ໃນວັນທີ 22 ເມສາ 2024 ນີ້, ທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດໝາຍ ມີ ທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ ພ້ອມຄະນະໄດ້ເຄື່ອນໄຫວຕິດຕາມກວດກາການຈັດຕັ້ງປະຕິບັດວຽກງານໂຄສະນາເຜີຍແຜ່ລັດຖະທໍາມະນູນ ແລະກົດໝາຍ ຢູ່ແຂວງຈໍາປາສັກ ໂດຍໄດ້ເປີດກອງປະຊຸມເຮັດວຽກຮ່ວມກັບຫຼາຍພາກສ່ວນຂອງແຂວງຈໍາປາສັກ ມີ ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງຈໍາປາສັກ, ບັນດາທ່ານຮອງປະທານສະພາປະຊາຊົນແຂວງ, ຕາງໜ້າຈາກບັນດາພະແນກການຂອງອົງການປົກຄອງແຂວງ, ຂົງເຂດຕຸລາການ, ສາມອົງການຈັດຕັ້ງມະຫາຊົນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ວາລະດຳເນີນກອງປະຊຸມ, ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງຈໍາປາສັກ ໄດ້ມີຄໍາເຫັນກ່າວຕ້ອນຮັບຄະນະຂອງທ່ານຮອງປະທານສະພາແຫ່ງຊາດ ໃນໂອກາດມາເຮັດວຽກຢູ່ແຂວງຈໍາປະສັກໃນຄັ້ງນີ້, ພ້ອມທັງລາຍງານຫຍໍ້ກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງຈໍາປາສັກ ຍົກໃຫ້ເຫັນຜົນສໍາເລັດຫຼາຍດ້ານ ແລະ ທິດທາງແຜນການຂອງແຂວງຈໍາປາສັກ ທີ່ຈະສືບຕໍ່ຈັດຕັ້ງປະຕິບັດໃຫ້ມີຜົນສໍາເລັດ. ຈາກນັ້ນ, ທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ ປະທານກອງປະຊຸມໄດ້ມີຄໍາເຫັນສະເໜີຈຸດປະສົງ ແລະເຈາະຈີ້ມບາງບັນຫາທີ່ຕິດພັນກັບການຈັດຕັ້ງປະຕິບັດວຽກງານໂຄສະນາເຜີຍແຜ່ລັດຖະທໍາມະນູນ ແລະກົດໝາຍ ເພື່ອໃຫ້ຕາງໜ້າພະແນກການ ແລະ ພາກສ່ວນກ່ຽວຂ້ອງຂອງແຂວງມີຄໍາເຫັນລາຍງານ. ໃນນັ້ນ, ປະກອບມີພະແນກຍຸຕິທໍາແຂວງ ແລະພະແນກການໃນອົງການປົກຄອງແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ ແລະສາມອົງການຈັດຕັ້ງມະຫາຊົນຂອງແຂວງຈໍາປາສັກ ໄດ້ຂື້ນລາຍງານພ້ອມທັງຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ, ບົດຮຽນທີ່ຖອດຖອນໄດ້ ແລະ ສະເໜີວິທີຈັດຕັ້ງປະຕິບັດໃນຕໍ່ໜ້າ. ເຊິ່ງບັນດາທ່ານຜູ້ແທນທີ່ເຂົ້າຮ່ວມກອງປະຊຸມໄດ້ມີການສົນທະນາແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ຢ່າງມີຈຸດສຸມຢ່າງສ້າງສັນ.
ຈາກນັ້ນ, ທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ ໄດ້ເຜີຍແຜ່ຄໍາສັງແນະນໍາຂອງຄະນະປະຈໍາສະພາແຫ່ງຊາດ ສະບັບເລກທີ 01/ຄປຈ, ລົງວັນທີ 03 ມັງກອນ 2024 ວ່າດ້ວຍການສະຫຼຸບຕີລາຄາການໂຄສະນາເຜີຍແຜ່ກົດໝາຍ ເພື່ອໃຫ້ຜູ້ແທນທີ່ເຂົ້າຮ່ວມກອງປະຊຸມນໍາໄປຈັດຕັ້ງຜັນຂະໜາຍໃຫ້ມີຜົນສໍາເລັດ.
