(ສພຊ) ໃນຕອນເຊົ້າວັນທີ 27 ມິຖຸນາ 2022 ນີ້, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ຕາງໜ້າຄະນະປະຈຳສະພາແຫ່ງຊາດ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບຜົນສຳເລັດໃນການເຄື່ອນໄຫວວຽກງານຂອງຄະນະປະຈໍາສະພາແຫ່ງຊາດ ແລະ ການຕິດຕາມກວດກາ ຂອງສະພາແຫ່ງຊາດ ກ່ຽວກັບການປະຕິບັດວາລະແຫ່ງຊາດ ໃນໄລຍະຜ່ານມາ ແລະ ວຽກງານການປະຕິຮູບລັດວິສາຫະກິດ ລວມທັງການປັບປຸງໂຄງສ້າງຂອງທະນາຄານທຸລະກິດລັດ  ໃນໄລຍະດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ວ່າ: ຕາງໜ້າໃຫ້ຄະນະປະຈຳສະພາແຫ່ງຊາດ ຮູ້ສຶກປິຕິຍິນດີ ທີ່ໄດ້ມາຖະແຫຼງຂ່າວຕໍ່ສື່ມວນຊົນຈາກສໍານັກຂ່າວຕ່າງໆຂອງ ສປປລາວ ເພື່ອເປັນຂໍ້ມູນໃນການໂຄສະນາເຜີຍແຜ່ໃຫ້ພະນັກງານ-ລັດຖະກອນ, ທະຫານ, ຕຳຫລວດ, ປະຊາຊົນລາວບັນດາເຜົ່າ ໃນຂອບເຂດທົ່ວປະເທດ ແລະ ພໍ່ແມ່ພີ່ນ້ອງຊາວລາວທີ່ອາໄສຢູ່ຕ່າງປະເທດຮັບຊາບ ກ່ຽວກັບຜົນສໍາເລັດການດຳເນີນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ  IX ໃນວາລະການພິຈາລະນາຮັບຮອງເອົາການເຄື່ອນໄຫວວຽກງານຂອງສະພາແຫ່ງຊາດ ຕະຫຼອດໄລຍະ 6 ເດືອນຜ່ານມາ ແລະ ຜົນການຕິດຕາມກວດກາຂອງສະພາແຫ່ງຊາດ ກ່ຽວກັບການປະຕິບັດວາລະແຫ່ງຊາດ ແລະ ວຽກງານຂອງລັດຖະບານກ່ຽວກັບການປະຕິຮູບລັດວິສາຫະກິດ ລວມທັງການປັບປຸງໂຄງສ້າງຂອງທະນາຄານທຸລະກິດລັດຜ່ານມາ. ຂໍອະນຸຍາດ ສັງລວມວຽກງານພົ້ນເດັ່ນດັ່ງນີ້:

1. ການເຄື່ອນໄຫວວຽກງານໃນໄລຍະແຕ່ກອງປະຊຸມສະໄໝສາມັນເທື່ອທີ 2 ຫາ ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ແຜນການ 6 ເດືອນທ້າຍປີ 2022
2. ຜົນສຳເລັດ

ການເຄື່ອນໄຫວວຽກງານຂອງຄະນະປະຈໍາສະພາແຫ່ງຊາດ ນັບແຕ່ໄລຍະກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ດຳເນີນໄປໃນສະພາບການໃນພາກພື້ນ ແລະ ສາກົນ ມີການຜັນແປຢ່າງສັບສົນ, ສະພາບພາຍໃນປະເທດມີຄວາມຫຍຸ້ງຍາກບໍ່ໜ້ອຍ, ບວກກັບມີຜົນກະທົບຈາກການລະບາດຂອງພະຍາດໂຄວິດ-19, ແຕ່ດ້ວຍຄວາມພະຍາຍາມຂອງຄະນະປະຈໍາສະພາແຫ່ງຊາດ ແລະ ການນຳຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະພາປະຊາຊົນຂັ້ນແຂວງ ໄດ້ມີຜົນສໍາເລັດທີ່ພົ້ນເດັ່ນຫຼາຍດ້ານ ຊຶ່ງສາມາດສັງລວມໄດ້ ດັ່ງນີ້:

