ໃນວັນທີ 5 ກຸມພາ 2024, ທ່ານ ຄໍາໃບ ດຳລັດ ກຳມະການສູນກາງພັກ ຮອງປະທານສະພາແຫ່ງຊາດ ຊຸດທີ IX ທັງເປັນສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ພ້ອມດ້ວຍ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະ ສະມາຊິກສະພາປະຊາຊົນຂັ້ນແຂວງ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງຍົມມະລາດ ໂດຍໄດ້ຮັບການຕ້ອນຮັບ ແລະເຂົ້າຮ່ວມເຮັດວຽກຂອງທ່ານ ບຸນທັນ ສຸວັນນະລາດ ເຈົ້າເມືອງຍົມມະລາດ, ມີ ພະແນກການທີ່ກ່ຽວຂ້ອງຂອງແຂວງ, ຮອງເຈົ້າເມືອງ ພ້ອມດ້ວຍບັນດາທ່ານຄະນະປະຈໍາພັກເມືອງ, ກຳມະການພັກເມືອງ, ອະດີດການນຳຂອງເມືອງ, ກຳລັງປກຊ-ປກສ, ພະນັກງານຫຼັກແຫ່ງຂອງເມືອງ ແລະ ອຳນາດການປົກຄອງຂັ້ນບ້ານເຂົ້າຮ່ວມທັງໝົດ 130 ທ່ານ, ຍິງ 25 ທ່ານ.
ທ່ານ ບຸນທັນ ສຸວັນນະລາດ ເຈົ້າເມືອງຍົມມະລາດ ໄດ້ລາຍງານໂດຍຫຍໍ້ ກ່ຽວກັບສະພາບທີ່ຕັ້ງ ແລະ ຈຸດພິເສດຂອງເມືອງ, ດ້ານການເມືອງ-ແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການພັດທະນາເສດຖະກິດ-ສັງຄົມ, ວັດທະນະທໍາ-ສັງຄົມ, ດ້ານຂໍ້ຄົງຄ້າງ, ວຽກງານຈຸດສຸມໃນຕໍ່ໜ້າ ແລະ ກອງປະຊຸມໄດ້ຮັບຟັງຄຳຄິດ-ຄຳເຫັນ ແລະ ຄຳສະເໜີເປັນຕົ້ນ: ດ້ານການກໍ່ສ້າງພື້ນຖານໂຄງລ່າງ, ອາຄານແຜນຜັງເມືງໃໝ່, ເສັ້ນທາງ-ຂົວ ແລະຊົນລະປະທານ.
ຈາກນັ້ນ, ທ່ານ ສະເຫຼີມສັກ ແກ້ວຈັນທະລາ ສະມາຊິກສະພາແຫ່ງຊາດ ປະຈໍາເຂດເລືອກທີ 12 ແຂວງຄໍາມ່ວນ, ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງ ສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II, ໂດຍໄດ້ຍົກໃຫ້ເຫັນກ່ຽວກັບບັນຫາສໍາຄັນຂອງຊາດ ເປັນຕົ້ນວຽກງານຂອງລັດຖະບານ, ວຽກງານຂົງເຂດສະພາແຫ່ງຊາດ, ການປັບປຸງ ແລະ ຮັບຮອງເອົາກົດໝາຍ, ຮັບຮອງເອົາບົດສະຫຼຸບຕີລາຄາການຈັດຕັ້ງປະຕິບັດ ວ່າດ້ວຍວາລະແຫ່ງຊາດ ກ່ຽວກັບການແກ້ໄຂດ້ານເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ໄລຍະ 3 ປີຜ່ານມາ (2021-2023), ທິດທາງແຜນການຕິດຕາມກວດກາໃນຕໍ່ໜ້າຂອງສະພາ ແລະ ບັນດາເນື້ອໃນເອກະສານບົດລາຍງານຕ່າງໆທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມ.
ໃນຕອນທ້າຍກອງປະຊຸມ ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ກໍໄດ້ໂອ້ລົມຕໍ່ອຳນາດການປົກຄອງ ແລະ ພະນັກງານຫຼັກແຫຼ່ງຂອງເມືອງ ຊຶ່ງໂດຍທ່ານໄດ້ສະແດງຄວາມຍ້ອງ ຍໍຊົມເຊີຍຜົນງານອັນພົ້ນເດັ່ນຂອງເມືອງທີ່ຍາດມາໄດ້, ພ້ອມນັ້ນທ່ານຍັງໄດ້ເນັ້ນໜັກໃຫ້ ເອົາໃຈໃສ່ຍົກສູງເປັນເຈົ້າການໃນການຈັດຕັ້ງປະຕິບັດກົດໝາຍ, ລັດຖະທຳມະນູນ, ມະຕິຂອງກອງປະຊຸມສະພາ 2 ຂັ້ນ ແລະ ເຊື່ອມຊຶມບັນດາມະຕິ, ຄໍາສັ່ງ, ຄໍາແນະນໍາຂອງກົມການເມືອງ ແລະ ຄະນະເລຂາທິການສູນກາງພັກວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ເພື່ອຕັ້ງຫນ້າກະກຽມໃຫ້ດີ ແລະ ດຳເນີນໃຫ້ຖືກຕ້ອງ, ໃຫ້ເຂັ້ມງວດ, ສ້າງຄວາມເຂົ້າໃຈໃຫ້ປະຊາຊົນລາວບັນດາເຜົ່າໄດ້ຮັບຮູ້, ເຂົ້າໃຈກົດໝາຍ ແລະ ລັດຖະທຳມະນູນຢ່າງເລິກເຊິ່ງຍິ່ງຂຶ້ນ, ທຸກພາກສ່ວນເຮັດໜ້າທີ່ຕາມພາລະບົດບາດຂອງຕົນດ້ວຍຄວາມເອົາໃຈໃສ່, ມີຄວາມຮັບຜິດຊອບ ແລະ ມີຄວາມຖືກຕ້ອງຍຸຕິທຳ, ພ້ອມກັນສຸມໃສ່ຈັດຕັ້ງປະຕິບັດ 2 ວາລະແຫ່ງຊາດນັ້ນຄື: ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດໃຫ້ປະກົດຜົນເປັນຈິງ.
ຈາກນັ້ນ, ຮອງປະທານສະພາແຫ່ງຊາດ ພ້ອມດ້ວຍຄະນະໄດ້ຢ້ຽມຢາມຝ່າຍນໍ້າລົ້ນ ຫ້ວຍຂະມ້າ ບ້ານພີດສີໃຄ ແລະ ໂຄງການປູກຜັກເຮືອນຮົ່ມ ບ້ານນາລາດຄວາຍ ເມືອງຍົມມະລາດຕື່ມອີກ.
ຄະນະດັ່ງກ່າວຈະໄດ້ (ສືບຕໍ່) ເຄື່ອນໄຫວຢາມຢ້ຽມ ແລະ ເຮັດວຽກອີກ 2 ເມືອງ, 5 ຈຸດພາຍໃນແຂວງຈິ່ງຈະສໍາເລັດ.
ໂດຍ: ເອື້ອ ມະໂນສິງ