(ສພຊ) ວັນທີ 19 ສິງຫາ 2019, ທີ່ສະພາປະຊາຊົນແຂວງ (ສພຂ) ຈໍາປາສັກ, ທ່ານ ພົທ. ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ປະກອບດ້ວຍທ່ານ ນາງ ວັນເພັງ ແກ້ວນະຄອນ ຮອງປະທານກໍາມາທິການບັນດາເຜົ່າ, ທ່ານ ພູມີ ວັນດີໄຊ ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ສະພາແຫ່ງຊາດ (ສພຊ), ບັນດາທ່ານຫົວໜ້າ-ຮອງຫົວໜ້າກົມ ພ້ອມດ້ວຍວິຊາການທີ່ກ່ຽວຂ້ອງຈາກສະພາແຫ່ງຊາດ ໄດ້ເຮັດວຽກກັບ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 15 ແຂວງຈໍາປາສັກ, ສພຂ ແລະ ບັນດາພະແນກການຂອງແຂວງ, ໂດຍການຕ້ອນຮັບຂອງທ່ານ ເມກສະຫວັນ ພົມພິທັກ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ປະທານ ສພຂ ຈໍາປາສັກ; ເຂົ້າຮ່ວມມີທ່ານ ຮອງເຈົ້າແຂວງ, ມີສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ຕາງໜ້າ ພະແນກພາຍໃນ, ອົງການແນວລາວສ້າງຊາດແຂວງ, ອົງການໄອຍະການປະຊາຊົນ, ກອງບັນຊາການປ້ອງກັນຊາດ, ກອງບັນຊາການປ້ອງກັນຄວາມສະຫງົບ ແລະ ພາກສ່ວນກ່ຽວຂ້ອງຈໍານວນໜຶ່ງ.
ຈຸດປະສົງແມ່ນເພື່ອຕິດຕາມກວດກາການຈັດຕັ້ງປະຕິບັດກົດໝາຍ ແລະ ລະບຽບການທີ່ກ່ຽວຂ້ອງ ຜູ້ເຊື່ອຖືສາສະໜາຕ່າງໆ ແລະ ການເຄື່ອນຍ້າຍພົນລະເມືອງຂອງປະຊາຊົນສອງຟາກຊາຍແດນທີ່ບໍ່ຖືກຕ້ອງ ຕາມກົດໝາຍ, ຕະຫລອດຮອດການປະຕິບັດໜ້າທີ່ ແລະ ຄວາມສະດວກ-ຫຍຸ້ງຍາກ ຂອງກໍາລັງປ້ອງກັນຊາດ-ປ້ອງກັນຄວາມສະຫງົບ ແລະ ເຈົ້າໜ້າທີ່ດ່ານຊາຍແດນ.
ບັນດາພະແນກການຂອງແຂວງ ໄດ້ລາຍງານໃຫ້ຊາບວ່າ: ກ່ຽວກັບວຽກງານສາສະໜາ ແມ່ນມີການເຄື່ອນໄຫວສາສະໜາຈໍານວນໜຶ່ງ ທີ່ຂັດຕໍ່ແນວທາງນະໂຍບາຍຂອງພັກ, ລະບຽບ-ກົດໝາຍຂອງລັດ, ໂດຍສະເພາະແມ່ນຢູ່ເມືອງໂຂງ ແລະ ເມືອງມຸນລະປະໂມກ, ແຕ່ກໍສາມາດແກ້ໄຂ ແລະ ສະກັດກັ້ນໄດ້ທັນເວລາ; ການຄ້າມະນຸດ ແມ່ນມີການຕົວະຍົວະຫລອງລວງຊາວໜຸ່ມຈໍານວນໜຶ່ງໄປອອກແຮງງານຢູ່ປະເທດເພື່ອນບ້ານ ດ້ວຍຫລາຍຮູບແບບ; ກົນໄກປະສານງານໃນການດໍາເນີນຄະດີ ໄດ້ດໍາເນີນກອງປະຊຸມປະສານງານເປັນປົກກະຕິ ທຸກໆ 3 ເດືອນ ລະຫວ່າງອົງການໄອຍະການປະຊາຊົນ, ສານປະຊາຊົນ, ພະແນກຍຸຕິທໍາ ສພຂ ແລະ ກອງບັນຊາການປ້ອງກັນຄວາມສະຫງົບ, ຄະດີສ່ວນໃຫຍ່ແມ່ນກ່ຽວຂ້ອງກັບຢາເສບຕິດ; ໂດຍລວມສະພາບຊາຍແດນ ແມ່ນສາມາດຮັກສາໄດ້ຄວາມສະຫງົບໂດຍພື້ນຖານ ແລະ ອື່ນໆ.
