(ສພຊ) ໃນລະຫວ່າງວັນທີ 30 ສິງຫາ-1 ກັນຍາ 2023 ທີ່ຫ້ອງປະຊຸມໃຫຍ່ແຂວງຫຼວງພະບາງ ທ່ານ ພົນໂທ ສຸວອນ ເລືອງບຸນມີ ຮອງປະທານຄະນະປະຈໍາສະພາແຫ່ງຊາດ ໄດ້ຕາງໜ້າຄະນະປະຈຳສະພາແຫ່ງຊາດ ເຂົ້າຮ່ວມ ແລະ ມີຄຳເຫັນຕໍ່ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງຫຼວງພະບາງ ຊຸດທີ II ໂດຍການເປັນປະທານຂອງທ່ານ ວົງສະຫວັນ ເທບພະຈັນ ປະທານສະພາປະຊາຊົນແຂວງຫຼວງພະບາງ, ເຂົ້າຮ່ວມມີທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ບັນດາທ່ານຄະນະປະຈໍາພັກແຂວງ, ກໍາມະການພັກແຂວງ, ອະດີດການນໍາຂອງແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 6, ສະມາຊິກສະພາປະຊາຊົນແຂວງ ແລະ ແຂກທີ່ຖືກເຊີນເຂົ້າຮ່ວມ.

ໃນໂອກາດດັ່ງກ່າວ ທ່ານ ພົນໂທ ສຸວອນ ເລືອງບຸນມີ ໄດ້ຕາງໜ້າຄະນະປະຈຳສະພາແຫ່ງຊາດ ປະກອບຄຳຄິດຄຳເຫັນຕໍ່ກອງປະຊຸມ ເຊິ່ງມີເນື້ອໃນບາງຕອນສຳຄັນວ່າ: ສະພາປະຊາຊົນແຂວງ ຊຸດທີ II ເຄື່ອນໄຫວມາເຖິງປັດຈຸບັນ ມີອາຍຸໄດ້ 2 ປີເຄິ່ງ ເຊິ່ງຕະຫຼອດໄລຍະຜ່ານມານັ້ນ ສະພາປະຊາຊົນແຂວງ ໃນຖານະທີ່ເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ, ເປັນອົງການອໍານາດລັດຂັ້ນທ້ອງຖິ່ນ ໄດ້ປະຕິບັດພາລະບົດບາດ, ສິດ ແລະ ໜ້າທີ່ຂອງຕົນຕາມກົດໝາຍກຳນົດ ໄດ້ມີຜົນສຳເລັດຕາມລະດັບຄາດໝາຍທີ່ວາງໄວ້, ຜົນສຳເລັດນັ້ນ ແມ່ນການປະກອບສ່ວນຂອງທຸກພາກສ່ວນ.

ໂດຍປະຕິບັດຕາມມາດຕາ 60 ຂອງກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສະບັບປີ 2020, ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນຂັ້ນແຂວງ ຊຸດທີ II ໄດ້ເປີດຂຶ້ນຢ່າງເປັນທາງການ ແລະ ເນື້ອໃນຕ່າງໆ ກໍໄດ້ກໍານົດໃນບົດຄໍາເຫັນກ່າວໄຂກອງປະຊຸມຂອງປະທານສະພາປະຊາຊົນແຂວງ ກໍຄືໃນວາລະກອງປະຊຸມແລ້ວ; ເນື້ອແທ້ຂອງກອງປະຊຸມສະພາປະຊາຊົນແຂວງ ແມ່ນການເສີມຂະຫຍາຍສິດປະຊາທິປະໄຕ, ເຊີດຊູບົດບາດ ຂອງສະພາປະຊາຊົນຂັ້ນແຂວງ, ສະມາຊິກສະພາປະຊາຊົນແຂວງ ແລະ ຄວາມຮັບຜິດຊອບການເມືອງໃນການມີສ່ວນຮ່ວມພິຈາລະນາ, ຕົກລົງ ແລະ ຮັບຮອງເອົາບັນຫາສຳຄັນທີ່ເປັນພື້ນຖານຂອງແຂວງ ໃນຖານະທີ່ເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າຂັ້ນແຂວງ ທັງເປັນການຊ່ວຍທ້ອງຖິ່ນໃນການປັບປຸງຢ່າງຮອບດ້ານ ເພື່ອຮັບປະກັນໃຫ້ການພັດທະນາເສດຖະກິດ-ສັງຄົມ, ແຜນງົບປະມານ, ວຽກງານອົງການຍຸຕິທຳ ແລະ ວຽກງານອື່ນ ຂອງທ້ອງຖິ່ນ ຖືກຈັດຕັ້ງປະຕິບັດໄປຖືກທິດ ແລະ ບັນລຸຕາມລະດັບຄາດໝາຍທີ່ຄະນະພັກ, ອົງການປົກຄອງແຂວງວາງໄວ້. ນອກຈາກເນື້ອໃນຕາມກົດໝາຍກໍານົດແລ້ວ ກອງປະຊຸມເທື່ອນີ້ ຈະໄດ້ຈັດຕັ້ງການປະເມີນຄວາມໄວ້ວາງໃຈ ຕໍ່ການປະຕິບັດໜ້າທີ່ ຂອງບຸກຄະລາກອນດຳລົງຕຳແໜ່ງທີ່ສະພາປະຊາຊົນແຂວງ ເລືອກຕັ້ງ ແລະ ຮັບຮອງເອົາການແຕ່ງຕັ້ງ.

