ໃນວັນທີ 25 ສິງຫາ 2022 ທ່ານ ຄໍາໃບ ດໍາລັດ ກໍາມະການສູນກາງພັກ ຮອງປະທານສະພາແຫ່ງຊາດ ຊຸດທີ IX ທັງເປັນສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ພ້ອມດ້ວຍ ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີແຂວງ 12 ແຂວງຄໍາມ່ວນ ແລະ ສະມາຊິກສະພາປະຊາຊົນຂັ້ນແຂວງ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ສອງເມືອງຄື: ເມືອງຍົມມະລາດ ແລະ ເມືອງນາກາຍ ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານເຈົ້າເມືອງ ແລະ ຮອງເຈົ້າເມືອງ ພ້ອມດ້ວຍບັນດາທ່ານຄະນະປະຈໍາພັກເມືອງ, ພະນັກງານ-ລັດຖະກອນ, ປກຊ-ປກສ, ເລຂາພັກບ້ານຕະຫຼອດຮອດພໍ່ແມ່ປະຊາຊົນເຂົ້າຮ່ວມ.
ພາຍຫລັງໄດ້ຮັບຟັງການລາຍງານໂດຍສັງເຂບກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ທີ່ຕິດພັນກັບສອງວາລະແຫ່ງຊາດກໍ່ຄືວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະ ທິດທາງແຜນການໃນຕໍ່ໜ້າຂອງເມືອງ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍ່ໄດ້ຜັດປ່ຽນເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຄໍາມ່ວນ ຊຸດທີ II ເຜີຍແຜ່ໃຫ້ປະຊາຊົນ, ພະນັກງານ-ລັດຖະກອນ, ທະຫານ-ຕໍາຫຼວດ ໄດ້ຮັບຮູ້ເຊື່ອມຊຶມ ແລະ ເຂົ້າໃຈຢ່າງເລິກເຊິ່ງ ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ພິຈາລະນາຮັບຮອງເອົາຫຼາຍບັນກາສໍາຄັນທີ່ເປັນພື້ນຖານຂອງຊາດ ເປັນຕົ້ນ: ກອງປະຊຸມໄດ້ຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນ ຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ແຜນງົບປະມານແຫ່ງລັດ, ການສັບຊ້ອນກົງຈັກຂອງລັດຖະບານ ແລະ ໄດ້ຮັບຮອງເອົາຮອງນາຍຍົກລັດຖະມົນຕີແຫ່ງ ສາທາລະນະລັດ ປະຊາທິປະໄຕປະຊາຊົນລາວ ຈໍານວນ 2 ທ່ານ, ແຕ່ງຕັ້ງ ທ່ານ ພົນເອກ ວິໄລ ຫລ້າຄໍາຟອງ ເປັນຮອງນາຍຍົກລັດຖະມົນຕີ, ທັງເປັນລັດຖະມົນຕີກະຊວງປ້ອງກັນຄວາມສະຫງົບ, ແຕ່ງຕັ້ງທ່ານ ສະເຫຼີມໄຊ ກົມມະສິດ ເປັນຮອງນາຍຍົກລັດຖະມົນຕີ, ທັງເປັນລັດຖະມົນຕີກະຊວງການຕ່າງປະເທດ, ພ້ອມໄດ້ຮັບຮອງເອົາທ່ານ ວຽງທະວີສອນ ເທບພະຈັນ ກໍາມະການສໍາຮອງສູນກາງພັກ ເປັນປະທານອົງການກວດສອບແຫ່ງລັດ, ແຕ່ງຕັ້ງ ທ່ານ ມະໄລທອງ ກົມມະສິດ ເປັນລັດຖະມົນຕີກະຊວງອຸດສະຫະກຳ ແລະ ການຄ້າ, ການສ້າງ ແລະ ປັບປຸງກົດໝາຍ ແລະ ບັນຫາອື່ນໆ.
ໂອກາດດັ່ງກ່າວ ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຕໍ່ອົງການປົກຄອງເມືອງ ແລະ ພາກສ່ວນທີ່ກ່ຽວຂ້ອງ, ຕໍ່ກັບບັນຫາການພັດທະນາເສດຖະກິດ-ສັງຄົມຂອງເມືອງທີຕິດພັນກັບສອງວາລະແຫ່ງຊາດ ແລະ ການເກັບລາຍຮັບເຂົ້າງົບປະມານໃຫ້ສູ້ຊົນຈັດຕັ້ງປະຕິບັດບັນດາຄາດໝາຍທີ່ວ່າງໄວ້, ຕໍ່ກັບສະພາບການເໜັງຕີງຂອງລາຄານໍ້າມັນເຊື້ອໄຟ, ລາຄາສິນຄ້າ, ອັດຕາແລກປ່ຽນ ແລະ ຄວາມຫຍຸ້ງຍາກຍາກອຶ່ນໆ ສົ່ງຜົນກະທົບສ້າງຄວາມເສຍຫາຍ ໃຫ້ແກ່ເສດຖະກິດ ແລະ ການດຳລົງຊີວິດຂອງປະຊາຊົນ ກໍຄືຂອງອົງການຈັດຕັ້ງພັກ-ລັດ ໃນການຮ່ວມກັນແກ້ໄຂບັນຫາທີ່ມີຄວາມຫຍຸ້ງຍາກໃຫ້ບັນລຸຜົນສຳເລັດຕາມຈຸດປະສົງຄາດໝາຍ ພ້ອມນີ້ ທ່ານ ຮອງປະທານສະພແຫ່ງຊາດຍັງໄດ້ເນັ້ນ ອຳນາດການປົກຄອງເມືອງ, ອຳນາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນ ຈົ່ງພ້ອມກັນຮັກສາມູນເຊື້ອຮັກແພງເຊິ່ງກັນ ແລະ ກັນ, ຕ້ານປະກົດການຫຍໍ້ທໍ່ຕ່າງໆທີ່ຈະເກີດຂຶ້ນ ແລະ ສ້າງຂະບວນການຜະລິດເປັນສິນຄ້າໜຶ່ງເມືອງ-ໜຶ່ງຜະລິດຕະພັນ ກໍຄືຂະບວນການປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນເປັນກ້າວໆ.
ໃນການລົງເຄື່ອນໄຫວຂອງທ່ານຮອງປະທານສະພາແຫ່ງຊາດ ພ້ອມຄະນະໃນຄັ້ງນີ້, ຍັງໄດ້ນໍາເອົາຜ້າອັດປາກ ມອບໃຫ້ອົງການປົກຄອງເມືອງຍົມມະລາດ ແລະ ເມືອງ ນາກາຍ ເປັນມູນຄ່າ 20 ລ້ານກວ່າກີບ ຕາງໜ້າຄະນະມອບໂດຍ ທ່ານ ສະເຫຼີມສັກ ແກ້ວ ຈັນທະລາ ຄະນະປະຈໍາສະພາປະຊາຊົນແຂວງ ເລຂາທິການສະພາປະຊາຊົນແຂວງຄໍາມ່ວນ ຕາງໜ້າອົງການປົກຄອງເມືອງຮັບໂດຍ ທ່ານ ບຸນທັນ ສຸວັນນະລາດ ເຈົ້າເມືອງຍົມມະລາດ ແລະ ເມືອງນາກາຍຕາງໜ້າ ຮັບ ໂດຍ ທ່ານ ບຸນມີ ທານຸວົງ ຮອງເລຂາພັກເມືອງນາກາຍ.
ໂດຍ: ເອື້ອ ມະໂນສິງ.