(ສພຊ) ​ເນື່ອງ​ໃນ​ໂອກາດ​ວັນ​ລັດຖະທຳ​ມູນ ​ແຫ່ງ ສປປລາວ ຄົບຮອບ 27 ປີ (15 ສິງຫາ 1991- 15 ສິງຫາ 2018) ວັນ​ທີ 15 ສິງຫາ 2018, ທີ່​ຫ້ອງ​ຮັບ​ແຂກສະພາ​ແຫ່ງ​ຊາດ ທ່ານ ຄໍາໃບ ດຳລັດ ຮອງປະທານສູນກາງແນວລາວສ້າງຊາດ ພ້ອມ​ດ້ວຍ​ຄະນະ ​ໄດ້​​ເຂົ້າ​ອວຍພອນທ່ານ ນາງ ປານີ ຢາ​ທໍ່​ຕູ​້​ປະທານ​ສະພາ​ແຫ່ງ​ຊາດ.

​ໂອກາດ​ດຽວກັນ​ນີ້, ປະທານ​ສະພາ​ແຫ່ງ​ຊາດ ​ໄດ້​ສະ​ແດງ​ຄວາມ​ຂອບ​ໃຈ ​ແລະ ຕີ​ລາຄາ​ສູງ​ຕໍ່​ວັນ​ວັນ​ດັ່ງກ່າວເຊິ່ງທ່ານ​ໄດ້​ກ່າວ​ວ່າ: ​ໃນ​ໄລຍະ​ທີ່​ຜ່ານ​ມາ​ພວກ​ເຮົາ​​ໄດ້​ມີ​ການ​ປະສານ​ສົມທົບ​ກັບ​ຫລາ​ຍພາກສ່ວນ​ໃນການ​ສ້າງ ​ແລະ ປັບປຸງ​ກົດໝາຍ​ໄດ້​ຫລາຍ​ສະບັບ  ​ເພື່ອ​ໃຫ້​ສອດຄ່ອງ​ກັບ​ສະພາບ​ການ​ຂະ​ຫຍາ​ຍຕົວ​ຂອງ​ສັງຄົມ ​ແລະ ​ ​​ເພື່ອ​ໃຫ້ການ​ຄຸ້ມ​ຄອງ​ລັດ, ຄຸ້ມ​ຄອງ​ສັງຄົມ ມີ​ຄວາມ​ເປັນ​ເອກະ​ພາບ​ສູງ​ໃນ​ທົ່ວ​ປວງ​ຊົນ; ພ້ອມ​​ນັ້ນ, ທ່ານ​ຍັງ​ຮຽກຮ້ອງ​ໃຫ້​ອົງການ​ແນວລາວ​ສ້າງ​ຊາດ​ຊີ້​ນຳການ​ເຮັດວຽກຂອງ​ອົງການ​ແນວ​ລາວ​ສ້າງ​ຊາດຢູ່​ຂັ້ນ​ແຂວງ ​ເພື່ອ​ປະກອບ​ຄຳ​ເຫັນ​ໃສ່​ໃນ​ກອງ​ປະຊຸມ​ສະ​ໄຫມ​ສາ​ມັນຂອງ​ສະພາ​ປະຊາຊົນ​ແຂວງ​ໃນ​ທ້າຍ​ປີ​ນີ້ ​ເພື່ອ​ສ່ອງ​ແສງ​ບັນຫາ​ຕ່າງໆທີ່​ເກີດ​ຂຶ້ນ​ຢູ່​ໃນ​ທ້ອງ​ຖິ່ນ​ຂອງ​ຕົນ; ພ້ອມ​ດຽວກັນ​ນັ້ນ, ທ່ານ ຄຳ​ໃບ ດຳລັດ​ ຍັງ​ໄດ້​ລາຍ​ງານ​ການຈັດ​ຕັ້ງ​ປະຕິບັດ​ວຽກງານ​ຈຳນວນ​ໜຶ່ງຮ່ວມ​ກັບ​ສະພາ​ແຫ່ງ​ຊາດ​ຕື່ມ​ອີກ.

(ນາງ ອາ​ລິນ ສຸ​ພິມ​ມະ​ປະດິດ)