍງົບປະມານໃນການກໍ່ສ້າງໂຮງ ຮຽນແຕ່ລະບ້ານ, ວຽກການສຶກສາ, ສາທາລະນະສຸກ ແລະ ອື່ນໆອີກຈຳນວນໜຶ່ງ ເຊິ່ງຈະໄດ້ນຳເອົາບັນດາຄຳສະເໜີຂອງພໍ່ແມ່ປະຊາຊົນໄປໃຫ້ສະພາປະຊາຊົນແຂວງໄຊສົມບູນ ນຳໄປພິຈາລະນາປະສານສົມທົບກັບພາກສ່ວນກ່ຽວຂ້ອງພິຈາລະນາແກ້ໄຂຕາມສະພາບເງື່ອນໄຂ