• ດ້ານນິຕິບັນຍັດ: ໃນກອງປະຊຸມສະໄໝສາມັນເທື່ອທີ 2 ສາມາດສ້າງ ແລະ ປັບປຸງກົດ  ໝາຍໄດ້ ຈໍານວນ 11 ສະບັບ; ກອງປະຊຸມສະໄໝສາມັນເທື່ອທີ 3 ໄດ້ພິຈາລະນາຮັບຮອງເອົາການສ້າງ ແລະປັບປຸງກົດໝາຍ 9 ສະບັບ; ໃນນີ້, ກົດໝາຍສ້າງໃໝ່ 3 ສະບັບ ແລະ ກົດໝາຍປັບປຸງຈຳນວນ 6 ສະບັບ ເຊິ່ງຈະໄດ້ຮັບຮອງເອົາໃນບໍ່ເທົ່າໃດວັນຕໍ່ໜ້ານີ້, ໄດ້ຈັດຕັ້ງກອງປະຊຸມສຳມະນາວິທະຍາສາດແນວຄວາມຄິດໄກສອນ ພົມວິຫານ ກ່ຽວກັບການສ້າງ ແລະ ປະຕິບັດລັດຖະທຳມະນູນ ແຫ່ງ ສປປລາວ; ຈັດກອງປະຊຸມສຳມະນາວິທະຍາສາດ ກ່ຽວກັບການຍົກເວັ້ນບາງມາດຕາຂອງກົດໝາຍ. ພິເສດ, ໄດ້ແຕ່ງຕັ້ງຄະນະຮັບຜິດຊອບຊີ້ນຳການປະເມີນກ່ຽວກັບຈັດຕັ້ງປະຕິບັດກົດໝາຍ 4 ສະບັບ ທີ່ຕິດພັນກັບວາລະແຫ່ງຊາດ ຄື: ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍຊັບສິນຂອງລັດ ແລະ ກົດໝາຍວ່າດ້ວຍແຮ່ທາດ; ນອກຈາກນີ້, ຍັງໄດ້ຕົກລົງການໃຫ້ສັດຕະຍາບັນແກ່ສົນທິສັນຍາ ແລະ ສັນຍາສາກົນ 2 ສະບັບ ແລະ ມີການຕີຄວາມໝາຍ, ອະທິບາຍກົດໝາຍ 3 ສະບັບ.
• ດ້ານຕົກລົງບັນຫາສໍາຄັນພື້ນຖານຂອງປະເທດຊາດ: ກອງປະຊຸມສະໄໝສາມັນເທື່ອທີ 2 ສະພາແຫ່ງຊາດ ຊຸດທີ IX ໄດ້ພິຈາລະນາຮັບຮອງເອົາເນື້ອໃນສຳຄັນຕ່າງໆ ຈຳນວນ 23 ເນື້ອໃນ, ໄດ້ອອກເປັນມະຕິກອງປະຊຸມສະພາແຫ່ງຊາດ ຈຳນວນ 21 ສະບັບ ແລະ ໃນຄັ້ງນີ້ຈະມີມະຕິ 20 ສະບັບ; ຄະນະປະຈໍາສະພາແຫ່ງຊາດ ໄດ້ດໍາເນີນກອງປະຊຸມສະໄໝສາມັນ ແລະ ກອງປະຊຸມຄະນະປະຈໍາສະພາແຫ່ງຊາດສະໄໝວິສາມັນ ຈໍານວນ 9 ຄັ້ງ ແລະ ໄດ້ພິຈາລະນາເນື້ອໃນຕ່າງໆ ຈໍານວນ 148 ເນື້ອໃນ, ໄດ້ອອກເປັນມະຕິຄະນະປະຈໍາສະພາແຫ່ງຊາດ 62 ສະບັບ;
• ດ້ານການຕິດຕາມກວດກາ: ຄະນະປະຈຳສະພາແຫ່ງຊາດ ຮ່ວມກັບຄະນະລັດຖະບານ ໄດ້ດໍາເນີນກອງປະຊຸມຮ່ວມ ເພື່ອປຶກສາຫາລືເປັນເອກະພາບ ໃນການແກ້ໄຂບັນຫາຮີບດ່ວນຂອງສັງຄົມ ໂດຍສະເພາະການແກ້ໄຂຄວາມຫຍຸ້ງຍາກທາງດ້ານເສດຖະກິດ-ສັງຄົມ ຈໍານວນ 2 ຄັ້ງ, ນອກນັ້ນ ໄດ້ມີການປະຊຸມຮ່ວມກັບບັນດາອົງການຂອງລັດ: ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ອົງການກວດສອບແຫ່ງລັດ, ສູນກາງແນວລາວສ້າງຊາດ ແລະ ອົງການກວດກາແຫ່ງລັດ; ແຕ່ງຕັ້ງຄະນະຕິດຕາມກວດກາ ໃນການເຄື່ອນໄຫວຕິດຕາມກວດກາ, ຊຸກຍູ້ ແລະ ເກັບກຳຂໍ້ມູນວຽກງານທີ່ພົ້ນເດັ່ນ ຢູ່ສູນກາງ ແລະ ທ້ອງຖິ່ນ ຈໍານວນ 22 ຄັ້ງ; ປັບປຸງກົນໄກການຮັບ ແລະ ພິຈາລະນາແກ້ໄຂຄໍາຮ້ອງຂໍຄວາມເປັນທໍາຕາມຄໍາສະເໜີ, ຄຳຮ້ອງຂໍຄວາມເປັນທຳຂອງພົນລະເມືອງ ໄດ້ຮັບຜົນສໍາເລັດດີຂຶ້ນເປັນກ້າວໆ ໄດ້ຮັບຄໍາຮ້ອງຂໍຄວາມເປັນທໍາ 695 ສະບັບ, ແກ້ໄຂ 113 ສະບັບ;
• ດ້ານການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ: ສະພາແຫ່ງຊາດໄດ້ຈັດຕັ້ງການຝຶກອົບຮົມ, ສຳມະນາຍົກສູງຂີດຄວາມສາມາດໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ, ພະນັກງານ-ລັດຖະກອນ ຢູ່ສູນກາງ ແລະ ທ້ອງຖິ່ນ ຈຳນວນ 3 ຄັ້ງ ໂດຍມີການປະສານສົມທົບເຊິ່ງກັນ ແລະ ກັນ ຢ່າງເປັນປົກກະຕິ; ຄົ້ນຄວ້າ, ປັບປຸງບັນດານິິຕິກຳຂອງສະພາແຫ່ງຊາດ ເພື່ອເປັນບ່ອນອີງໃຫ້ແກ່ການເຄື່ອນໄຫວວຽກງານຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນໄລຍະໃໝ່ ໄດ້ຈໍານວນ 38 ສະບັບ, ມີການຮັບຮອງເອົາແຜນ 5 ປີ ໃນວຽກງານດ້ານນີ້;
• ດ້ານການເຄື່ອນໄຫວຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ: ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ປະສານສົມທົບກັບສະພາປະຊາຊົນຂັ້ນແຂວງ ປະຕິບັດພາລະບົດບາດຂອງຕົນ ໂດຍການລົງເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນຂັ້ນແຂວງ ຊຸດທີ II ເຊິ່ງໄດ້ສຳເລັດໃນຂອບເຂດທົ່ວປະເທດ ໂດຍມີຈໍານວນ 1,239 ຈຸດ ມີຜູ້ເຂົ້າຮ່ວມທັງໝົດ 114,204 ຄົນ; ໄດ້ຊີ້ນໍາກົງຈັກເສນາທິການພາຍໃນສະພາແຫ່ງຊາດລົງຕິດຕາມ ແລະ ຊຸກຍູ້ວຽກງານຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ໃນການປະຕິບັດວຽກງານຕ່າງໆ ຕາມພາລະບົດບາດຂອງຕົນ ໃນນັ້ນ, ຄະນະເລຂາທິການສະພາແຫ່ງຊາດ ລົງໄປຈໍານວນ 2 ຄັ້ງ 4 ຄະນະ ຢູ່ຈຳນວນ 9 ແຂວງ, ກໍາມາທິການວຽກງານສະມາຊິກສະພາແຫ່ງຊາດ ລົງໄປຈໍານວນ 2 ຄັ້ງ ມີ 6 ຄະນະໃນ 9 ແຂວງ. ນອກນັ້ນ ຍັງໄດ້ຮ່າງມະຕິວ່າດ້ວຍການຈັດຕັ້ງ ແລະ ການເຄື່ອນໄຫວວຽກງານຂອງສະມາຄົມສະມາຊິກສະພາແຫ່ງຊາດ ເພື່ອສົ່ງເສີມວຽກງານປະຊາກອນ ແລະ ການພັດທະນາ ລວມທັງການກໍານົດທິດທາງແຜນການເຄື່ອນໄຫວວຽກງານ 5 ປີ ( 2021-2025 ).
• ດ້ານການເຄື່ອນໄຫວວຽກງານການຕ່າງປະເທດ: ເຖິງແມ່ນວ່າຈະມີການແຜ່ລະບາດຂອງພະຍາດໂຄວິດ-19 ກໍຕາມ ແຕ່ສະພາແຫ່ງຊາດ ກໍໄດ້ເອົາໃຈໃສ່ນໍາພາ-ຊີ້ນໍາຜັນຂະຫຍາຍແນວທາງຂອງພັກ ຕໍ່ກັບການເຄື່ອນໄຫວວຽກງານການຕ່າງປະເທດ ດ້ວຍການພົບປະ, ແລກປ່ຽນບົດຮຽນ, ການຢ້ຽມຢາມ ຢ່າງເປັນປົກກະຕິ ຈໍານວນ 29 ຄັ້ງ ໃນຮູບແບບປະຊຸມທາງໄກ ແລະ ປົກກະຕິ.

