(ສພຊ) ວັນທີ 15 ກໍລະກົດ 2021 ທີ່ສະພາແຫ່ງຊາດ, ສະຫາຍ ສຈ.ປອ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະທານຄະນະມິດຕະພາບລັດຖະສະພາລາວ-ກູບາ ທັງເປັນປະທານສະມາຄົມມິດຕະພາບລາວ-ກູບາ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ປາໂບຣ ແອນໂທນີໂອ ໂຣດິເກດສ ວິດໍ (Pablo Antonio Rodriguez Vidal) ເອກອັກຄະລັດຖະທູດ  ແຫ່ງ ສາທາລະນະລັດກູບາ (ສ.ກູບາ) ປະຈຳ ສປປລາວ.
ໃນໂອກາດນີ້, ສະຫາຍເອກອັກຄະລັດຖະທູດ ໄດ້ສະແດງຄວາມຊົມເຊີຍຕໍ່ສະຫາຍ ສຈ.ປອ ຈະເລີນ ເຍຍປາວເຮີ ທີ່ໄດ້ດຳລົງຕຳແໜ່ງເປັນຮອງປະທານສະພາແຫ່ງຊາດ ແລະ ປະທານຄະນະມິດຕະພາບລັດຖະສະພາລາວ-ກູບາ ແລະ ສະແດງຄວາມຂອບໃຈທີ່ສະຫາຍໄດ້ສະຫລະເວລາຕ້ອນຮັບ ໃນຊ່ວງໄລຍະການແຜ່ລະບາດຂອງພະຍາດໂຄວິດ-19; ພ້ອມທັງລາຍງານການພົວພັນຮ່ວມມື ລະຫວ່າງ ສປປລາວ ແລະ ສ.ກູບາ ເຊິ່ງໃນໄລຍະຜ່ານມາໄດ້ມີການແລກປ່ຽນຄະນະຜູ້ແທນຂັ້ນສູງລະຫວ່າງສອງປະເທດ ໂດຍສະເພາະການໄປຢ້ຽມຢາມ ສ.ກູບາ ຂອງສະຫາຍ ນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ຊຸດທີ VIII ແລະ ໄດ້ເຊື້ອເຊີນສະຫາຍປະທານສະພາອຳນາດປະຊາຊົນແຫ່ງກູບາ ມາຢ້ຽມຢາມລາວ  ພ້ອມທັງໄດ້ລາຍງານຜົນສຳເລັດການຮ່ວມມືຫລາຍດ້ານ ເປັນຕົ້ນການຮ່ວມມືດ້ານການເມືອງ, ສາທາລະນະສຸກ, ການສຶກສາ-ກິລາ ແລະ ອື່ນໆ; ພ້ອມນັ້ນ, ສະຫາຍເອກອັກຄະລັດຖະທູດແຫ່ງ ສ.ກູບາ ໄດ້ແຈ້ງສະພາບຄວາມຫຍຸ້ງຍາກ ແລະ ຄວາມບໍ່ສະຫງົບທີ່ເກີດຈາກອິດທິກຳລັງປໍລະປັກ ທີ່ເກີດຂຶ້ນຢູ່ພາຍໃນປະເທດຕື່ມອີກ.
ຈາກນັ້ນ, ສະຫາຍ ສຈ.ປອ. ຈະເລີນ ເຍຍປາວເຮີ ໄດ້ສະແດງຄວາມຍິນດີຕ້ອນຮັບສະຫາຍເອກອັກຄະລັດຖະທູດ ແລະ ສະແດງຄວາມເປັນຫ່ວງເປັນໃຍຕໍ່ປະຊາຊົນກູບາ  ທີ່ກຳລັງປະສົບກັບຄວາມຫຍຸ້ງຍາກ ແລະ ສິ່ງທ້າທາຍຕ່າງໆ ແລະ ພ້ອມທັງສະແດງຄວາມເຊື່ອໝັ້ນວ່າພັກ, ລັດ ແລະ ປະຊາຊົນກູບາ ຈະສາມາດກ້າວຜ່ານໄປໄດ້ໂດຍໄວ; ພ້ອມນັ້ນ, ທ່ານຍັງໄດ້ແຈ້ງກ່ຽວກັບຜົນສຳເລັດຂອງການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ຄະນະມິດຕະພາບລັດຖະສະພາລາວ-ກູບາ ໃຫ້ຝ່າຍກູບາຊາບ ພ້ອມທັງເຫັນດີສືບຕໍ່ແລກປ່ຽນການຢ້ຽມຢາມຂອງຄະນະຜູ້ແທນຂັ້ນຕ່າງໆ ແລະ ຮ່ວມມືໃນຂະແໜງການຕ່າງໆ ທີ່ສອງຝ່າຍມີບົດບັນທຶກຮ່ວມກັນໃຫ້ເປັນຮູບປະທຳຍິ່ງຂຶ້ນ ເປັນຕົ້ນຂະແໜງສຶກສາ, ສາທາລະນະສຸກ, ກິລາ ແລະ ສືບຕໍ່ຜັນຂະຫຍາຍການຮ່ວມມືໃນຂົງເຂດອື່ນໆ ເພື່ອປະກອບສ່ວນໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ທີ່ເປັນມູນເຊື້ອດີງາມມາແຕ່ດົນນານ ບົນພື້ນຖານຄູ່ຮ່ວມອຸດົມການສັງຄົມນິຍົມໃຫ້ແຕກດອກອອກຜົນຍິ່ງໆຂຶ້ນ ແລະ ເພື່ອຜົນປະໂຫຍດຂອງປະຊາຊົນສອງຊາດລາວ-ກູບາ.

ແຫຼ່ງຂ່າວທີ່ມາ: ສະພາແຫ່ງຊາດ