(ສພຊ) – ວັນເສົາທີ 19 ຕຸລານີ້ ທີ່ຫໍປະຊຸມແຫ່ງຊາດ, ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ໄດ້ ພົບປະກັບທ່ານ ຮາຄັອບ ອາຊາກຢານ (Hakob Arshakyan) ຮອງປະທານສະພາແຫ່ງຊາດ ແຫ່ງ ສາທາລະນະລັດ ອາກເມນີ ພ້ອມດ້ວຍຄະນະ ໃນໂອກາດທີ່ມາເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 (AIPA-45).

ໃນການພົບປະ, ສອງຝ່າຍໄດ້ພ້ອມກັນຕີລາຄາຄືນການພົວພັນ ແລະ ຮ່ວມມືທີ່ດີນໍາກັນລະຫວ່າງສະພາແຫ່ງຊາດລາວ ແລະ ອາກເມນີ ເຖິງວ່າຍັງບໍ່ມີການພົວພັນກັນຫຼາຍ ແຕ່ສອງຝ່າຍກໍໄດ້ມີໂອກາດພົບປະເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ; ມີການແລກປ່ຽນສານຊົມເຊີຍ, ສານອວຍພອນ ໃນໂອກາດວັນສຳຄັນຕ່າງໆ ຂອງ 2 ປະເທດ. ໃນໄລຍະຜ່ານມາ, ສອງອົງການນິຕິບັນຍັດ ຍັງບໍ່ທັນມີການແລກປ່ຽນຄະນະຜູ້ແທນນໍາກັນເທື່ອ, ຈຶ່ງສະເໜີສອງສະພາແຫ່ງຊາດ ຊຸກຍູ້ໃຫ້ມີການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ, ຂັ້ນກຳມາທິການ ແລະ ຄະນະມິດຕະພາບລັດຖະສະພາຂອງສອງປະເທດ ໃຫ້ເປັນປົກກະຕິນໍາກັນ; ຊຸກຍູ້ ແລະ ສົ່ງເສີມໃຫ້ລັດຖະບານຂອງສອງປະເທດ ເອົາໃຈໃສ່ໃນການຈັດຕັ້ງປະຕິບັດການຕົກລົງເຫັນດີນໍາກັນໃຫ້ມີປະສິດທິຜົນດີຂຶ້ນກວ່າເກົ່າ; ສືບຕໍ່ຮ່ວມມື, ຊ່ວຍເຫຼືອ ແລະ ສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ.

ສປປລາວ ແລະ ສ.ອາກເມນີ ໄດ້ສ້າງຕັ້ງສາຍພົວພັນການທູດນໍາກັນໃນວັນທີ 21 ເມສາ 1998.

(ນາງ ອາລິນ ສຸພິມມະປະດິດ)