ຕອນບ່າຍຂອງວັນທີ 11 ກັນຍາ 2024 ທີ່ຜານມາ, ທ່ານ ຄໍາໃບ ດໍາລັດ ກໍາມະການສູນກາງພັກ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຂົ້າພົບທ່ານ ປອ ດາວວົງ ພອນແກ້ວ ເລຂາພັກແຂວງ ເຈົ້າແຂວງສາລະວັນ ຢູ່ທີ່ຫ້ອງຮັບແຂກງາຊ້າງ ສະໂມສອນແຂວງສາລະວັນ; ເຂົ້າຮ່ວມມີທ່ານ ຂັນໄຊ ລັດຖະເຮົ້າ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງ; ມີທ່ານປະທານຄະນະກໍາມະການ, ວັນທະນະທໍາ-ສັງຄົມ ແລະ ບັນດາເຜົ່າ, ພ້ອມດ້ວຍຄະນະເລຂາທິການ ສະພາປະຊາຊົນແຂວງ ເຂົ້າຮ່ວມຄັ້ງນີ້;

ທ່ານ ຄໍາໃບ ດໍາລັດ ກໍາມະການສູນກາງພັກ ຮອງປະທານສະພາແຫ່ງຊາດ ໄດ້ສະເໜີວ່າ: ຈຸດປະສົງຂອງການມາເຄື່ອນໄຫວວຽກຢູ່ທີ່ແຂວງສາລະວັນ ໂດຍປະຕິບັດຕາມແຜນການກະກຽມໃຫ້ແກ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ແລະ ປະຕິບັດຕາມມະຕິຕົກລົງ ຂອງຄະນະປະຈໍາສະພາແຫ່ງຊາດ ວ່າດ້ວຍ ການຕິດຕາມກວດກາ ການຈັດຕັ້ງປະຕິບັດຍຸດທະສາດການປະຕິຮູບການສຶກສາ ແລະ ການພັດທະນາຊັບພະຍາກອນມະນຸດ ແຫ່ງຊາດໃນໄລຍະທີ່ຜາ່ນມາ, ອີງໃສ່ສະພາບການແຜ່ລະບາດຂອງເຊື້ອພະຍາດໂຄວິດ 19 ເຮັດໃຫ້ການຮໍ່າຮຽນບໍ່ເປັນລະບົບ ມີການປະລະການຮຽນໃນຊັ້ນປະຖົມເປັນຈໍານວນຫຼວງຫຼາຍໃນທົ່ວປະເທດ ເຊິ່ງຕ້ອງໄດ້ຮີບຮ້ອນເລັ່ງປັບປຸງແກ້ໄຂໂດຍໄວ ສະນັ້ນ, ຈຶ່ງຕ້ອງໄດ້ເປີດກອງປະຊຸມຮ່ວມກັບບັນດາພະແນກການທີ່ກ່ຽວຂ້ອງຂອງແຂວງສາລະວັນ ເພື່ອຮັບຟັງການລາຍງານ ສະພາບຂໍ້ສະດວກ, ຂໍ້ຫຍຸ້ງຍາກ ການຈັດຕັ້ງປະຕິບັດຍຸດທະສາດການປະຕິຮູບການສຶກສາ ແລະ ການພັດທະນາຊັບພະຍາກອນມະນຸດ ແຫ່ງຊາດໃນໄລຍະທີ່ຜາ່ນມາຂອງແຂວງ;

ຈາກນັ້ນ, ທ່ານ ປອ ດາວວົງ ພອນແກ້ວ ເລຂາພັກແຂວງ ເຈົ້າແຂວງສາລະວັນ ໄດ້ກ່າວຕ້ອນຮັບ ກ່ອນອື່ນທ່ານໄດ້ສະແດງຄວາມຍິນດີທີ່ໄດ້ຕ້ອນຮັບຄະນະຂັ້ນສູງ ຈາກສະພາແຫ່ງຊາດ ພ້ອມດ້ວຍຄະນະ ທີ່ໄດ້ເດີນທາງມາເຄື່ອນໄຫວເຮັດວຽກລົງເລິກວຽກງານສຶກສາຢູ່ທີ່ແຂວງສາລະວັນ ໃນຄັ້ງນີ້, ຈາກນັ້ນ, ທ່ານເຈົ້າແຂວງ ໄດ້ລາຍງານໃຫ້ຊາບໂດຍຫຍໍ້ ກ່ຽວກັບສະພາບລວມການສຶກສາ, ສາເຫດການປະລະການຮຽນ ແລະ ຄຸນນະພາບຂອງການສຶກສາຂອງນັກຮຽນ ທີ່ເກີດຂຶ້ນພາຍໃນແຂວງ ໄລໃນໄລຍະຜ່ານມາ ໃຫ້ທ່ານຮອງປະທານສະພາແຫ່ງຊາດໄດ້ຮັບຊາບ.

ພາບ-ຂ່າວ: ດີລໍາພົນ ພົມມະຈັນ