(ສພຊ) ໂດຍຕອບສະໜອງຕາມຄໍາເຊີນຂອງສະຫາຍ ເຈິນ ແທ໋ງ ເໜິ້ນ ກໍາມະການກົມການເມືອງສູນກາງພັກ, ຮອງປະທານສະພາແຫ່ງຊາດ ແຫ່ງ ສສ.ຫວຽດນາມ, ປະທານຄະນະມິດຕະພາບລັດຖະສະພາຫວຽດນາມ-ລາວ, ໃນລະຫວ່າງວັນທີ 19-22 ກໍລະກົດ 2022, ສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ, ປະທານຄະນະມິດຕະພາບລັດຖະສະພາລາວ-ຫວຽດນາມ ພ້ອມດ້ວຍຄະນະຜູ້ແທນຂັ້ນສູງຂອງສະພາແຫ່ງຊາດລາວ ໄດ້ເດີນທາງຢ້ຽມຢາມ ສສ.ຫວຽດນາມ ຢ່າງເປັນທາງການ. ການຢ້ຽມຢາມໃນຄັ້ງນີ້ ມີຂຶ້ນໃນບັນຍາກາດ ສອງພັກ, ສອງລັດ ແລະ ປະຊາຊົນສອງຊາດ ພວມມີການສະເຫລີມສະຫລອງປີສາມັກຄີມິດຄະພາບ ລາວ-ຫວຽດນາມ-ລາວ ຄື: ວັນຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ແລະ 45 ປີ ວັນເຊັນສັນຍາມິດຕະພາບ ແລະ ການຮ່ວມມື.
ໃນວັນທີ 19 ກໍລະກົດ 2022 ສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ, ປະທານຄະນະມິດຕະພາບ ລັດຖະສະພາລາວ-ຫວຽດນາມ ພ້ອມດ້ວຍຄະນະ ໄດ້ພົບປະສອງຝ່າຍກັບຄະນະນໍາ ຂອງສະພາແຫ່ງຊາດ ແຫ່ງ ສສ.ຫວຽດນາມ ເຊິ່ງນໍາໂດຍສະຫາຍ ເຈິນ ແທ໋ງ ເໜີ້ນ ກໍາມະການກົມການເມືອງສູນກາງພັກ, ຮອງປະທານສະພາແຫ່ງຊາດ ຜູ້ປະຈໍາການ, ປະທານຄະນະມິດຕະພາບລັດຖະສະພາຫວຽດນາມ-ລາວ. ການພົບປະໃນຄັ້ງນີ້ ເຕັມໄປດ້ວຍບັນຍາກາດແຫ່ງໄມຕີຈິດ ສະໜິດສະໜົມ ຖານອ້າຍນ້ອງ ເຊິ່ງທັງສອງຝ່າຍໄດ້ແຈ້ງໃຫ້ກັນຊາບສະພາບການພົ້ນເດັ່ນຂອງທັງສອງປະເທດ, ຕີລາຄາສູງຕໍ່ຜົນພົວພັນຮ່ວມມືແບບພິເສດ ລະຫວ່າງ ສອງພັກ ສອງລັດ ກໍຄືສອງອົງການິຕິບັນຍັດ ລາວ-ຫວຽດນາມ ໃນໄລຍະທີ່ຜ່ານມາ ແລະ ແລກປ່ຽນບົດຮຽນການຊີ້ນໍາ-ນໍາພາ ຂອງຄະນະພັກ ຂອງສອງສະພາແຫ່ງຊາດ, ບົດຮຽນກ່ຽວກັບວຽກງານສະມາຊິກສະພາແຫ່ງຊາດ ການພົວພັນ ລະຫວ່າງສະພາແຫ່ງຊາດ ແລະສະພາປະຊາຊົນທ້ອງຖິ່ນ ກໍຄືການພົວພັນລະຫວ່າງ ຄະນະເລຂາທິການ ແລະຫ້ອງວ່າການສະພາແຫ່ງຊາດຫວຽດນາມ, ວຽກງານການເຄື່ອນໄຫວຕ່າງປະເທດຂອງສະພາແຫ່ງຊາດໃນຕໍ່ໜ້າ.
ໃນໄລຍະຢ້ຽມຢາມ, ຄະນະ ໄດ້ເຂົ້າຢ້ຽມຂໍ່ານັບສະຫາຍ ເວືອງ ດິງ ເຫວະ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສສ.ຫວຽດນາມ ເຊິ່ງສະຫາຍໄດ້ຕີລາຄາສູງ ຕໍ່ການຢ້ຽມຢາມຫວຽດນາມ ຂອງຄະນະໃນຄັ້ງນີ້, ເພາະພໍດີກັບໄລຍະທີ່ ສອງພັກ ສອງລັດ ແລະປະຊາຊົນສອງຊາດ ພວມສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ-ລາວ. ສະຫາຍ ປະທານສະພາແຫ່ງຊາດຫວຽດນາມ ໄດ້ຕີລາຄາສູງການພົວພັນຮ່ວມມື ລະຫວ່າງ ສອງພັກ, ສອງລັດ ແລະປະຊາຊົນສອງຊາດ ເວົ້າລວມ, ເວົ້າສະເພາະ ລະຫວ່າງ ສອງອົງການນິຕິບັນຍັດ ຫວຽດນາມ-ລາວ ແລະໄດ້ສະເໜີໃຫ້ສອງສະພາສືບຕໍ່ເສີມຂະຫຍາຍສາຍພົວພັນຮ່ວມມື ລະຫວ່າງສອງອົງການໃນຕໍ່ໜ້າ.