ການປະເມີນ ຕໍ່ການປະຕິບັດໜ້າທີ່ຂອງບຸກຄະລາກອນທີ່ສະພາປະຊາຊົນແຂວງ ເລືອກຕັ້ງ ແລະ ຮັບຮອງເອົາການແຕ່ງຕັ້ງ ແມ່ນເພື່ອຕີລາຄາການຈັດຕັ້ງປະຕິບັດສິດ ແລະ ໜ້າທີ່ ຂອງບຸກຄະລາກອນດັ່ງກ່າວ, ສະນັ້ນ, ເພື່ອຮັບປະກັນເຮັດໃຫ້ການປະເມີນ ມີຄຸນນະພາບ, ສະເໜີໃຫ້ຄະນະປະຈຳສະພາປະຊາຊົນແຂວງ ຈົ່ງໄດ້ເອົາໃຈໃສ່ກະກຽມໃຫ້ລະອຽດ, ສະມາຊິກສະພາປະຊາຊົນແຂວງ ຕ້ອງຍົກສູງຄວາມຮັບຜິດຊອບ, ປະເມີນຢ່າງພາວະວິໄສ, ຍຸຕິທຳ, ບໍ່ອັກຄະຕິ ແລະ ຕາມນິຕິກຳກ່ຽວຂ້ອງຢ່າງເຂັ້ມງວດ ທັງນີ້, ກໍເພື່ອເປັນການເສີມຂະຫຍາຍພາລະບົດບາດ, ຄວາມຮັບຜິດຊອບໃນການຕິດຕາມກວດກາ ຂອງສະພາປະຊາຊົນແຂວງ ແລະ ສະມາຊິກສະພາປະຊາຊົນແຂວງ ຕໍ່ການປະຕິບັດໜ້າທີ່ ຂອງບຸກຄະລາກອນດັ່ງກ່າວ ແນໃສ່ຊອກໃຫ້ເຫັນຈຸດດີ, ຂໍ້ຄົງຄ້າງ ພ້ອມທັງມີມາດຕະການປັບປຸງແກ້ໄຂຕົນເອງໃນຕໍ່ໜ້າ, ປະກອບສ່ວນເຂົ້າໃນການພັດທະນາບຸກຄະລາກອນຫຼັກແຫຼ່ງທີ່ເປັນການນຳຂອງອົງການລັດ ໃຫ້ມີຄວາມຮັບຜິດຊອບສູງຂຶ້ນກວ່າເກົ່າ ຕໍ່ໜ້າທີ່ວຽກງານທີ່ຖືກມອບໝາຍ.

ເພື່ອຮັບປະກັນເຮັດໃຫ້ການດຳເນີນກອງປະຊຸມຄັ້ງນີ້ ກໍຄືການປະຕິບັດວຽກງານຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ມີຜົນສຳເລັດຕາມຄາດໝາຍທີ່ວາງໄວ້ ນອກຈາກນີ້, ທ່ານຍັງສະເໜີໃຫ້ຄະນະພັກ, ອົງການປົກຄອງແຂວງ ແລະ ອົງການຈັດຕັ້ງທຸກພາກສ່ວນ ຈົ່ງເພີ່ມທະວີຄວາມເອົາໃຈໃສ່ຊີ້ນຳ, ໃຫ້ການຊ່ວຍເຫຼືອ, ສະໜອງຂໍ້ມູນອັນເປັນປະໂຫຍດ ແລະ ໃຫ້ການຮ່ວມມືກັບສະພາແຫ່ງຊາດ, ສະພາປະຊາຊົນແຂວງ ເພື່ອຈັດຕັ້ງປະຕິບັດວຽກງານທີ່ພັກ, ລັດ ແລະ ປະຊາຊົນ ມອບໝາຍໃຫ້ມີຜົນສຳເລັດ ແລະ ມີປະສິດທິພາບ ປະສິດທິຜົນ.