ໃນວັນທີ 12 ກັນຍາ 2024 ທີ່ຜ່ານມາ ທ່ານ ຄໍາໃບ ດໍາລັດ ກໍາມະການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ລົງເຄ່ືອນໄຫວຕິດຕາມກວດກາການຈັດຕັ້ງປະຕິບັດຍຸດທະສາດ ການປະຕິຮູບລະບົບການສຶກສາ ແລະພັດທະນາຊັບພະຍາກອນມະນຸດແຫ່ງຊາດ ໃນໄລຍະຜ່ານມາ ຢູ່ແຂວງຈໍາປາສັກ ໂດຍການຕ້ອນຮັບຂອງ ທ່ານ ສາຍທອງ ໄຊຍະວົງ ເຮອງເລຂາພັກແຂວງ, ປະທານສະພາປະຊາຊົນແຂວງຈໍາປາສັກ, ພ້ອມດ້ວຍບັນດາທ່ານໃນຄະນະປະຈໍາສະພາປະຊາຊົນແຂວງ, ຕາງໜ້າພະແນກການ-ກົມກອງໃນຂົງເຂດວັດທະນະທໍາ-ສັງຄົມ, ອົງການຈັດຕັ້ງມະຫາຊົນ ແລະ ວິຊາກການທີ່ກ່ຽວຂ້ອງຂອງແຂວງຈໍາປາສັກ.

ຈຸດປະສົງການລົງເຄື່ອນໄຫວຂອງ ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ພ້ອມດ້ວຍຄະນະ ໃນຄັ້ງນີ້, ກໍ່ເພື່ອຕິດຕາມກວດກາການຈັດຕັ້ງປະຕິບັດຍຸດທະສາດການປະຕິຮູບການສຶກສາ ແລະ ການພັດທະນາຊັບພະຍາກອນມະນຸດ ແຫ່ງຊາດ ໄລຍະຜ່ານມາ ຕິດພັນກັບການເກັບກໍາຂໍ້ມູນສະພາບການລວມຂອງທ້ອງຖິ່ນກະກຽມໃຫ້ແກ່ການດໍາເນີນກອງປະຊຸມສະໄໝສາມັນເທື່ອທີ 8 ຂອງ ສະພາແຫ່ງຊາດຊຸດທີ IX ທີ່ຈະມາເຖິງ. ໂດຍການເຄື່ອນໄຫວຂອງທ່ານຮອງປະທານສະພາແຫ່ງຊາດ ໄດ້ເປີດກອງປະຊຸມເຮັດວຽກງານກັບບັນດາພະແນນກການ-ກົມກອງໃນຂົງເຂດວັດທະນະທໍາ-ສັງຄົມຂອງແຂວງຈໍາປາສັກ, ວາລະດໍາເນີນກອງປະຊຸມ ທ່ານ ສາຍທອງ ໄຊຍະວົງ ປະທານສວະພາປະຊາຊົນແຂວງ ຕາງໜ້າໃຫ້ຄະນະນໍາຂອງແຂວງຈໍາຮປາສັກ ໄດ້ມີຄໍາເຫັນກ່າວຕ້ອນຮັບຄະນະຂອງທ່ານຮອງປະທານສະພາແຫ່ງຊາດ ພ້ອມຄະນະ ທີ່ເດີນທາງມາເຄື່ອນໄຫວເຮັດວຽກຢູ່ແຂວງຈໍາປາສັກ. ຈາກນັ້ນ, ກອງປະຊຸມໄດ້ຮັບຟັງການລາຍງານຈາກຕາງໜ້າພະແນກສຶກສາທິການ ແລະ ກິລາ, ພະແນກແຮງງານສະຫວັດດີການ-ສັງຄົມ, ພະແນກພາຍໃນ ແລະ ຫຼາຍພາກສ່ວນ ຕາມການເຈາະຈີ້ມຂອງປະທານກອງຊຸມ ເຊິ່ງບັນດາພະແນກການໄດ້ຍົກໃຫ້ເຫັນສະພາບການລວມ, ຂໍສະດວກ, ຂໍ້ຫຍຸ້ງຍາກ, ແລະ ບັນຫາຂໍ້ຄົງຄ້າງບາງດ້ານຂອງການການຈັດຕັ້ງປະຕິບັດຍຸດທະສາດການປະຕິຮູບການສຶກສາ ແລະ ການພັດທະນາຊັບພະຍາກອນມະນຸດ ແຫ່ງຊາດ ໄລຍະຜ່ານມາຢູ່ແຂວງຈໍາປາສັກ ພ້ອມທັງສະເໜີວິທີແກ້ໄຂບັນຫາຂໍ້ຄົງຄ້າງທີ່ຖອດຖອນໄດ້ຈາກການຈັດຕັ້ງປະຕິບັດວຽກງານໃນໄລຍະຜ່ານມາ ເພື່ອໃຫ້ຂັ້ນເທິງຊ່ວຍພິຈາລະນາ ແລະ ຊຸກຍູ້ໃຫ້ພາກສ່ວນກ່ຽວຂ້ອງປັບປຸງແກ້ໄຂ. ເຊິ່ງກອງປະຊຸມຍັງໄດ້ມີການປະກອບຄໍາຄິດເຫັນແລກປ່ຽນບົດຮຽນ

ໃນຕອນທ້າຍຂອງກອງປະຊຸມ, ທ່ານ ຄໍາໃບ ດໍາລັດ ກໍາມະການສູນກາງພັກ ຮອງປະທານສະພາແຫ່ງຊາດ ໄດ້ສະຫຼຸບຕີລາຄາຄືນຕໍ່ກັບການລາຍງານ ແລະ ການປະກອບຄໍາຄິດເຫັນຂອງບັນດາທ່ານຜູ້ແທນທີ່ເຂົ້າຮ່ວມກອງປະຊຸມ ແລະສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດທີ່ຍາດໄດ້ ພ້ອມທັງເນັ້ນໃຫ້ທຸກພາກຂອງແຂວງຈໍາປາສັກ ເອົາໃຈໃສ່ 4 ວຽກງານແກ້ໄຂບັນຫາການສຶກສາ ຄື: ມອບໃຫ້ຄະນະປະຈໍາພັກແຂວງ ຄົ້ນຄວ້າແບ່ງຄວາມຮັບຜິດຊອບຢ່າງຊັດເຈນພາຍໃນຄະນະປະຈໍາພັກແຂວງ ຊີ້ນໍາຄະນະປະຈໍາພັກເມືອງ ລົງເລິກວຽກງານສຶກສາ ຕິດພັນກັບການສ້າງຂະບວນການ ກະກຽມກອງປະຊຸມໃຫຍ່ 3 ຂັ້ນຂອງພັກ; ເອົາໃຈໃສ່ຄົ້ນຄວ້າຍົກສູງຄຸນນະພາບການຮຽນ-ການສອນ ຂອງຄູ-ອາຈານ ຊັ້ນປະຖົມ, ມັດທະຍົມໃຫ້ດີຂຶ້ນ; 3.ກວດຄືນລະບົບການຈັດຕັ້ງຢູ່ຂັ້ນຮາກຖານ ແລະ ຄົ້ນຄວ້າປະຕິບັດນະໂຍບາຍໃຫ້ແກ່ນັກຮຽນວິຊາຊີບ, ນັກຮຽນຊົນເຜົ່າ ແລະ ສ້າງສິ່ງອໍານວຍຄວາມສະດວກໃຫ້ແກ່ນັກຮຽນມາຈາກບ່ອນຮ່າງໄກສອດຫຼີກ; ປຸກລະດົມຂົນຂວຍໃຫ້ທຸກພາກສ່ວນຂອງສັງຄົມ ໂດຍສະເພາະພາກສ່ວນທຸລະກິດ ໃຫ້ມີສ່ວນຮ່ວມໃນການປະກອບສ່ວນຊ່ວຍເຫຼືອກຳລັງແຮງໃນທຸກດ້ານ ເພື່ອພັດທະນາພື້ນຖານໂຄງລ່າງຂອງວຽກງານການສຶກສາໃຫ້ມີຄວາມເຂັ້ມແຂງຍິ່ງໆຂື້ນ.