2. ແຜນການເຄື່ອນໄຫວວຽກງານ ໃນໄລຍະແຕ່ກອງປະຊຸມສະໄໝສາມັນ ເທື່ອທີ 3 ຮອດ ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX.

ໃນໄລຍະແຕ່ກອງປະຊຸມສະໄໝສາມັນ ເທື່ອທີ 3 ຮອດ ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ໄດ້ກໍານົດແຜນການເຄື່ອນໄຫວ ດັ່ງນີ້:

• ຈັດຕັ້ງຜັນຂະຫຍາຍແຜນການສ້າງ ແລະ ປັບປຸງກົດໝາຍ ໃນທ້າຍປີ 2022 ຂອງສະພາແຫ່ງຊາດ ໃຫ້ບັນລຸຕາມແຜນການ ຈໍານວນ 19 ສະບັບ;
• ພິຈາລະນາຕົກລົງບັນຫາສໍາຄັນພື້ນຖານຂອງປະເທດຊາດ ຕາມພາລະບົດບາດ ສິດ ແລະ ໜ້າທີ່ ໃຫ້ສອດຄ່ອງກັບແນວທາງນະໂຍບາຍ, ລັດຖະທໍາມະນູນ ແລະ ກົດໝາຍຂອງ ສປປ ລາວ;
• ຮັບຟັງລາຍງານ ແລະ ຮັບຮອງເອົາບັນດາບົດລາຍງານຂອງລັດຖະບານ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ອົງການກວດສອບແຫ່ງລັດ, ອົງການກວດກາແຫ່ງລັດ ກ່ຽວກັບການເຄື່ອນໄຫວປະຈໍາປີ 2022 ແລະ ທິດທາງປີ 2023;
• ຮັບປະກັນການປະຕິບັດພາລະບົດບາດຕິດຕາມກວດກາ ຂອງສະພາແຫ່ງຊາດ ຕາມລັດຖະທໍາມະນູນ ແລະ ກົດໝາຍ ໃຫ້ມີປະສິດທິພາບ ແລະ ປະສິດທິຜົນ;
• ເອົາໃຈໃສ່ຍົກສູງຂີດຄວາມສາມາດໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ພະນັກງານ-ລັດຖະກອນ ໄປຕາມແຜນການລວມຂອງສະພາແຫ່ງຊາດ;
• ຈະເພີ່ມທະວີການພົວພັນຮ່ວມມື ແລະ ປະສານງານຢ່າງກົມກຽວ ລະຫວ່າງສະພາແຫ່ງຊາດ ກັບບັນດາອົງການຂອງລັດ ແລະ ສະພາປະຊາຊົນຂັ້ນແຂວງ ໃຫ້ນັບມື້ຄ່ອງຕົວດີຂຶ້ນກວ່າເກົ່າ ເພື່ອຮັບປະກັນການປະຕິບັດໜ້າທີ່ວຽກງານຂອງ ສະມາຊິກສະພາແຫ່ງຊາດ ກໍຄືສະພາແຫ່ງຊາດ ໃຫ້ໄດ້ຮັບຜົນສໍາເລັດ;
• ຮັບປະກັນໃຫ້ການເຄື່ອນໄຫວວຽກງານການຕ່າງປະເທດຂອງສະພາແຫ່ງຊາດ ໃຫ້ສອດຄ່ອງກັບແນວທາງການຕ່າງປະເທດຂອງພັກ, ປະກອບສ່ວນຍົກສູງບົດບາດຂອງສະພາແຫ່ງຊາດ ໃນເວທີພາກພື້ນ ແລະ ສາກົນ.

1. ຜົນການຕິດຕາມກວດກາ ການຈັດຕັ້ງປະຕິບັດວາລະແຫ່ງຊາດ ໃນໄລຍະຜ່ານມາ ແລະ ແຜນການຕິດຕາມກວດກາໃນຕໍ່ໜ້າ ຂອງສະພາແຫ່ງຊາດ
2. ການຕິດຕາມກວດກາ ການຈັດຕັ້ງປະຕິບັດວາລະແຫ່ງຊາດ ໃນໄລຍະຜ່ານມາ

• ກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ໄດ້ພິຈາລະນາຮັບຮອງເອົາວາລະແຫ່ງຊາດ 2 ສະບັບ ໂດຍໄດ້ອອກມະຕິຂອງກອງປະຊຸມສະພາແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ມະຕິ ວ່າດ້ວຍການແກ້ໄຂບັນຫາຢາເສບຕິດ;

