ໃນວັນທີ 15 ມັງກອນ 2024 ທ່ານຄໍາໃບ ດຳລັດ ກຳມະການສູນກາງພັກ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຊົມ ບັນດາກິດຈະກໍາ ໂຄງການພັດທະນາຊຸມຊົນຂອງບ້ານກະບູດ ເມືອງທ່າແຂກ ແຂວງຄໍາມ່ວນ ທີ່ນອນໃນໂຄງການພັດທະນາ ແລະ ແກ້ໄຂຄວາມທຸກຍາກ  ຂອງບໍລິສັດຊີໂນ-ອາກຣີໂປຕາສ ຈໍາກັດ. ໂດຍມີ ພະນັກງານຂະແໜງການທີ່ກ່ຽວຂ້ອງຂອງບໍລິສັດ ແລະ ຕະຫຼອດຮອດການຈັດຕັ້ງບ້ານດັ່ງກ່າວໃຫ້ການຕ້ອນຮັບ.

ໂດຍໂຄງການພັດທະນາ ແລະ ປັບປຸງແກ້ໄຂຄວາມທຸກຍາກຂອງປະຊາຊົນບ້ານກະບູດ – ຊຽງແຫວນ ເມືອງທ່າແຂກ ທີ່ໄດ້ຮັບການຊ່ວຍເຫຼືອຈາກ ບໍລິສັດ ຊິໂນອາກຣີ ໂປຕາສ ຈໍາກັດ, ໃນໄລຍະ 1 ປີ ບໍລິສັດໄດ້ດໍາເນີນກິດຈະການເພື່ອການພັດທະນາ ລວມມີທັງໝົດ 10 ໂຄງການ, ທີ່ພົ້ນເດັ່ນແມ່ນໄດ້ປະຕິບັດສໍາເລັດ ໂຄງການກໍ່ສ້າງຂົວຂ້າມຫ້ວຍນໍ້າຊຽງລົງ ເປັນຂົວເບຕົງເສີມເຫລັກທີ່ມີຄວາມຍາວ 45 ແມັດ ແລະ ໂຄງການກໍ່ສ້າງໂຮງຮຽນປະຖົມຫຼັງໃໝ່ ເປັນອາຄານຖາວອນຊັ້ນດຽວປະກອບມີທັງໝົດ 6 ຫ້ອງ, ໃນນັ້ນມີຫ້ອງຮຽນແຕ່ ປ1 ຮອດ ປ 5 ແລະ ສາມາດຮອງຮັບນັກຮຽນໄດ້ 120 ຄົນ, ຄຽງຄູ່ກັນນັ້ນກໍ່ຄືໂຄງການປູກຜັກໃນເຮືອນຮົ່ມ ເພື່ອຊຸກຍູ້ສົ່ງເສີມອາຊີບໃຫ້ພໍ່ແມ່ປະຊາຊົນ ຜູ້ທີ່ຫວ່າງງານ, ໂດຍສະເພາະແມ່ນຄອບຄົວທີ່ທຸກຍາກ ໄດ້ມີວຽກເຮັດງານທໍາ ເພື່ອສ້າງລາຍຮັບໃຫ້ແກ່ການພັດທະນາຊີວິດການເປັນຢູ່ ແລະ ການເຮັດສວນປູກຜັກກາງແຈ້ງ ໂດຍແມ່ນປະຊາຊົນເປັນຜູ້ປູກເອງ ແລະ ນໍາຜົນຜະລິດທີ່ໄດ້ມາຂາຍໃຫ້ບໍລິສັດ,

ຈາກນັ້ນ, ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ເຄື່ອນໄຫວຢ້ຽມຊົມ ສູນວັດທະນະທໍາຊົນເຜົ່າມະກອງ ໂດຍສະເພາະແມ່ນ ການວາງສະແດງຮູບພາບ – ຂໍ້ມູນ ກ່ຽວກັບປະຫວັດຄວາມເປັນມາຂອງບ້ານ ແລະ ວິຖີຊີວິດເຜົ່າມະກອງໃນອະດີດ, ເຊິ່ງປະກອບມີຫ້ອງວາງສະແດງ ເຄື່ອງມືທໍາການຜະລິດກະສິກໍາ, ເຄື່ອງຫັດຖະກໍາຈັກສານ ແລະເຄື່ອງອຸປະກອນນໍາໃຊ້ເຂົ້າໃນການທໍາມາຫາກິນ, ຫ້ອງວາງສະແດງດົນຕີພື້ນເມືອງ ແລະສູນບໍລິການສຸຂະພາບ ເພື່ອຮັບໃຊ້ໃຫ້ແກ່ປະຊາຊົນ. ນອກນັ້ນ ຍັງມີສະຖານທີ່ສໍາລັບຈັດງານສະແດງແລກປ່ຽນສິລະປະວັດທະນະທໍາ,ຈັດກິດຈະກໍາອອກກໍາລັງກາຍ ແລະ ຕະຫຼາດກະສິກໍາຊຸມຊົນ.

ໂອກາດນີ້ ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ຍັງໄດ້ສະແດງຄວາມຍ້ອງຍໍຊົມເຊີຍ ມາຍັງຄະນະຮັບຜິດຊອບ, ພ້ອມທັງມີຄໍາເຫັນ ໃຫ້ພາກສ່ວນບໍລິສັດ ແລະ ບ້ານ ຈົ່ງໄດ້ຮ່ວມແຮງຮ່ວມໃຈ ສາມັກຄີສືບຕໍ່ເສີມຂະຫຍາຍ ບັນດາກິດຈະກໍາຂອງໂຄງການພັດທະນາ ແລະ ແກ້ໄຂຄວາມທຸກຍາກ ບ້ານ ກະບູດ-ຊຽງແຫວນ ໃຫ້ນັບມື້ໄດ້ຮັບການພັດທະນາຢ່າງຕໍ່ເນື່ອງຍືນຍົງ ແລະ ທ່ານຍັງໄດ້ເໜັ້ນໜັກໃຫ້ອຳນາດການປົກຄອງພາຍໃນບ້ານຈົ່ງຮັກມູນເຊື່ອວັດທະນະທຳຊົນເຜົ່າ, ພ້ອມທັງເພີ່ມທະວີຄວາມສາມັກຄີໃຫ້ໜັກແໜ້ນ ເປັນແບບຢ່າງໃນການພັດທະນາບ້ານ ເອົາໃຈ ໃສ່ສຶກສາອົບຮົມພໍ່ແມ່ປະຊາຊົນໃຫ້ເຊື່ອມຊືມເຂົ້າໃຈແຈ້ງ ແລະ ກຳແໜ້ນຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ,  ແລະ ບັນດານິຕິກຳຕ່າງໆໃຫ້ເລິກເຊິ່ງ, ຊຸກຍູ້ສົ່ງເສີມໃຫ້ລູກຫຼານໄດ້ເຂົ້າສຶກສາຮ່ຳຮຽນຢ່າງເປັນປົກກະຕິ,  ເພີ່ມທະວີເອົາໃຈໃສ່ຕໍ່ວຽກງານ ປກຊ – ປກສ ໃນທົ່ວບ້ານໃຫ້ຮັບ ປະກັນຄວາມສະຫງົບ ມີຄວາມເປັນລະບຽບຮຽບຮ້ອຍດີຂຶ້ນກວ່າເກົ່າເພື່ອເຮັດໃຫ້ຄອບຄົວ ແລະ ບ້ານມີຄວາມສະຫງົບປອດໄພ.

ໂດຍ: ເອື້ອ ມະໂນສິງ