(ສພຊ) ໃນວັນທີ 05 ມັງກອນ 2024 ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ໄດ້ຢ້ຽມຢາມພົບປະ, ໂອ້ລົມພະນັກງານຫຼັກແຫຼ່ງກອງພັນໃຫຍ່ລົດຕັງ-ຍານເກາະ 661 ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20 ມັງກອນ 1949-20 ມັງກອນ 2024) ທີ່ໃກ້ຈະມາເຖິງ ຕິດພັນກັບການເຜີຍແຜ່ຜົນ ສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນນະຄອນຫຼວງວຽງຈັນ ຊຸດທີ II ໂດຍມີທ່ານ ບຸນທາມ ພຸດທະວົງ ຮອງປະ ທານສະພາປະຊາຊົນນະຄອນຫຼວງວຽງຈັນ ພ້ອມດ້ວຍຄະນະ ເຂົ້າຮ່ວມຕິດຕາມ.
ທ່ານ ພັອ. ຄຳປານ ແພງພັນ ເລຂາຄະນະພັກ, ຫົວໜ້າການເມືອງກອງພັນໃຫຍ່ລົດຕັງ-ຍານເກາະ 661 ລາຍງານຫຍໍ້ກ່ຽວກັບການເຕີບໃຫຍ່ຂະຫຍາຍຕົວຂອງກອງພັນໃຫຍ່ດັ່ງກ່າວ ແລະ ຜົນງານການເຄື່ອນໄຫວເຮັດໜ້າທີ່ການເມືອງຂອງກົມກອງໃນໄລຍະຜ່ານມາ ເຊິ່ງທ່ານໃຫ້ຮູ້ວ່າ: ກອງພັນໃຫຍ່ລົດຕັງ-ຍານເກາະ 661 ໄດ້ຮັບການປະກາດສ້າງ ຕັ້ງຂຶ້ນຢ່າງເປັນທາງການ ໃນວັນທີ 28 ຕຸລາ 2016 ພາຍໃຕ້ການເປັນປະທານໃຫ້ກຽດປະກາດສ້າງຕັ້ງໂດຍສະຫາຍ ພົອ. ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ຕາມຂໍ້ຕົກລົງສະບັບເລກທີ 2755/ກປທ, ລົງວັນທີ 30 ກໍລະກົດ 2016 ສ້າງຕັ້ງຂຶ້ນໂດຍການສືບທອດມູນເຊື້ອຈາກກອງພັນນ້ອຍ 616, 615, 174 ແລະ ສ້າງຕັ້ງຂຶ້ນຕື່ມ 2 ກອງພັນນ້ອຍ ຄື: 161 ແລະ 162. ໂຄງປະກອບການຈັດຕັ້ງ, ຕຳແໜ່ງງານ ແລະ ຈຳນວນພົນ ແມ່ນສ້າງຕັ້ງຂຶ້ນຕາມຂໍ້ຕົກລົງຂອງກົມໃຫຍ່ເສນາທິການກອງທັບ ສະບັບເລກທີ 1312/ກສນ, ລົງວັນທີ 06 ກໍລະກົດ 2016 ເຊັນ ແລະ ປະທັບຕາໂດຍ ຫົວໜ້າກົມໃຫຍ່ເສນາທິການກອງທັບ ພົທ. ສຸວອນ ເລືອງບຸນມີ; ມີຄະນະບັນຊາ 6 ສະຫາຍ, ຄະນະພັກ 9 ສະຫາຍ, ມີ 5 ພະແນກຂຶ້ນກັບ, ປະກອບມີ 37 ຂະແໜງການ, ສ້າງຕັ້ງເປັນ 4 ກອງພັນນ້ອຍ ມີ 3 ກອງພັນນ້ອຍສູ້ຮົບ ແລະ 1 ກອງພັນນ້ອຍຮັບປະກັນເຕັກນິກ; ປະກອບມີຈຳນວນພົນທະຫານ 989 ສະຫາຍ, ພະນັກງານ 509 ສະຫາຍ ຍິງ 104 ສະຫາຍ; ການປະກອບພາຫະນະມີ: ລົດຕັງ, ລົດຫຸ້ມເກາະ, ພາຫະນະຮັບປະກັນສູ້ຮົບ ແລະ ພາຫະນະຮັບໃຊ້ບໍລິຫານ. ພາຍຫຼັງໄດ້ຮັບການສ້າງຕັ້ງຂຶ້ນແລ້ວ ກົມກອງກໍໄດ້ວ່ອງໄວຜັນຂະຫຍາຍຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງວາງອອກ ໂດຍຕິດພັນກັບໜ້າທີ່ວິຊາສະເພາະຂອງເຫຼົ່າຮົບ ແລະ ໜ້າທີ່ການເມືອງຂອງກົມກອງ ເຊິ່ງສະແດງອອກຜົນງານອັນພົ້ນເດັ່ນດັ່ງນີ້: ເຂົ້າຮ່ວມຊ້ອມຮົບທຸກຄັ້ງທີ່ກະຊວງປ້ອງກັນປະ ເທດຈັດຂຶ້ນ ພິເສດໄດ້ຊ້ອມຮົບຮ່ວມລົດຕັງ ລາວ-ລັດເຊຍ, ລັດເຊຍ-ລາວ 3 ຄັ້ງ; ໄປແຂ່ງຂັນກິລາການທະຫານນາໆຊາດ (ແຂ່ງລົດຕັງ) ຢູ່ສະຫະພັນລັດເຊຍ 6 ຄັ້ງ, ຄັ້ງທີ 4 ສາ ມາດຍາດມາໄດ້ທີ 2 ຂອງກຸ່ມ; ເຂົ້າຮ່ວມຕ້ານໄພພິບັດທຳມະຊາດຕາມຄຳສັ່ງຂອງຂັ້ນເທິງ; ເຂົ້າຮ່ວມໂຄງການ 01728 ແລະ ເຂົ້າຮ່ວມປ້ອງກັນບັນດາວັນສຳຄັນຂອງຊາດ, ຂອງພັກ ແລະ ຂອງກອງທັບ. ມີຜົນງານສຳເລັດໃນການປັບປຸງກໍ່ສ້າງກົມກອງຫຼາຍດ້ານເຊັ່ນ: ການສຶກສາອົບຮົມນຳພາແນວຄິດ, ການປັບປຸງລະບຽບແບບແຜນ, ປັບປຸງລະບົບປະຈຳ ການກຽມພ້ອມສູ້ຮົບ, ວຽກງານຝຶກອົບຮົມຫັດແອບ, ວຽກງານພາລາທິການ ແລະ ເຕັກນິກ ເດັ່ນກວ່າໝູ່ແມ່ນວຽກງານສິລະປະວັນນະຄະດີ, ກິລາກາຍະກຳ; ວຽກງານຈຸດສຸມຂອງກົມກອງ ແມ່ນສຸມໃສ່ສ້າງຂະບວນການດ້ານຕ່າງໆເພື່ອຂໍ່ານັບຮັບຕ້ອນວັນສ້າງຕັ້ງກອງທັບຄົບຮອບ 75 ປີ ແລະ ຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ II ຂອງກອງພັນໃຫຍ່ 661; ວຽກງານປັບປຸງກົມກອງໃນທຸກດ້ານ; ນຳກຳລັງເຂົ້າຊ້ອມຮົບສະແດງວັນສ້າງຕັ້ງກອງທັບຄົບຮອບ 75 ປີ ແລະ ແຂ່ງຂັນກິລາ; ກຽມຄວາມພ້ອມເປີດກອງປະຊຸມໃຫຍ່ຜູ້ແທນສະມາຊິກພັກຄັ້ງທີ II ທີ່ຈະມາເຖິງໃນເດືອນກຸມພານີ້.
ຈາກນັ້ນ, ທ່ານ ບຸນທາມ ພຸດທະວົງ ໄດ້ຂຶ້ນເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນນະຄອນຫຼວງວຽງຈັນ ຊຸດທີ II ເຊິ່ງໄດ້ຍົກໃຫ້ເຫັນເນື້ອໃນຜົນສຳເລັດຂອງກອງປະຊຸມໃນການຕົກລົງບັນຫາສຳຄັນຕ່າງໆພາຍໃນນະຄອນຫຼວງວຽງຈັນ.
ໃນໂອກາດນີ້, ທ່ານ ພົທ. ສຸວອນ ເລືອງບຸນມີ ໄດ້ສະແດງຄວາມຊົມເຊີຍຕໍ່ຜົນງານການເຄື່ອນໄຫວທີ່ສາມາດຍາດມາໄດ້ໃນໄລຍະຜ່ານມາ ທັງມີຄຳເຫັນໂອ້ລົມຕໍ່ພະນັກ ງານຫຼັກແຫຼ່ງກອງພັນໃຫຍ່ ລົດຕັງ-ຍານເກາະ 661 ເຊິ່ງໄດ້ເນັ້ນໜັກຫຼາຍບັນຫາທີ່ສຳຄັນ ໂດຍສະເພາະແມ່ນການຮັກສາມູນເຊື້ອອັນດີງາມ ແລະ ສືບຕໍ່ນຳພາ-ຊີ້ນຳພະນັກງານ, ນາຍ ແລະ ພົນທະຫານ ສ້າງຜົນງານນັບມື້ດີຂຶ້ນເລື້ອຍໆ; ປະຕິບັດໜ້າທີ່ວຽກງານວິຊາສະເພາະທີ່ພັກ-ລັດມອບໝາຍໃຫ້ດ້ວຍຄວາມຮັບຜິດຊອບສູງ ແລະ ອື່ນໆ. ພ້ອມດຽວກັນນີ້, ທ່ານຍັງໄດ້ຍົກໃຫ້ເຫັນຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ແລະ ເປີດໂອກາດໃຫ້ຜູ້ເຂົ້າຮ່ວມ ແລະ ສະມາຊິກສະພາແຫ່ງຊາດ ໄດ້ຖາມ-ຕອບຂໍ້ຂ້ອງໃຈ ແລະ ຂໍ້ສະເໜີຕ່າງໆຢ່າງກົງໄປກົງມາອີກດ້ວຍ.
ຫຼັງຈາກນັ້ນ, ຄະນະໄດ້ຢ້ຽມຊົມການສະແດງຂັບລົດຕັງ-ຍານເກາະຢູ່ກອງພັນນ້ອຍ 161 ທີ່ຂຶ້ນກັບກອງພັນໃຫຍ່ 661.
(ຂ່າວ ແລະ ພາບ: ສອນສັກ ວັນວິໄຊ)