2) ຄະນະປະຈໍາສະພາແຫ່ງຊາດ ແລະ ຄະນະລັດຖະບານ ໄດ້ຈັດກອງປະຊຸມຮ່ວມ 2 ຄັ້ງ ເພື່ອປຶກສາຫາລືຫົວຂໍ້ສະເພາະ ກ່ຽວກັບຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດ 2 ສະບັບ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ເກີດຂຶ້ນໃນແຕ່ລະໄລຍະ ເປັນຕົ້ນ ການແກ້ໄຂສະພາບບັນຫານໍ້າມັນເຊື້ອໄຟ ລວມທັງການຕົກລົງຫຼຸດອັດຕາອາກອນຊົມໃຊ້ນໍ້າມັນເຊື້ອໄຟລົງ, ການແກ້ໄຂບັນຫາຢາເສບຕິດ ແລະ ວຽກງານອື່ນໆ;

3) ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດວາລະແຫ່ງຊາດ ພ້ອມກັບການຕິດຕາມກວດກາຫົວຂໍ້ຕ່າງໆ ໂດຍສະເພາະ ການຕິດຕາມກວດກາ ການດໍາເນີນທຸລະກິດການຂຸດຄົ້ນ ແລະ ປຸງແຕ່ງແຮ່ເຫຼັກໃນໄລຍະເຮັດທົດລອງ; ການຜະລິດກະສິກໍາ ເພື່ອຄໍ້າປະກັນສະບຽງອາຫານ, ທົດແທນການນໍາເຂົ້າ ແລະ ເປັນສິນຄ້າສົ່ງອອກ; ການສົ່ງເສີມວິສາຫະກິດຂະໜາດນ້ອຍ, ຂະໜາດກາງ ແອລະ ຈຸນລະວິສາຫະກິດ.

4) ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາແຫ່ງຊາດ ໄດ້ມີຄວາມພະຍາຍາມຈັດຕັ້ງຜັນຂະຫຍາຍ ມະຕິກອງປະຊຸມຄົບຄະນະຂອງສູນກາງພັກສະໄໝວິສາມັນ, ຄໍາສັ່ງຂອງກົມການເມືອງສູນກາງພັກ, ມະຕິກອງປະຊຸມສະພາແຫ່ງຊາດ ທີ່ໄດ້ຮັບຮອງເອົາວາລະແຫ່ງຊາດ 2 ສະບັບ ເຂົ້າໃນການເຄື່ອນໄຫວວຽກງານຂອງຕົນ; ປະສານສົມທົບກັບ ຄະນະພັກ, ສະພາປະຊາຊົນຂັ້ນແຂວງ, ອົງການປົກຄອງແຂວງ ຈັດຕັ້ງປະຕິບັດວາລະແຫ່ງຊາດ ຢູ່ໃນຂອບເຂດແຂວງ, ນະຄອນຫຼວງ ຢ່າງເປັນຂະບວນການຟົດຟື້ນໃນທຸກຂະແໜງການ.

ຜ່ານການລົງຕິດຕາມກວດກາ ສາມາດເກັບກໍາໄດ້ສະພາບພົ້ນເດັ່ນ ຂອງການຈັດຕັ້ງປະຕິບັດວາລະແຫ່ງຊາດ ດັ່ງນີ້:

– ບັນດາກະຊວງ, ອົງການ ໄດ້ເອົາໃຈໃສ່ຂະຫຍາຍການຈັດເກັບລາຍຮັບດ້ວຍລະບົບທັນສະໄໝ; ຄົ້ນຄວ້າປັບປຸງດ້ານນະໂຍບາຍ, ນິຕິກໍາ ເພື່ອສ້າງຄວາມເຂັ້ມແຂງໃຫ້ແກ່ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ເພື່ອຂະຫຍາຍຖານການຜະລິດ; ສົ່ງເສີມການຜະລິດເປັນສິນຄ້າ ເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ; ຄົ້ນຄວ້າປັບປຸງກົດໝາຍ ແລະ ນິຕິກໍາໃຕ້ກົດໝາຍກ່ຽວກັບແຮ່ທາດ ໂດຍສະເພາະ ຂັ້ນຕອນຕ່າງໆໃຫ້ໜ້ອຍລົງ, ປັບປຸງລັດຖະບັນຍັດ ກ່ຽວກັບອັດຕາຄ່າຊັບພະຍາກອນທໍາມະຊາດ ໃນການເກັບລາຍຮັບໃຫ້ງ່າຍ, ໄວ ແລະ ໃຫ້ໄດ້ຫຼາຍຂຶ້ນ; ຄົ້ນຄວ້າການຈັດສັນທີ່ດິນ ຢູ່ທ້ອງຖິ່ນ ລຽບຕາມແລວທາງລົດໄຟລາວ-ຈີນ ແລະ ແລວທາງເສດຖະກິດລາວ-ຈີນ, ກວດກາການນໍາໃຊ້ທີ່ດິນລັດໃນໂຄງການລົງທຶນຕ່າງໆ, ປັບປຸງນິຕິກໍາກ່ຽວກັບການຂຶ້ນທະບຽນອອກໃບຕາດິນ ແລະ ອື່ນໆ.

