ໃນລະຫວ່າງວັນທີ 16-18-20 ກຸມພາ 2023 ທ່ານ ຄໍາໃບ ດຳລັດ ກຳມະການສູນກາງພັກ ຮອງປະທານສະພາແຫ່ງຊາດ ພ້ອມດ້ວຍ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ12 ແຂວງຄໍາມ່ວນ ແລະ ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງທີຕິດພັນກັບການໂຄສະນາເຜີຍແຜ່ເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ຢູ່ 9ຈຸດ, ຂອງ 5 ຕົວເມືອງຄື: ເມືອງມະຫາໄຊ, ໄຊບົວທອງ, ບົວລະພາ, ເຊບັ້ງໄຟ ແລະ ເມືອງທ່າແຂກ, ໂດຍການຕ້ອນຮັບ ແລະ ເຂົ້າຮ່ວມມີບັນດາ ທ່ານ ເຈົ້າເມືອງ, ຄະນະປະຈໍາພັກເມືອງ, ຫົວໜ້າ-ຮອງຫົວໜ້າຫ້ອງການ, ອໍານາດການປົກຄອງບ້ານ ແລະ ຕະຫຼອດຮອດປະຊາຊົນບັນດາເຜົ່າ ເຂົ້າຮ່ວມທັງໝົດ 2.280 ເທື່ອຄົນ, ຍິງ 951 ເທື່ອຄົນ.
ວາລະ ແລະ ແຜນຂອງການເຄື່ອນໄຫວຈັດຕັ້ງເຜີຍແຜ່ຜົນສຳເລັດກອງປະຊຸມໃນຄັ້ງນີ້ໄດ້ຮັບຟັງການລາຍງານໂດຍສັງເຂບຈາກຕ່າງໜ້າອຳນາດການປົກຄອງຂັ້ນເມືອງ ແລະ ບ້ານເປັນຕົ້ນ: ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ທີ່ຕິດພັນກັບສອງວາລະແຫ່ງຊາດກໍ່ຄືວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະ ທິດທາງແຜນການໃນຕໍ່ໜ້າ, ຈາກນັ້ນ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ກໍ່ໄດ້ຜັດປ່ຽນເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX, ເຊິ່ງໄດ້ພິຈາລະນາຮັບຮອງເອົາຫຼາຍບັນຫາສໍາຄັນທີ່ເປັນພື້ນຖານຂອງຊາດ ເປັນຕົ້ນ: ກອງປະຊຸມໄດ້ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2022 ແລະ ແຜນການ ປີ 2023; ບົດລາຍງານຂອງລັດຖະບານກ່ຽວກັບການສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2021, ຄາດຄະເນການຈັດຕັ້ງປະຕິບັດແຜນງົບປະມານແຫ່ງລັດ ແລະ ແຜນເງິນຕາ ປະຈຳປີ 2022 ແລະ ທິດທາງແຜນການ ປີ 2023; ບົດສະຫຼຸບການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການເຄື່ອນໄຫວວຽກງານ ປະຈຳປີ 2023 ຂອງອົງການກວດສອບແຫ່ງລັດ; ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການ ປະຈຳປີ 2023 ຂອງອົງການກວດກາແຫ່ງລັດ; ບົດລາຍງານຂອງອົງການໄອຍະການປະຊາຊົນສູງສຸດ ກ່ຽວກັບການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການ ປີ 2023; ບົດລາຍງານຂອງສານປະຊາຊົນສູງສຸດ ກ່ຽວກັບການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການ ປີ 2023; ບົດລາຍງານການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການ ປີ 2023 ຂອງສະພາແຫ່ງຊາດ ແລະ ມະຕິ ວ່າດ້ວຍການຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 12 ສະບັບ ໃນນີ້ ກົດໝາຍສ້າງໃໝ່ 3 ສະບັບ ແລະ ກົດໝາຍປັບປຸງ 9 ສະບັບ.
ການເຄື່ອນໄຫວຄັ້ງນີ້ ທ່ານ ຮອງປະທານສະພາແຫ່ງຊາດ ພ້ອມຄະນະ ກໍໄດ້ຮັບຟັງຄໍາຄິດເຫັນ, ຄໍາສະເໜີຂອງພໍ່ແມ່ປະຊາຊົນໂດຍສ່ວນຫລາຍແມ່ນກ່ຽວກັບການສ້າງສາພັດທະນາພື້ນຖານໂຄງລ່າງ ຕໍ່ກັບຄໍາສະເໜີດັ່ງກ່າວກໍ່ໄດ້ອະທິບາຍຊີ້ແຈງ ແລະ ບາງຄໍາສະເໜີທີ່ຕິດກັບຫລາຍພາກສ່ວນກໍ່ຈະໄດ້ນຳເອົາໄປຄົ້ນຄວ້າສັງລວມມອບໃຫ້ຄະນະກໍາມະການທີ່ກ່ຽວຂ້ອງປະສານສົມທົບກັບພາກສ່ວນຕ່າງໆ ຂອງອົງການປົກຄອງແຂວງ ຄົ້ນຄວ້າແກ້ໄຂ ໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ.
ພ້ອມນັ້ນ, ທ່ານຮອງປະທານສະພາແຫ່ງຊາດ ພ້ອມຄະນະ ຍັງໄດ້ນໍາເອົາອຸປະກອນການສຶກສາ ແລະ ອຸປະກອນກິລາ ຈໍານວນໜຶ່ງ ມອບໃຫ້ອໍານາດການປົກຄອງເມືອງ, ໂຮງຮຽນ ແລະ ບ້ານດັ່ງກ່າວອີກດ້ວຍ.
ໂດຍ: ເອື້ອ ມະໂນສິງ