ທ່ານ ປອ ຈະເລີນ ເຍຍປາວເຮີ ກຳມະການສູນກາງພັກ ຮອງປະທານສະພາແຫ່ງຊາດ ປະທານກຳມາທິການກົດໝາຍ ພ້ອມດ້ວຍຄະນະ ໄດ້ພົບປະຢ້ຽມຢາມ ແລະ ໂອ້ລົມພະນັກງານຫຼັກແຫຼ່ງພາຍໃນ ສະພາປະຊາຊົນແຂວງສາລະວັນ ຕອນບ່າຍຂອງວັນທີ 26 ກຸມພາ 2024, ກ່ອນອື່ນທ່ານໄດ້ສະແດງຄວາມຍິນດີ ທີ່ໄດ້ມີໂອກາດມາເຄື່ອນໄຫວ ແລະ ເຮັດວຽກຢູ່ທີ່ແຂວງສາລະວັນ ສະແດງຄວາມຂອບໃຈຕໍ່ຄະນະນຳສະພາປະຊາຊົນແຂວງທີ່ໄດ້ຕ້ອນຮັບຢ່າງອົບອຸ່ນ ແລະ ຍ້ອງຍໍຊົມເຊີຍທີ່ໄດ້ເຫັນການພັດທະນາຂອງແຂວງ, ຊົມເຊີຍຕໍ່ການຜົນງານດີເດັ່ນຮອບດ້ານຕໍ່ວຽກງານການເຄື່ອນໄຫວຂອງສະພາປະຊາຊົນແຂວງຕະຫຼອດໄລຍະທີ່ຜ່ານມາ; ພ້ອມດຽວກັນທ່ານໄດ້ເລົ່າຄືນມູນເຊື້ອປະຫວັດຄວາມເປັນມາ ການເຕີບໃຫຍ່ຂະຫຍາຍຕົວ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເປັນແຕ່ລະໄລຍະ ໃຫ້ໄດ້ຮັບຮູ້ ແລະ ເຂົ້າໃຈ, ພ້ອມນັ້ນທ່ານກໍ່ໄດ້ເນັ້ນໃຫ້ສະພາປະຊາຊົນແຂວງ ເອົາໃຈໃສ່ ເສີມຂະຫຍາຍບົດບາດ ສິດເປັນເຈົ້າ ສິດປະຊາທິປະໄຕ ຂອງປະຊາຊົນ ຕາມລັດຖະທຳມະນູນ ແລະ ກົດໝາຍ, ມີຄວາມສາມັກຄີຮັກແພງກັນພາຍໃນ, ສືບຕໍ່ຊີ້ນຳ ນຳພາຈັດຕັ້ງປະຕິບັດໜ້າທີ່ວຽກງານຂອງຕົນຕາມພາລະບົດບາດ, ສິດ ແລະ ໜ້າທີ່ທີ່ໄດ້ກຳນົດໄວ້ໃນກົດໝາຍໃຫ້ສູງຂຶ້ນ;

ໃນເວລາຕໍ່ມາທ່ານຮອງປະທານສະພາແຫ່ງຊາດ ກໍ່ໄດ້ວາງກະຕ່າດອກໄມ້ ຢູ່ທີ່ອານຸສາວະລີຮູບປັ້ນຂອງອົງແກ້ວ ເພື່ອເປັນການລະນຶກ ແລະ ສະແດງເຖິງຄວາມເຄົາລົບຮັກ, ກະຕັນຍູ-ຮູ້ບຸນຄຸນ, ຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງບັນພະບູລຸດລາວ ທີ່ອຸທິດຕົນ ເພື່ອປະເທດຊາດ ໃນໄລຍະຜ່ານມາ;

ພາບ-ຂ່າວ: ດີລຳພົນ