– ບັນດາແຂວງ, ນະຄອນຫຼວງ ກໍໄດ້ເອົາໃຈໃສ່ຈັດຕັ້ງປະຕິບັດວາລະແຫ່ງຊາດ ດ້ວຍການຜັນຂະ ຫຍາຍມະຕິ, ຄໍາສັ່ງຂອງສູນກາງພັກ, ມະຕິກອງປະຊຸມສະພາແຫ່ງຊາດ ເປັນນິຕິກໍາຂອງອົງຄະນະພັກ, ສະພາປະຊາຊົນຂັ້ນແຂວງ ເພື່ອເປັນບ່ອນອີງໃນການຈັດຕັ້ງປະຕິບັດ; ເອົາໃຈໃສ່ໂຄສະນາເຜີຍແຜ່ໃຫ້ຂະແໜງການ, ຮາກຖານ ກໍຄືປະຊາຊົນບັນດາເຜົ່າ ໄດ້ເຂົ້າໃຈຢ່າງກວ້າງຂວາງ ແລະ ມີການເຂົ້າຮ່ວມໃນການຈັດຕັ້ງປະຕິບັດວາລະແຫ່ງຊາດ; ການຈັດຕັ້ງຜັນຂະຫຍາຍວາລະແຫ່ງຊາດ ເປັນວຽກງານຈຸດສຸມຂອງແຂວງ, ນະຄອນຫຼວງ ເປັນຕົ້ນ ການຜະລິດກະສິກໍາເປັນສິນຄ້າ, ການຂຸດຄົ້ນແຫຼ່ງລາຍຮັບທີ່ແຕ່ລະແຂວງ ຕາມທ່າແຮງບົ່ມຊ້ອນຂອງຕົນ; ເອົາໃຈໃສ່ຄຸ້ມຄອງລາຍຈ່າຍງົບປະມານຂອງລັດ ແລະ ຈັດຕັ້ງປະຕິບັດມາດຕະການປະຢັດ, ເຂັ້ມງວດຕໍ່ການປະຕິບັດວິໄນການເງິນ,​ ປະຢັດລາຍຈ່າຍບໍລິຫານ ແລະ ການລົງທຶນຂອງລັດ;

– ຕໍ່ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຢູ່ບັນດາກະຊວງ, ອົງການ ແລະ ບັນດາແຂວງ, ນະຄອນຫຼວງ ໄດ້ມີການໂຄສະນາເຜີຍແຜ່ນິຕິກໍາຂອງພັກ-ລັດ ໂດຍຜ່ານສື່ມວນຊົນປະເພດຕ່າງໆ ໃຫ້ພະນັກງານ, ທະຫານ, ຕໍາຫຼວດ ກໍຄື ປະຊາຊົນບັນດາເຜົ່າ ໄດ້ເຊື່ອມຊຶມ, ເຂົ້າໃຈຜົນຮ້າຍຂອງຢາເສບຕິດ; ຄົ້ນຄວ້າການປັບປຸງກົດ ໝາຍວ່າດ້ວຍຢາເສບຕິດ ແລະ ນິຕິກໍາໃຕ້ກົດໝາຍທີ່ກ່ຽວຂ້ອງ; ສາມາດມ້າງຄະດີກ່ຽວກັບຢາເສບຕິດໃນຂອບເຂດທົ່ວປະເທດ ໄດ້ 4.094 ເລື່ອງ, ຈັບຜູ້ຕ້ອງຫາໄດ້ 5,818 ຄົນ, ຍຶດຂອງກາງໄດ້ຈໍານວນຫຼາຍ; ຂຶ້ນບັນຊີເປົ້າໝາຍຄ້າຂາຍຢາເສບຕິດ ທົ່ວປະເທດ ມີຈໍານວນ 1.969 ຄົນ;

ຜົນສໍາເລັດຂອງການຕິດຕາມກວດກາ ການຈັດຕັ້ງປະຕິບັດວາລະແຫ່ງຊາດດັ່ງກ່າວມາຂ້າງເທິງນັ້ນ ແມ່ນຍ້ອນຄະນະປະຈໍາສະພາແຫ່ງຊາດ ເອົາໃຈໃສ່ນໍາພາ-ຊີ້ນໍາ ໂດຍໄດ້ຍົກໃຫ້ເຫັນເຖິງຄວາມສໍາຄັນ, ຄວາມຈໍາເປັນ ເພື່ອນໍາເອົາປະເທດຫຼຸດພົ້ນອອກຈາກບັນຫາຄວາມຫຍຸ້ງຍາກທາງດ້ານເສດຖະກິດ.

