(ສພຊ) ໃນໂອກາດທີ່ເຄື່ອນໄຫວ ແລະ ເຮັດວຽກຢູ່ທີ່ແຂວງເຊກອງ ໃນລະຫວ່າງວັນທີ 31 ສິງຫາ ຫາວັນທີ 1 ກັນຍາ 2023, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ເຂົ້າຮ່ວມ ແລະ ເປັນປະທານກອງປະຊຸມປະເມີນການຈັດຕັ້ງປະຕິບັດ 4 ກົດໝາຍ ໃນຂົງເຂດສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເຊິ່ງກ່ອນດຳເນີນກອງປະຊຸມ ທ່ານ ຮອງປະທານສະພາແຫ່ງຊາດ ໄດ້ຮັບຟັງຈາກທ່ານ ຂັນຕິ ສີລະວົງ ກຳມະການຄະນະປະຈຳພັກແຂວງ, ຮອງເຈົ້າແຂວງເຊກອງ ກ່ຽວກັບສະພາບການພັດທະນາເສດຖະກິດ-ສັງຄົມຂອງແຂວງເຊກອງ ແລະ ຮັບຟັງການລາຍງານຈາກທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງເຊກອງ ກ່ຽວກັບຜົນສຳເລັດການດຳເນີນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງເຊກອງ.

ນອກນັ້ນ, ທ່ານ ຮອງປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ໄປຢ້ຽມຢາມຟາມປັນຍາຄູນ ເຊິ່ງເປັນຟາມຕົວແບບຂອງເມືອງລະມາມ ແຂວງເຊກອງ ທີ່ສາມາດສະໜອງຜົນຜະລິດໄກ່, ໄຂ່, ໝູໃຫ້ຕະຫຼາດພາຍໃນ ຢ່າງພຽງພໍ ແລະ ສາມາດສະໜອງໃຫ້ຕ່າງແຂວງໄດ້ອີກ.

ໃນໄລຍະຢ້ຽມຢາມແຂວງເຊກອງ, ທ່ານ ຮອງປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ເຄື່ອນໄຫວຢ້ຽມຢາມໂຄງການພະລັງງານລົມ, ໂຄງການເຂື່ອນໄຟຟ້າ ເຊຂະໝານ 3 ແລະ ດ່ານສາກົນດາກຕະອອກ ເມືອງດາກຈຶງ ແຂວງເຊກອງ ເພື່ອຮັບຟັງການຈັດຕັ້ງປະຕິບັດວຽກງານຕ່າງໆ ແລະ ຄວາມຄືບໜ້າຂອງບັນດາໂຄງການດັ່ງກ່າວ.

ໂອກາດດຽວກັນນີ້, ທ່ານ ປອ. ນາງ ສູນທອນ ໄຊຍະຈັກ ຍັງໄດ້ນຳເອົາເຂົ້າສານໜຽວ ຈຳນວນ 1 ໂຕນ ແລະ ອຸປະກອນການຮຽນຈຳນວນໜຶ່ງ ມູນຄ່າປະມານ 16 ລ້ານກີບ ເພື່ອມອບໃຫ້ປະຊາຊົນ ແລະ ນັກຮຽນທີ່ຍັງຂາດເຂີນຢູ່ບັນດາເມືອງຂອງແຂວງເຊກອງ ໂດຍຕາງໜ້າຮັບແມ່ນທ່ານ ເຫຼັກໄຫຼ ສີວິໄລ ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ ໂດຍມີບັນດາທ່ານການນຳຂອງແຂວງ, ສະມາຊິກສະພາແຫ່ງຊາດ, ສະພາປະຊາຊົນແຂວງ ແລະ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

(ພາບ ແລະ ຂ່າວ: ນາງ ປາກາລັກ ພົມມີໄຊ)