(ສພຊ) ວັນທີ 2 ມີນາ 2022 ທ່ານ ພົຈວ. ມາລາ ວິລະຈິດ ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ (ກປຊສ) ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ ແລະ ເຮັດວຽກຢູ່ແຂວງຈໍາປາສັກ ເຊິ່ງໄດ້ພົບປະກັບທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງຈຳປາສັກ ຢູ່ທີ່ສະພາປະຊາຊົນແຂວງ.

ຈາກນັ້ນ, ໄດ້ເຮັດວຽກຮ່ວມກັບຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງ, ຄະນະກອງບັນຊາການທະຫານແຂວງ, ຄະນະກອງບັນຊາການປ້ອງກັນຄວາມສະຫງົບແຂວງ, ຄະນະສະຫະພັນນັກຮົບເກົ່າແຂວງ, ຂະແໜງນິຕິກໍາ-ຍຸຕິທໍາ, ຂະແໜງປ້ອງກັນຊາດ-ປ້ອງກັນຄວາມສະຫງົບ ເຊິ່ງໄດ້ຮັບຟັງການລາຍງານຈາກພາກສ່ວນກ່ຽວຂ້ອງ ເຊິ່ງເຫັນໄດ້ສະພາບລວມຈຸດພິເສດຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດວຽກງານຂອງແຕ່ລພາກສ່ວນ ທີ່ຈະຕ້ອງໄດ້ສຸມໃສ່ໃນການຈັດຕັ້ງປະຕິບັດໃຫ້ສໍາເລັດໃນຕໍ່ໜ້າ.

ທ່ານ ພົຈວ. ມາລາ ວິລະຈິດ ໄດ້ມີຄໍາເຫັນ ແລະ ຕີລາຄາສູງຕໍ່ຜົນງານທີ່ທຸກພາກສ່ວນຍາດມາໄດ້ ເຊິ່ງການເຄື່ອນໄຫວຕິດຕາມກວດກາຂອງ ກປຊສຄັ້ງນີ້ ເປັນການເຄື່ອນໄຫວເກັບຂໍ້ມູນອັນສໍາຄັນໃນການນໍາໄປຄົ້ນຄວ້າປຶກສາຫາລື ແລະ ນໍາສະເໜີຕໍ່ຄະນະປະຈໍາສະພາແຫ່ງຊາດ.

ໃນຕອນບ່າຍຂອງວັນດຽວກັນ, ຄະນະ ຍັງໄດ້ເຄື່ອນໄຫວເຮັດວຽກຮ່ວມກັບຄະນະກອງພົນທະຫານຮາບ ທີ 5 ແລະ ຍັງຈະໄດ້ເຄື່ອນໄຫວພື້ນທີ່ຕົວຈິງຄ້າຍຄຸມຂັງ-ດັດສ້າງ ແຂວງຈໍາປາສັກ, ຄ້າຍຄຸມຂັງ-ດັດສ້າງ ພາກໃຕ້, ເຮັດວຽກຮ່ວມກັບກອງບັນຊາການທະຫານເມືອງໂພນທອງ ແລະ ດ່ານສາກົນວັງເຕົ່າ.

(ພາບ-ຂ່າວ: ພຸດທະສອນ ແສງພອນ ແລະ ສົມວິຈິດ ໄຊມົນຕີ)