2. ແຜນການຕິດຕາມກວດກາໃນຕໍ່ໜ້າ ຂອງສະພາແຫ່ງຊາດ
   • ຕໍ່ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ–ການເງິນ:

• ຕິດຕາມກວດກາ ໂຄງການເຊົ່າຊັບສິນ, ທີ່ດິນລັດ, ສໍາປະທານທີ່ດິນສ້າງເຂື່ອນໄຟຟ້າ ແລະ ອື່ນໆ;
• ຕິດຕາມກວດກາ ໂຄງການທົດລອງຂຸດຄົ້ນ ແລະ ສົ່ງອອກແຮ່ທາດ;
• ຕິດຕາມກວດກາ ໂຄງການສົ່ງເສີມການຜະລິດກະສິກໍາທົດແທນການນໍາເຂົ້າ ແລະ ເປັນສິນຄ້າສົ່ງອອກ;
• ຕິດຕາມກວດກາ ການຄຸ້ມຄອງເຂດເສດຖະກິດພິເສດ ຢູ່ບັນດາແຂວງ;
• ຕິດຕາມກວດກາ ໂຄງການເຊື່ອມໂຍງ-ເຊື່ອມຈອດ ເປັນຕົ້ນ ໂລຊິສຕິກ ແລະ ນໍາໃຊ້ທ່າແຮງລົດໄຟລາວ-ຈີນ ເພື່ອສ້າງຄວາມສະດວກໃຫ້ແກ່ການຂົນສົ່ງພາຍໃນ ແລະ ຜ່ານແດນ;
• ການສ້າງຄວາມເຂັ້ມແຂງດ້ານງົບປະມານ ໂດຍສະເພາະການຫັນເປັນທັນສະໄໝ, ມາດຕະການປະຢັດ ແລະ ການສ້າງຍຸດທະສາດແກ້ໄຂໜີ້ສິນຂອງລັດ;
• ຕິດຕາມກວດກາການສ້າງສະຖຽນລະພາບດ້ານເງິນຕາ (ເງິນເຟີ້, ອັດຕາແລກປ່ຽນ, ຄັງສໍາຮອງ) ການປະເມີນດຸນການຄ້າ, ດຸນຊໍາລະສະສາງ ແລະ ສັງລວມລາຍຮັບຈາກການສົ່ງອອກຜ່ານລະບົບທະນາຄານ;
• ຕິດຕາມກວດກາຜົນການປະຕິຮູບ 5 ລັດວິສາຫະກິດ ຍຸດທະສາດ ( ກໍານົດໃນຮ່າງມະຕິ ສະ ເໜີໃຫ້ລັດຖະບານລາຍງານຜົນຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດ IX );
• ຕິດຕາມກວດກາ ກິດຈະການອື່ນໆ ຢູ່ທ້ອງຖິ່ນ ຕິດພັນກັບວາລະແຫ່ງຊາດ ທີ່ຕ້ອງການໃຫ້ສູນກາງລົງໄປຊຸກຍູ້ແກ້ໄຂ.
  • ຕໍ່ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ:
• ຕິດຕາມກວດກາ ການໂຄສະນາເຜີຍແຜ່ກົດໝາຍ, ນິຕິກໍາກ່ຽວຂ້ອງເຖິງວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ຜົນຮ້າຍຂອງຢາເສບຕິດ ໃນທົ່ວສັງຄົມໃນໄລຍະ 2;
• ຕິດຕາມກວດກາ ການເຄື່ອນໄຫວແກ້ໄຂຄະດີຢາເສບຕິດ ຂອງເຈົ້າໜ້າທີ່ ທີ່ປະຕິບັດກົດໝາຍ ໂດຍສະເພາະ ການສັ່ງຈັບຕົວ, ການກັກຂັງພາງ, ການສືບສວນ-ສອບສວນ, ການສັ່ງຟ້ອງຂອງໄອຍະການ ແລະ ການຕັດສິນຂອງສານ;
• ຕິດຕາມກວດກາ ບັນດາສູນບໍາບັດ ແລະ ສະຖານທີ່ປິ່ນປົວ ຜູ້ຕິດຢາເສບຕິດ;
• ຕິດຕາມກວດກາ ປະເມີນການຈັດຕັ້ງປະຕິບັດກົດໝາຍຈໍານວນໜຶ່ງ ໃນຂົງເຂດຍຸຕິທໍາ ທີ່ຕິດພັນກັບການປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ.
• ຄວາມຄືບໜ້າການປະຕິຮູບລັດວິສາຫະກິດ ລວມທັງການປັບປຸງໂຄງສ້າງຂອງທະນາຄານທຸລະກິດລັດ