ນອກຈາກເຄື່ອນໄຫວຢູ່ນະຄອນຫລວງຮ່າໂນ້ຍແລ້ວ, ຄະນະ ຍັງໄດ້ຢ້ຽມຢາມ ແລະ ເຮັດວຽກ ກັບຄະນະພັກ, ຄະນະນໍາ ຂອງແຂວງ ທ້າຍ ງວຽນ, ພິເສດຍັງໄດ້ເຂົ້າຮ່ວມ ແລະກ່າວຄໍາເຫັນໃນກອງປະຊຸມສະໄຫມສາມັນເທື່ອທີ 7 ຂອງສະພາປະຊາຊົນແຂວງ ທ້າຍ ງວຽນ ຊຸດທີ 14. ຄະນະ ຍັງໄດ້ເດີນທາງໄປຢ້ຽມຊົມ ສະຫະກອນຜະລິດຊາ ຫາວດາດ ໃນເມືອງເຕີນເກືອງ ທີ່ມີຊື່ສຽງໃນການຜະລິດຊາ ຂອງແຂວງທ້າຍ ງວ້ຽນ ແລະຢ້ຽມຢາມມະຫາວິທະຍາໄລ ທ້າຍ ງວຽນ, ມີຄໍາເຫັນຕໍ່ບັນດາຄູອາຈານ ແລະ ບັນດານັກສຶກສາລາວ-ຫວຽດນາມ ເຊິ່ງປັດຈຸບັນ ມີນັກສຶກສາຮຽນຢູ່ເກືອບ 60 ຄົນ.
ສະຫາຍ ປອ. ນາງ ສູນທອນ ໄຊຍະຈັກ ພ້ອມດ້ວຍຄະນະ ຍັງໄດ້ຢ້ຽມຢາມແຂວງຮວາບິງ ໄດ້ເຂົ້າຢ້ຽມຊົມອານຸສອນສະຖານ ເຊິ່ງເປັນສະຖານທີ່ປະຫວັດສາດ ຕິດພັນກັບການປະຕິວັດຂອງສອງຊາດ ລາວ-ຫວຽດນາມ, ເປັນສະຖານທີ່ກະກຽມໃຫ້ແກ່ການຈັດກອງປະຊຸມໃຫຍ່ ຄັ້ງທີ 2 ຂອງພັກປະຊາຊົນລາວ ໃນທ້າຍປີ 1971 ແລະ ປັດຈຸບັນພວມມີການປັບປຸງກໍ່ສ້າງໃຫ້ເປັນສະຖານທີ່ສຶກສາອົບຮົມ ໃຫ້ປະຊາຊົນ ແລະ ຄົນລຸ້ນໜຸ່ມຂອງສອງຊາດ ກ່ຽວກັບມູນເຊື້ອຂອງການພົວພັນພິເສດ ລາວ-ຫວຽດນາມ. ຄະນະ ໄດ້ພົບປະເຮັດວຽກ ກັບເລຂາຄະນະພັກ, ປະທານສະພາປະຊາຊົນຂອງແຂວງ, ປະທານກໍາມາທິການປະຊາຊົນແຂວງ ແລະການນໍາຂັ້ນຕ່າງໆຂອງແຂວງ ໄດ້ໄປຢ້ຽມຊົມສະຖານທີ່ທ່ອງທ່ຽວບໍ່ນໍ້າຮ້ອນກິມໂບຍ ທີ່ມີຊື່ສຽງຂອງແຂວງ.
ໃນການພົບປະການນໍາຂອງແຂວງ ທ້າຍ ງວຽນ ແລະ ຮົວບິ່ງ ສອງຝ່າຍ ໄດ້ຕີລາຄາສູງການພົວພັນຮ່ວມມື, ຊ່ວຍເຫລືອເຊິ່ງກັນ ແລະ ກັນ ໃນຕະຫລອດໄລຍະແຫ່ງການຕໍ່ສູ້ກູ້ຊາດ ແລະໄລຍະແຫ່ງການປົກປັກຮັກສາ ແລະສ້າງສາປະເທດຊາດ ຂອງຕົນໃນປັດຈຸບັນ, ໄດ້ເປັນເອກະພາບຮ່ວມກັນສືບຕໍ່ເສີມຂະຫຍາຍສາຍພົວພັນພິເສດ ໃຫ້ນັບມື້ນັບມີ ປະສິດທິຜົນຍິ່ງຂຶ້ນ.
ການມາຢ້ຽມຢາມຂອງສະຫາຍ ຮອງປະທານສະພາໃນຄັ້ງນີ້ ໄດ້ປະສົບຜົນສໍາເລັດຢ່າງຈົບງາມ, ເປັນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມເວົ້າລວມ, ເວົ້າສະເພາະ ສອງອົງການ ໃຫ້ນັບມື້ນັບແໜ້ນແຟ້ນ ແລະ ແຕກດອກອອກຜົນຍິ່ງໆຂຶ້ນ.