ໃນຕອນທ້າຍ, ທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ ປະທານກອງປະຊຸມ ໄດ້ມີຄໍາເຫັນສະຫຼຸມຕີລາຄາຄືນ ແລະຊີ້ນໍາຕໍ່ກອງປະຊຸມ ເຊິ່ງທ່ານໄດ້ສະແດງຄວາມຊົມເຊີຍຕໍ່ທຸກພາກສ່ວນຂອງແຂວງທີ່ໄດ້ມີຄໍາເຫັນເຮັດໃຫ້ກອງປະຊຸມຄັ້ງນີ້ ໄດ້ດຳເນີນດ້ວຍບັນຍາກາດທີ່ຟົດຟື້ນ, ສ້າງສັນ ແລະ ເຕັມໄປດ້ວຍເນື້ອໃນສຳຄັນ, ເລິກເຊິ່ງຫຼາຍດ້ານ ເຮັດໃຫ້ກອງປະຊຸມໄດ້ບັນລຸຜົນສຳເລັດຕາມຈຸດປະສົງທີ່ໄດ້ວາງໄວ້ຢ່າງຈົບງາມ; ເພື່ອສືບຕໍ່ປັບປຸງແກ້ໄຂວຽກງານດັ່ງກ່າວໃຫ້ ດີຂຶ້ນກວ່າເກົ່າ ທ່ານຮອງປະທານສະພາແຫ່ງຊາດ ໄດ້ສະເໜີເນັ້ນຕື່ມ 5 ບັນຫາໃຫ້ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ 15, ຄະນະປະຈຳສະພາປະຊາຊົນແຂວງ, ອົງການປົກຄອງແຂວງ ແລະພາກສ່ວນກ່ຽວຂ້ອງສືບຕໍ່ຈັດຕັ້ງປະຕິບັດດັ່ງນີ້:
1. ເອົາໃຈໃສ່ຊີ້ນໍາບັນດາຂະແໜງການ ແລະ ອົງການຂອງ ແຂວງ ເພີ່ມທະວີການໂຄສະນາ ເຜີຍແຜ່ ລັດຖະທຳມະນູນ ແລະ ບັນດາກົດໝາຍທີ່ໄດ້ປະກາດໃຊ້ ແລ້ວ ໃຫ້ມີຄວາມວ່ອງໄວ, ຕໍ່ເນື່ອງ, ທັນກຳນົດເວລາ, ກວ້າງຂວາງ ແລະ ເຂົ້າເຖິງທຸກເປົ້າໝາຍ ທັງພາກລັດ, ເອກະຊົນ ແລະ ປະຊາຊົນລາວບັນດາເຜົ່າ ດ້ວຍຫຼາຍຮູບການ, ຫຼາຍວິທີການ; ພິຈາ ລະນາຈັດສັນງົບປະມານ, ພາຫະນະ ສະໜອງໃຫ້ແກ່ການຈັດຕັ້ງປະຕິບັດວຽກງານດັ່ງກ່າວ ຕາມ ຄວາມສາມາດຕົວຈິງ;
2. ສືບຕໍ່ຊີ້ນໍາ ການຜັນຂະຫຍາຍ ຄໍາແນະນໍາ ຂອງຄະນະປະຈຳສະພາແຫ່ງຊາດ ສະບັບເລກທີ 01/ຄປຈ, ລົງວັນທີ 03 ມັງກອນ 2024 ວ່າດ້ວຍການສະຫຼຸບຕີລາຄາການໂຄສະນາເຜີຍແຜ່ກົດໝາຍ ຢູ່ແຂວງຈໍາປາສັກ ເພື່ອກະກຽມບົດລາຍງານຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃຫ້ ມີເນື້ອໃນຄົບຖ້ວນ ແລະ ທັນກັບກຳນົດເວລາ;
3. ສືບຕໍ່ຈັດຕັ້ງປະຕິບັດ ມະຕິຂອງຄະນະປະຈຳສະພາແຫ່ງຊາດ ສະບັບເລກທີ 29/ຄປຈ, ລົງວັນທີ 07 ກຸມພາ 2022 ແລະ ນິຕິກຳຂອງລັດຖະບານ ກ່ຽວກັບການ ໂຄສະນາ ເຜີຍແຜ່ ລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ຂອງສະພາແຫ່ງຊາດ ໃຫ້ ບັນລຸຕາມຈຸດປະສົງ ແລະ ລະດັບຄາດໝາຍທີ່ວາງໄວ້;
4. ເອົາໃຈໃສ່ຕິດຕາມກວດກາ ການຈັດຕັ້ງ ປະຕິ ບັດວຽກງານໂຄສະນາ ເຜີຍແຜ່ ລັດຖະທຳມະນູນ ແລະ ກົດໝາຍ ກໍຄືນິຕິກຳໃຕ້ກົດໝາຍ ລວມທັງນິຕິກຳໃຕ້ກົດໝາຍຂອງແຂວງ ໃຫ້ແທດເຖິງຕົວຈິງຕື່ມ ໂດຍສະເພາະນິຕິກຳທີ່ຕິດພັນກັບ ການອະນຸ ມັດບັນດາໂຄງການຕ່າງໆ ຊຶ່ງເຫັນວ່າຍັງມີຫຼາຍບັນຫາ, ຫຼາຍກິດຈະກຳ, ຫຼາຍໂຄງການ ໄດ້ມີນິຕິກຳຄົບຖ້ວນແລ້ວ ແຕ່ຍັງບໍ່ທັນນໍາລົງໄປເຜີຍແຜ່ ແນະນໍາໃຫ້ປະຊາຊົນ ຮັບຮູ້ເຂົ້າໃຈ, ຜູ້ລົງ ທຶນບໍ່ເອົາໃຈໃສ່ປະຕິບັດຢ່າງເຂັ້ມງວດ ແລະ ບາງໂຄງການແມ່ນບໍ່ລົງມືພັດທະນາຕາມສັນຍາ ແລະ ອື່ນໆ;
5. ສະເໜີໃຫ້ຄະນະພັກຂັ້ນຕ່າງໆ ເພີ່ມທະວີການນໍາພາ-ຊີ້ນໍາ ຕໍ່ການໂຄສະນາ ເຜີຍແຜ່ ລັດ ຖະທຳມະນູນ ແລະ ກົດໝາຍ ແລະ ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ໃຫ້ ເປັນຮູບປະທຳ ແລະ ເປັນຈິງເທື່ອລະກ້າວ.
ການມາເຄື່ອນໄຫວຂອງທ່ານຮອງປະທານສະພາແຫ່ງຊາດ ພ້ອມຄະນະ ໃນຄັ້ງນີ້, ຍັງໄດ້ມອບຄອມພິວເຕີຈໍານວນ 2 ເຄື່ອງໃຫ້ສະພາປະຊາຊົນແຂວງຈໍາປະສັກ ອີກດ້ວຍ.
(ພາບ ແລະ ຂ່າວ: ສົມວິຈິດ ໄຊມົນຕີ)