(ສພຊ) ໃນວັນທີ 29 ທັນວາ 2023 ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ໄດ້ ຢ້ຽມຢາມພົບປະ, ໂອ້ລົມພະນັກງານຫຼັກແຫຼ່ງກອງພັນໃຫຍ່ທະຫານຮາບ 941 ເນື່ອງໃນໂອກາດວັນສ້າງຕັ້ງກອງ ທັບປະຊາຊົນລາວ ຄົບຮອບ 75 ປີ (20 ມັງກອນ 1949-20 ມັງກອນ 2024) ທີ່ໃກ້ຈະມາເຖິງ ຕິດພັນກັບການ ເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນ ນະຄອນຫຼວງວຽງຈັນ ຊຸດທີ II ໂດຍມີທ່ານ ບຸນທາມ ພຸດທະວົງ ຮອງປະທານສະພາປະຊາຊົນນະຄອນຫຼວງວຽງ ຈັນ ພ້ອມດ້ວຍຄະນະ ເຂົ້າຮ່ວມຕິດຕາມ.
ທ່ານ ພັອ. ພູໂຂງ ມະໂນລາ ເລຂາຄະນະພັກກອງບັນຊາການ, ຫົວໜ້າກອງພັນໃຫຍ່ທະຫານຮາບ 941 ໄດ້ລາຍງານຫຍໍ້ກ່ຽວກັບການເຕີບໃຫຍ່ຂະຫຍາຍຕົວຂອງກອງພັນໃຫຍ່ດັ່ງກ່າວ ແລະ ຜົນງານການເຄື່ອນໄຫວເຮັດ ໜ້າທີ່ການເມືອງຂອງກົມກອງໃນໄລຍະຜ່ານມາ ເຊິ່ງທ່ານໃຫ້ຮູ້ວ່າ: ​ກອງພັນໃຫຍ່ທະຫານຮາບ 941 ເປັນກອງພັນ ໃຫຍ່ເອກະລາດ ຂຶ້ນກັບກະຊວງປ້ອງກັນປະເທດໂດຍກົງຮອບດ້ານ, ມີໜ້າທີ່ຮັກສາເຂດຍຸດທະສາດແນວຫຼັງນະ ຄອນຫຼວງ; ປັດຈຸບັນປະກອບມີ 05 ພະແນກການ, 03 ກອງພັນນ້ອຍຂຶ້ນກັບ, ມີ 12 ກອງຮ້ອຍ. ສຳນັກງານກອງ ພັນໃຫຍ່ທະຫານຮາບ 941 ຕັ້ງຢູ່ບ້ານໜອງຍາວ ເມືອງນາຊາຍທອງ; ກອງພັນນ້ອຍທະຫານຮາບ 901 ຕັ້ງຢູ່ເຂດ ເມືອງທຸລະຄົມ ແຂວງວຽງຈັນ, ກອງພັນນ້ອຍທະຫານຮາບ 902 ຕັ້ງຢູ່ເຂດເມືອງທ່າພະບາດ ແຂວງບໍລິຄຳໄຊ ສອງກອງພັນນ້ອຍດັ່ງກ່າວ ແມ່ນມີໜ້າທີ່ຮັບຜິດຊອບເຂດຍຸດທະສາດພູເຂົາຄວາຍ, ມີພື້ນທີ່ຕິດກັບ 04 ແຂວງ 07 ຕົວເມືອງ; ກອງພັນນ້ອຍທະຫານຮາບ 903 ຕັ້ງຢູ່ເຂດເມືອງໂພນໂຮງ ແຂວງວຽງຈັນ ມີໜ້າທີ່ຮັບຜິດຊອບປ່າເຂດ ຍຸດທະສາດພູພະນັງ, ມີພື້ນທີ່ຕິດກັບ 02 ແຂວງ 05 ເມືອງ. ການຈັດຕັ້ງປະຕິບັດວຽກງານຕົວຈິງໃນປີ 2023 ໄດ້ ເອົາໃຈໃສ່ສຶກສາອົບຮົມການເມືອງນໍາພາແນວຄິດໃຫ້ພະນັກງານ-ນັກຮົບ ຮັບຮູ້ເຊື່ອມຊຶມແນວທາງນະໂຍບາຍ ຂອງພັກ-ລັດ, ມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະ ຊວງປ້ອງກັນປະເທດ ວ່າດ້ວຍ 04 ໜ້າທີ່ໃຫຍ່ 26 ແຜນງານ ແລະ 05 ບາດກ້າວບຸກທະລຸ, ຊຸກຍູ້ສ້າງກອງ 03 ປອດ, ກົມກອງວັດທະນະທຳ, ນັກຮົບວັດທະນະທຳ ຕິດພັນກັບຂະບວນການກໍ່ສ້າງພັກປອດໃສ ເຂັ້ມແຂງ ໜັກ ແໜ້ນ, ຜັນຂະຫຍາຍມະຕິ V ຂອງອົງຄະນະພັກກອງພັນໃຫຍ່ທະຫານຮາບ 941 ວາງອອກຢ່າງຕັ້ງໜ້າ. ຄະນະພັກ-ຄະນະບັນຊາແຕ່ລະຂັ້ນ ໄດ້ເອົາໃຈໃສ່ຊຸກຍູ້ ແລະ ຮ່ວມກັບທຸກພາກສ່ວນ ລົງເກັບກຳຂໍ້ມູນນໍາອໍາ ນາດການປົກຄອງທ້ອງຖິ່ນແຕ່ລະຂັ້ນຢູ່ບັນດາເມືອງ, ແຂວງທີ່ຕິດຈອດກັບເຂດຮັບຜິດຊອບຂອງກົມກອງ ໂດຍ ຈັດຕັ້ງເຜີຍແຜ່ເອກະສານເຊັ່ນ: ກົດໝາຍວ່າດ້ວຍປ່າໄມ້, ກົດໝາຍວ່າດ້ວຍສັດນໍ້າ-ສັດປ່າ, ບັນດາຄຳສັ່ງແນະນຳ, ແຈ້ງການ, ຂໍ້ກໍານົດ, ກົດລະບຽບຕ່າງໆ ຢູ່ 03 ກອງພັນນ້ອຍ ແລະ ບັນດາໝູ່ບ້ານທີ່ຢູ່ໃນ ແລະ ອ້ອມຂ້າງປ່າສະ ຫງວນແຫ່ງຊາດ, ມີປະຊາຊົນເຂົ້າຮ່ວມ 1.559 ຄົນ ຍິງ 678 ຄົນ; ລົງຊີ້ນຳບັນດາກົມກອງຂຶ້ນກັບ ແລະ ພົວພັນ ວຽກນຳກົມກ່ຽວຂ້ອງໄດ້ເປັນປົກກະຕິ, ພ້ອມກັນນັ້ນ ໄດ້ເຂົ້າຮ່ວມການສ່ອງແສງນຳບັນດາກຸ່ມບ້ານ, ເມືອງ ທີ່ມີ ເຂດແດນຕິດຈອດກັບກົມກອງໄດ້ຢ່າງຕໍ່ເນື່ອງ.
ຈາກນັ້ນ, ທ່ານ ບຸນທາມ ພຸດທະວົງ ໄດ້ຂຶ້ນເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນນະຄອນຫຼວງວຽງຈັນ ຊຸດທີ II ເຊິ່ງໄດ້ຍົກໃຫ້ເຫັນເນື້ອໃນຜົນສຳເລັດຂອງກອງປະຊຸມໃນ ການຕົກລົງບັນຫາສຳຄັນຕ່າງໆພາຍໃນນະຄອນຫຼວງວຽງຈັນ.
ໃນໂອກາດນີ້, ທ່ານ ພົທ. ສຸວອນ ເລືອງບຸນມີ ໄດ້ສະແດງຄວາມຊົມເຊີຍຕໍ່ຜົນງານການເຄື່ອນໄຫວຂອງ ກອງພັນໃຫຍ່ທະຫານຮາບ 941 ທີ່ສາມາດຍາດມາໄດ້ໃນໄລຍະຜ່ານມາ ທັງມີຄຳເຫັນໂອ້ລົມຕໍ່ພະນັກງານຫຼັກແຫຼ່ງ ເຊິ່ງໄດ້ເນັ້ນໜັກຫຼາຍບັນຫາທີ່ສຳຄັນ ໂດຍສະເພາະແມ່ນການຮັກສາມູນເຊື້ອອັນດີງາມ ແລະ ສືບຕໍ່ນຳພາ-ຊີ້ນຳພະ ນັກງານ, ນາຍ ແລະ ພົນທະຫານ ສ້າງຜົນງານນັບມື້ດີຂຶ້ນເລື້ອຍໆ; ປະຕິບັດໜ້າທີ່ວຽກງານວິຊາສະເພາະທີ່ພັກ-ລັດ ມອບໝາຍໃຫ້ດ້ວຍຄວາມຮັບຜິດຊອບສູງ ແລະ ອື່ນໆ. ພ້ອມດຽວກັນນີ້, ທ່ານ ຍັງໄດ້ຍົກໃຫ້ເຫັນຜົນສຳເລັດຂອງ ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX, ເປີດໂອກາດໃຫ້ຜູ້ເຂົ້າຮ່ວມ ແລະ ສະມາຊິກ ສະພາແຫ່ງຊາດ ໄດ້ຖາມ-ຕອບຂໍ້ຂ້ອງໃຈ ແລະ ຂໍ້ສະເໜີຕ່າງໆຢ່າງກົງໄປກົງມາອີກດ້ວຍ.
(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)