(ສພຊ) ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ໄດ້ຢ້ຽມຢາມພົບປະໂອ້ລົມພະນັກງານຫຼັກແຫຼ່ງກອງພັນໃຫຍ່ທະຫານຮາບຍານເກາະທີ 11 ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20 ມັງກອນ 1949-20 ມັງກອນ 2024) ຕິດພັນກັບການເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນນະຄອນຫຼວງວຽງຈັນ ຊຸດທີ II ໃນວັນທີ 18 ທັນວາ 2023 ໂດຍມີທ່ານ ບຸນທາມ ພຸດທະວົງ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ, ຮອງປະທານສະພາປະຊາຊົນນະຄອນຫຼວງວຽງຈັນ ພ້ອມດ້ວຍຄະນະ ເຂົ້າຮ່ວມຕິດຕາມ.
ທ່ານ ພັອ. ພອນມີໄຊ ສີວົງຊຳ ເລຂາຄະນະພັກ, ຫົວໜ້າການເມືອງກອງພັນໃຫຍ່ທະຫານຮາບຍານເກາະທີ 11 ໄດ້ລາຍງານຫຍໍ້ກ່ຽວກັບການເຕີບໃຫຍ່ຂະຫຍາຍຕົວຂອງກອງພັນໃຫຍ່ດັ່ງກ່າວ ແລະ ຜົນງານການເຄື່ອນໄຫວເຮັດໜ້າທີ່ການເມືອງຂອງກົມກອງໃນໄລຍະຜ່ານມາ, ທ່ານໃຫ້ຮູ້ວ່າ: ກອງພັນໃຫຍ່ທະຫານຮາບຍານເກາະທີ 11 ສືບທອດມາຈາກກຸ່ມ 901 ທີ່ເຂົ້າມາປະສົມຢູ່ນະຄອນຫຼວງວຽງຈັນ ພາຍຫຼັງສະຖາປະນາເປັນ ສປປ ລາວ ໃນວັນທີ 2 ທັນວາ 1975 ເຊິ່ງເປັນກອງພັນໃຫຍ່ເອກະລາດ ຂຶ້ນກັບກະຊວງປ້ອງກັນຊາດ ແລະ ຢູ່ພາຍໃຕ້ການຊີ້ນຳໂດຍກົງ, ຮອບດ້ານຈາກກະຊວງປ້ອງກັນປະເທດ; ໜ້າທີ່ຕົ້ນຕໍແມ່ນປ້ອງກັນນະຄອນຫຼວງ ແລະ ອົງການ ການນຳພັກ-ລັດ, ກຽມພ້ອມສູ້ຮົບ ແລະ ເຄື່ອນໄຫວສູ້ຮົບໃນຂອບເຂດທົ່ວປະເທດຕາມຄຳສັ່ງຂອງຂັ້ນເທິງ, ປັບປຸງກໍ່ສ້າງກຳລັງໃຫ້ມີຄວາມປອດໃສ ເຂັ້ມແຂງ ໜັກແໜ້ນ, ເປັນກົມກອງຈຸດສຸມຕົວແບບຂອງກະຊວງປ້ອງກັນປະເທດ, ຫັນລົງສູ່ຮາກຖານປະຊາຊົນ ອຳນາດການປົກຄອງ ຂອບເຂດບ້ານອ້ອມຂ້າງກົມກອງຕັ້ງທັບ. ໃນໄລຍະຜ່ານມາ, ກົມກອງຕ່າງໆຂອງກອງພັນໃຫຍ່ນີ້ ສາມາດສ້າງຜົນງານ ແລະ ໄດ້ຮັບນາມມະຍົດຕ່າງໆ ເປັນຕົ້ນແມ່ນສາມາດສູ້ຮົບນ້ອຍ ແລະ ໃຫຍ່ 290 ຄັ້ງ (ດັບສູນສັດຕູຄາທີ່ 1.354 ບັກ); ມີ 2 ກອງພັນນ້ອຍ ແລະ 5 ກອງຮ້ອຍ ໄດ້ຮັບນາມມະຍົດເປັນກອງວິລະຊົນແຫ່ງຊາດ; ມີ 6 ສະຫາຍ ເປັນວິລະຊົນແຫ່ງຊາດ; ມີ 25 ສະຫາຍ ໄດ້ຮັບນາມມະຍົດນັກຮົບແຂ່ງຂັນແຫ່ງຊາດ; ໄດ້ຮັບທຸງວິລະຊົນ 7 ຜືນ; ໄດ້ຮັບທຸງມູນເຊື້ອ 10 ຜືນ; ຫຼຽນໄຊອິດສະຫຼະຊັ້ນ I, II,III ຈຳນວນ 125 ໜ່ວຍ; ຫຼຽນໄຊແຮງງານຊັ້ນ I, II,III ຈຳນວນ 1.072 ໜ່ວຍ; ຫຼຽນໄຊພິລະອາດຫານຊັ້ນ I, II,III ຈຳນວນ 1.520 ໜ່ວຍ; ຫຼຽນກາແຮງງານ ຈຳນວນ 2.211 ໜ່ວຍ ແລະ ອື່ນໆ.
ຈາກນັ້ນ, ທ່ານ ບຸນທາມ ພຸດທະວົງ ໄດ້ຂຶ້ນເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 6 ສະພາປະຊາຊົນນະຄອນຫຼວງວຽງຈັນ ຊຸດທີ II ເຊິ່ງໄດ້ຍົກໃຫ້ເຫັນເນື້ອໃນຜົນສຳເລັດຂອງກອງປະຊຸມໃນການຕົກລົງບັນຫາສຳຄັນຕ່າງໆພາຍໃນນະຄອນຫຼວງວຽງຈັນ.
ໃນໂອກາດນີ້, ທ່ານ ພົທ. ສຸວອນ ເລືອງບຸນມີ ໄດ້ສະແດງຄວາມຊົມເຊີຍຕໍ່ຜົນງານການເຄື່ອນໄຫວຂອງກອງພັນໃຫຍ່ທະຫານຮາບຍານເກາະທີ 11 ທີ່ສາມາດຍາດມາໄດ້ໃນໄລຍະຜ່ານມາ ທັງມີຄຳເຫັນໂອ້ລົມຕໍ່ພະນັກງານຫຼັກແຫຼ່ງກອງພັນໃຫຍ່ ໂດຍໄດ້ເນັ້ນໜັກຫຼາຍບັນຫາທີ່ສຳຄັນ ໂດຍສະເພາະແມ່ນການຮັກສາມູນເຊື້ອອັນດີງາມ ແລະ ສືບຕໍ່ນຳພາ-ຊີ້ນຳພະນັກງານ, ນາຍ ແລະ ພົນທະຫານ ສ້າງຜົນງານນັບມື້ດີຂຶ້ນເລື້ອຍໆ, ປະຕິບັດໜ້າທີ່ວຽກງານວິຊາສະເພາະທີ່ພັກ-ລັດມອບໝາຍໃຫ້ ດ້ວຍຄວາມຮັບຜິດຊອບສູງ ແລະ ອື່ນໆ; ພ້ອມດຽວກັນນີ້, ທ່ານຍັງໄດ້ຍົກໃຫ້ເຫັນຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ເປີດໂອກາດໃຫ້ຜູ້ເຂົ້າຮ່ວມ ແລະ ສະມາຊິກສະພາແຫ່ງຊາດໄດ້ຖາມ-ຕອບຂໍ້ຂ້ອງໃຈ ແລະ ຂໍ້ສະເໜີຕ່າງໆ ຢ່າງກົງໄປກົງມາອີກດ້ວຍ.
(ພາບ ແລະ ຂ່າວ: ນາງ ປາກາລັກ ພົມມີໄຊ)