ທ່ານ ພົທ. ແສງນວນ ໄຊຍະລາດ ໄດ້ມີຄໍາເຫັນໂອ້ລົມວ່າ: ໃຫ້ແກ້ໄຂບັນຫາທາງສາສະໜາ ດ້ວຍວິທີສຶກສາອົບຮົມ ດ້ວຍເຫດດ້ວຍຜົນ ບໍ່ໃຫ້ໃຊ້ຄວາມຮຸນແຮງ, ສືບຕໍ່ເກັບກໍາຕິດຕາມບັນຫາການຄ້າມະນຸດ, ໃຫ້ອໍານາດການປົກຄອງແຂວງ ເພີ່ມທະວີວຽກງານກໍ່ສ້າງຮາກຖານການເມືອງ ໂດຍການປັບປຸງລະບົບການເມືອງຢູ່ຮາກຖານ, ປັບປຸງວຽກງານປ້ອງກັນຊາດ-ປ້ອງກັນຄວາມສະຫງົບ; ສືບຕໍ່ເອົາໃຈໃສ່ເຂັ້ມງວດຕິດຕາມກວດການເຂົ້າ-ອອກຜ່ານດ່ານຊາຍແດນ ແຕ່ເຮັດແນວໃດເຮັດໃຫ້ເປັນຊາຍແດນມິດຕະພາບ; ເພີ່ມທະວີການປະສານງານລະຫວ່າງ ສພຂ, ໄອຍະການປະຊາຊົນແຂວງ, ສານປະຊາຊົນແຂວງ ກໍຄືອໍານາດການປົກຄອງແຂວງ ໂດຍມີນິຕິກໍາເປັນບ່ອນອີງ; ທຸກພາກສ່ວນ ຕ້ອງໄດ້ສ້າງຂະບວນການຂໍ່ານັບຮັບຕ້ອນກອງປະຊຸມພັກ 3 ຂັ້ນ ເຊິ່ງຕິດພັນກັບການເລືອກບຸກຄະລາກອນໃຫ້ແກ່ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ພ້ອມນັ້ນ ກໍສ້າງຂະບວນການຕ້ອນຮັບກອງປະຊຸມໃຫຍ່ ຄັ້ງທີ XI ຂອງພັກ; ບັນຫາອື່ນໆ ແມ່ນຈະເປັນສື່ກາງ ນໍາໄປສະເໜີພາກສ່ວນກ່ຽວຂ້ອງ ເພື່ອແກ້ໄຂ.
ກ່ອນໜ້ານີ້, ວັນອາທິດທີ 18 ສິງຫາ 2019 ທ່ານ ພົທ. ແສງນວນ ໄຊຍະລາດ ຮອງປະທານສະພາແຫ່ງຊາດ ໄດ້ສົມທົບກັບທ່ານ ບຸນທຽນ ທອງແກ້ວ ຮອງປະທານສະພາປະຊາຊົນ ແຂວງຈໍາປາສັກ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາຢູ່ເມືອງໂຂງ, ດ່ານສາກົນໜອງນົກຂຽນ ແຂວງຈໍາປາສັກ-ກໍາປູເຈຍ ແລະ ພື້ນຖານການຜະລິດຈໍານວນໜຶ່ງ.
