ໃນວັນທີ 6 ກຸມພາ 2024, ທ່ານ ຄໍາໃບ ດຳລັດ ກຳມະການສູນກາງພັກ ຮອງປະທານສະພາແຫ່ງຊາດ ຊຸດທີ IX ທັງເປັນສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ພ້ອມດ້ວຍ ທ່ານ ບຸນມີ ພິມມະສອນ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ, ມີ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະ ສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງ, ໄດ້ເຄື່ອນໄຫວຢ້ຽມຢາມ, ພົບປະ ຜູ້ມີສິດເລືອກຕັ້ງທີຕິດພັນກັບການຈັດຕັ້ງຜັນຂະຫຍາຍເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຄໍາມ່ວນ ຊຸດທີ II, ໂດຍໄດ້ຮັບການຕ້ອນຮັບ ແລະເຂົ້າຮ່ວມເຮັດວຽກຂອງທ່ານ ນາງ ບົວກາ ແກ້ວມະນີ ເຈົ້າເມືອງນາກາຍ, ມີພະແນກການທີ່ກ່ຽວຂ້ອງຂອງແຂວງ, ຮອງເຈົ້າເມືອງ ພ້ອມດ້ວຍບັນດາທ່ານຄະນະປະຈໍາພັກເມືອງ, ກຳມະການພັກເມືອງ, ອະດີດການນຳຂອງເມືອງ, ກຳລັງປກຊ-ປກສ, ພະນັກງານຫຼັກແຫ່ງຂອງເມືອງເຂົ້າຮ່ວມທັງໝົດ 118 ທ່ານ, ຍິງ 29 ທ່ານ.
ກອງປະຊຸມໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໂດຍສັງເຂບຂອງເມືອງ; ຈາກນັ້ນ, ສະມາຊິກສະພາ ໄດ້ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II, ໃນນັ້ນມີບັນດາມະຕິ, ກົດໝາຍ ແລະ ນິຕິກໍາໃຕ້ກົດໝາຍ, ແລະ ບັນດາເນື້ອໃນເອກະສານບົດລາຍງານຕ່າງໆທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມ; ພ້ອມນັ້ນ ກອງປະຊຸມໄດ້ຮັບຟັງຄຳຄິດ-ຄຳເຫັນ ແລະ ຄຳສະເໜີເປັນຕົ້ນດ້ານການກໍ່ສ້າງພື້ນຖານໂຄງລ່າງຂອງເມືອງ.
ຈາກນັ້ນ ທ່ານຮອງປະທານສະພາແຫ່ງຊາດ ກໍໄດ້ໂອ້ລົມຕໍ່ອຳນາດການປົກຄອງ ແລະ ພະນັກງານຫຼັກແຫຼ່ງຂອງເມືອງ ໂດຍທ່ານໄດ້ສະແດງຄວາມຍ້ອງ ຍໍຊົມເຊີຍຜົນງານອັນພົ້ນເດັ່ນຂອງເມືອງທີ່ຍາດມາໄດ້ ທັງສະເໜີໃຫ້ສືບຕໍ່ຮັກສາມູນເຊື້ອອັນດີງາມ ແລະ ໂດຍສະເພາະແມ່ນໃຫ້ເອົາໃຈໃສ່ການສ້ອມແປງສ້າງເສັ້ນທາງເພື່ອເປັນການສ້າງສີ່ງເອື້ອອຳນວຍໃຫ້ແກ່ນັກທ່ອງທ່ຽວ ແລະ ການສັນຈອນໄປມາຂອງປະຊາຊົນເຂດປາກຖ້ຳກອງລໍເບື້ອງນາຕານຊຶ່ງເປັນການຊຸກຍູ້ທາງດ້ານການທ່ອງທ່ຽວເພາະວ່າເມືອງນາກາຍມີທ່າແຮງທາງດ້ານການທ່ອງທ່ຽວຫຼາຍບ່ອນທີ່ສວຍສົດງົດງາມ ເພື່ອເປັນທ່າແຮງສົ່ງເສີມສ້າງເສດຖະກິດຂອງເມືອງ, ພ້ອມນັ້ນ, ການຈັດຕັ້ງປະຕີບັດວຽກງານແຕ່ລະຂົງເຂດໃຫ້ບັນລຸຕາມເປົ້າໝາຍເປັນຕົ້ນໃນຂົງເຂດກະສິກຳ, ສ້າງໃຫ້ເປັນສິນຄ້າແປຮູບໃຫ້ມີມູນຄ່າສູງຂຶ້ນ ເພື່ອເຮັດໃຫ້ປະຊາຊົນມີຊິວີດການເປັນຢູ່ທີ່ດີຂຶ້ນ.
ຈາກນັ້ນ, ຮອງປະທານສະພາແຫ່ງຊາດ, ພ້ອມດ້ວຍຄະນະໄດ້ເຄື່ອນໄຫວຢ້ຽມຢາມເຂດການຜະລິດກະສິກຳຂອງເມືອງນາກາຍ.
ໂດຍ: ເອື້ອ ມະໂນສິງ