ເພື່ອປະຕີບັດສອງວາລະແຫ່ງຊາດວ່າດ້ວຍການແກ້ໄຂຄວາມຍຸ້ງຍາກດ້າຍເສດຖະກິດ-ການເງິນ ໃນປະຈຸບັນ, ລັດຖະບານໄດ້ຖືສຳຄັນການປັບປຸງ ບັນດາລັດວະສາຫະກິດຂອງລັດທີ່ມີຢູ່ໃນທົ່ວສປະເທດຈຳນວນ 178 ຫົວໜ່ວຍ, ໃນນີ້ ຢູ່ຂັ້ນສູງກາງ 96 ຫົວ ໜ່ວຍ ແລະ ຢູ່ ທ້ອງຖິ່ນ 82 ຫົວໜ່ວຍ, ເຊິ່ງສ່ວນໃຫຍ່ເປັນລັດວິສາຫະກິດທີ່ດຳເນີນທຸລະກິດບໍ່ມີຜົນກຳໄລ ຫຼື ເວົ້າແຈ້ງ ແມ່ນຫຼຸບທຶນມາໂດຍຕະຫຼອດຫຼາຍປີຊ້ອນ ອີກບໍ່ພໍຍັງສ້າງໜີ້ສິນໃຫ້ແກ່ລັດຖະບານຢ່າງຫຼວງຫຼາຍ.

ໃນກອງປະຊຸມ ສະໄໝສາມັນຄັ້ງທີ 3 ຄັ້ງນີ້, ບັນດາການນຳຂອງກະຊວງການເງິນ, ທະນາຄານແຫ່ງ ສປປ ລາວ, ກະຊວງພະລັງງານ-ບໍ່ແຮ່, ກະຊວງໂຍທາທິການ ແລະ ຂົນສົ່ງ ໄດ້ມີການລາຍງານ ແລະ ຊີ້ແຈງ ກ່ຽວກັບວຽກງານດັ່ງກ່າວໃຫ້ຜູ້ແທນສະພາແຫ່ງຊາດ.

ປະຈຸບັນ, ລັດຖະບານພວມສຸມໃສ່ການປະຕິຮູບ 5 ລັດວິສາຫະກິດຍຸດທະສາດຄື: ລັດວິສາຫະກິດໄຟຟ້າລາວ, ບໍລິສັດຜະລິດ-ໄຟຟ້າລາວ ມະຫາຊົນ, ລັດວິສາຫະກິດນ້ຳມັນເຊື້ອໄຟລາວ, ລັດວິສາຫະກິດການບິນລາວ, ລັດວິສາຫະກິດ ພັດທະນາກະສິກຳ, ອຸດສາຫະກຳ ແລະ ລັດວິສາຫະກິດ ບໍລິການ ຂາເຂົ້າ-ຂາອອກ, ລັດຖະບານຍັງໄດ້ມີ ການດຳເນີນແກ້ໄຂ ທະນາຄານທຸລະກິດລັດ ທີ່ຂາດທຶນຕໍ່ເນື່ອງ ຄື: ທະນາຄາພັດທະນາລາວ ແລະ ທະນາຄານສົ່ງເສີມກະສິກຳ ໂດຍຫັນໄປສູ່ການຮ່ວມທຶນກັບພາກເອກກະຊົນພາຍໃນໂດຍຂາຍຫຸ້ນອອກ 70 ເປີເຊັນ.

ໃນນາມຕາງໜ້າຄະນະປະຈຳສະພາແຫ່ງຊາດ, ຂໍຂອບໃຈມາຍັງສື່ມວນຊົນຈາກສໍານັກຂ່າວຕ່າງໆ ໂທລະພາບແຫ່ງຊາດ ແລະ ວິທະຍຸກະຈາຍສຽງແຫ່ງຊາດ, ສື່ສິ່ງພິມປະເພດຕ່າງໆ ທີ່ໄດ້ຕິດຕາມການດໍາເນີນກອງປະຊຸມສະພາແຫ່ງຊາດ ເພື່ອນໍາໄປເຜີຍແຜ່ໃຫ້ພະນັກງານ, ທະຫານ, ຕຳຫຼວດ, ພໍ່ແມ່ພີ່ນ້ອງ, ປະຊາຊົນລາວບັນດາເຜົ່າທຸກຊັ້ນຄົນ ໃນທົ່ວປະເທດ ແລະ ພີ່ນ້ອງຊາວລາວທີ່ອາໄສຢູ່ຕ່າງປະເທດ ໄດ້ຮັບຊາບເຂົ້າໃຈຢ່າງກວ້າງຂວາງ, ຈະແຈ້ງ ແລະ ແທນຕົວຈິງ.