ທ່ານ ສະນັ່ນ ສີທາພົມມະຈັນ ກໍາມະການພັກແຂວງ ເລຂາພັກເມືອງ ເຈົ້າເມືອງໆໂຂງ ໄດ້ລາຍງານໃຫ້ຊາບວ່າ: ໂດຍລວມແລ້ວ ແມ່ນໄດ້ເອົາໃຈໃສ່ວຽກງານຄຸ້ມຄອງສາສະໜາ ໂດຍການ ໂຄສະນາເຜີຍແຜ່ແນວທາງນະໂຍບາຍຂອງພັກ, ການເຄື່ອນໄຫວສາສະໜາອື່ນແມ່ນມີຈໍານວນ 9 ຄອບຄົວ ແຕ່ໄດ້ມີການສຶກສາອົບຮົມທາງດ້ານການເມືອງ-ແນວຄິດ ບໍ່ໃຫ້ມີການຂະຫຍາຍຕື່ມ; ໄດ້ມີກົນໄກການປະສານງານທີ່ດີ ລະຫວ່າງກໍາລັງປ້ອງກັນຄວາມສະຫງົບ ອົງການໄອຍະການປະຊາຊົນ ສານປະຊາຊົນ ແລະ ພາກສ່ວນອື່ນໆທີ່ກ່ຽວຂ້ອງ ໃນການແກ້ໄຂບັນດາຄະດີທີ່ເກີດຂຶ້ນ, ບັນດາຄະດີສ່ວນໃຫຍ່ ແມ່ນກ່ຽວຂ້ອງກັບຢາເສບຕິດ; ແຂວງຈໍາປາສັກ ມີຊາຍແດນຮ່ວມກັບກໍາປູເຈຍ ຍາວ 153 ກິໂລແມັດ, ມີ 22 ບ້ານ, ມີ 63 ຫລັກໝາຍຊາຍແດນ, ເມືອງໂຂງ ຮັບຜິດຊອບແຕ່ຫລັກໝາຍທີ 052 ຫາ 065, ບັນຫາທາງດ້ານຊາຍແດນກັບກໍາປູເຈຍ ເຖິງວ່າຈະມີຄວາມເຄັ່ງຕຶງເລັກນ້ອຍ ແຕ່ປະຊາຊົນທັງສອງປະເທດ ຍັງໄປມາຫາສູ່ຄ້າຂາຍນໍາກັນເປັນປົກກະຕິ. ຈາກນັ້ນ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ ເມືອງໂຂງ, ບັນດາຂະແໜງການຂອງເມືອງ ແລະ ຫົວໜ້າຄຸ້ມຄອງດ່ານສາກົນໜອງນົກຂຽນ ກໍໄດ້ລາຍງານວຽກງານທີ່ກ່ຽວຂ້ອງ.
ທ່ານຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມວ່າ: ໃຫ້ຮັກສາມູນເຊື້ອສາມັກຄີເປັນປຶກແຜ່ນແໜ້ນໜາ, ບັນຫາສາສະໜາ ໃຫ້ສຶກສາອົບຮົມການເມືອງ-ແນວຄິດຢ່າງນິ້ມນວນ ດ້ວຍເຫດດ້ວຍຜົນ, ເພີ່ມທະວີການປະສານງານລະຫວ່າງຂະແໜງການຕ່າງໆຂອງເມືອງ ຮວມທັງການປະສານງານກັບຂັ້ນເທິງ; ບັນຫາຊາຍແດນ ໃຫ້ກໍາແໜ້ນໃຫ້ເປັນຊາຍແດນມິດຕະພາບ ສັນຕິພາບ, ໃຫ້ມີຄວາມອົດທົນອົດກັ້ນ ບໍ່ໃຫ້ມີການປະທະກັນເກີດຂຶ້ນ, ໃຫ້ປະຕິບັດຢ່າງເຂັ້ມງວດ ຕາມຂໍ້ຕົກລົງລະຫວ່າງສອງລັດຖະບານ, ເຈົ້າໜ້າທີ່ຂອງບັນດາຂະແໜງການໃນດ່ານ ໃຫ້ມີຄວາມສາມັກຄີກັນ ຢ່າງແໜ້ນແຟ້ນ; ສ້າງຂະບວນການຢ່າງຟົດຟື້ນເພື່ອຂໍ່ານັບຮັບຕ້ອນກອງປະຊຸມໃຫຍ່ພັກ 3 ຂັ້ນ ແລະ ກອງປະຊຸມໃຫຍ່ ຄັ້ງທີ XI ຂອງພັກ.
(ບຸນເກີດ ວົງໄຊຍາ)