ສພຊ) ລະຫວ່າງວັນທີ 14-15 ກຸມພາ 2024, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ພ້ອມດ້ວຍສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 13 ແລະ ສະມາຊິກສະພາປະຊາຊົນແຂວງ (ສສຂ) ປະຈຳເຂດເລືອກຕັ້ງເມືອງເຊໂປນ ໄດ້ເຄື່ອນໄຫວໄປພົບປະຜູ້ມີສິດເລືອກຕັ້ງ ເພື່ອເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນແຂວງສະຫວັນນະເຂດ ຊຸດທີ II ຢູ່ 3 ຈຸດ ຄື: ເຂດຈຸດສຸມຈຽງຕູບ, ເຂດຈຸດສຸມບ້ານດົງສະຫວັນ ແລະ ຫ້ອງວ່າການປົກຄອງເມືອງເຊໂປນ ໂດຍມີການນຳຂອງເມືອງ, ຈຸດສຸມ, ຂະແໜງການ, ຄະນະກຸ່ມ, ອຳນາດການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າເຂົ້າຮ່ວມຢ່າງຫຼວງຫຼາຍ.
ໃນການເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ IX ທ່ານຮອງປະທານສະພາແຫ່ງຊາດ ສູນທອນ ໄຊຍະຈັກ ໄດ້ແຈ້ງໃຫ້ຜູ້ມີສິດເລືອກຕັ້ງຊາບບັນດາເອກະສານສຳຄັນທີ່ກອງປະຊຸມສະໄໝສາມັນ ເທື່ອທີ 6 ໄດ້ພິຈາລະນາ ແລະ ຮັບຮອງເອົາ ເປັນຕົ້ນແມ່ນບົດລາຍງານໂດຍສັງເຂບຂອງລັດຖະບານກ່ຽວກັບສະພາບການເຄື່ອນໄຫວປະຕິບັດແຜນພັດທະນາເສດຖະກິດ-ສັງຄົມທີ່ພົ້ນເດັ່ນໄລຍະກາງສະໄໝ 5 ປີ (2021-2023) ແລະ ທິດທາງແຜນການທ້າຍສະໄໝຮອດປີ 2025, ການເຄື່ອນໄຫວປະຈຳປີ 2023 ແລະ ທິດທາງແຜນການປະຈໍາປີ 2024; ບົດລາຍງານການ ຈັດຕັ້ງປະຕິບັດແຜນການເຄື່ອນໄຫວວຽກງານກາງສະໄໝ 5 ປີ (2021-2023) ແລະ ທິດທາງແຜນການຮອດປີ 2025, ການຈັດຕັ້ງປະຕິບັດແຜນການປະຈຳປີ 2003 ແລະ ທິດທາງແຜນການປີ 2024 ຂອງອົງການກວດກາແຫ່ງລັດ, ອົງການກວດສອບແຫ່ງລັດ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ ແລະ ຂອງສະພາແຫ່ງຊາດ. ພ້ອມນັ້ນ, ກໍໄດ້ແຈ້ງໃຫ້ຊາບກ່ຽວກັບການສ້າງ ແລະ ປັບປຸງກົດໝາຍ ທັງ 7 ສະບັບ ແລະ ການປະເມີນຄວາມໄວ້ວາງໃຈໃນການປະຕິ ບັດໜ້າທີ່ຂອງບຸກຄະລາກອນທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການເລືອກຕັ້ງ ຈຳນວນ 67 ທ່ານ.
ໃນການພົບປະກັບການນຳ ແລະ ພະແນກການອ້ອມຂ້າງເມືອງເຊໂປນ, ທ່ານຮອງປະທານສະພາແຫ່ງຊາດໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຄວາມພະຍາຍາມຂອງເມືອງ, ຂອງບັນດາຈຸດສຸມ ອັນໄດ້ເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການປັບປຸງໃຫ້ດີຂຶ້ນເລື້ອຍໆ.
ໃນການພົບປະນັ້ນ, ບັນດາຜູ້ມີສິດເລືອກຕັ້ງໄດ້ມີຄຳສະເໜີຫຼາຍຢ່າງ ເຊັ່ນ: ຕ້ອງການເຄື່ອງກອງນ້ຳສະອາດໃຫ້ປະຊາ ຊົນໄດ້ຊົມໃຊ້, ຕິດຕັ້ງເສົາສັນຍານໂທລະສັບ, ຕົວເລກລັດຖະກອນຄູ, ການບຸກເບີກເນື້ອທີ່ທຳການຜະລິດ, ການຊົດເຊີຍເນື້ອທີ່ດິນຈາກການກໍ່ສ້າງຂົວເຂົ້າບ້ານ, ໂຮງຮຽນ, ສຸກສາລາ, ການແກ້ໄຂບັນຫາຢາເສບຕິດ, ບັນຫາຄວາມຫຍຸ້ງຍາກດ້ານຊີ ວິດການເປັນຢູ່ຂອງພະນັກງານລັດຖະກອນ ເຊິ່ງໂດຍສ່ວນໃຫຍ່ການນຳຂອງແຂວງ ແລະ ເມືອງ, ພະແນກການໄດ້ມີການຊີ້ແຈງຕໍ່ຜູ້ມີສິດເລືອກຕັ້ງ.
ທ່ານຮອງປະທານສະພາແຫ່ງຊາດ ຍັງໄດ້ມີຄຳເຫັນເນັ້ນໜັກໃຫ້ປະຊາຊົນສືບຕໍ່ນຳໃຊ້ທ່າແຮງທຳການຜະລິດກະສິກຳ ເປັນຕົ້ນແມ່ນການປູກມັນຕົ້ນ, ປູກກ້ວຍ ທີ່ສາມາດສ້າງລາຍຮັບໃຫ້ແກ່ຄອບຄົວ ເພາະດຽວນີ້ມີຕະຫຼາດຮອງຮັບທີ່ແນ່ນອນ ເພື່ອປັບປຸງຊີວິດການເປັນຢູ່ໃຫ້ນັບມື້ນັບດີຂຶ້ນ.
ໃນໂອກາດລົງເຄື່ອນໄຫວໃນຄັ້ງນີ້, ທ່ານ ປອ. ນາງ ສູນທອນ ໄຊຍະຈັກ ພ້ອມດ້ວຍຄະນະ ຍັງໄດ້ນຳເອົາເຄື່ອງຊ່ວຍ ເຫຼືອຈຳນວນໜຶ່ງ ປະກອບມີເຄື່ອງນຸ່ງຫົ່ມ, ເຄື່ອງອຸປະໂພກ-ບໍລິໂພກ, ອຸປະກອນການຮຽນ, ອຸປະກອນກິລາ ໄປມອບໃຫ້ປະຊາຊົນເຂດຈຸດສຸມຈຽງຕູບ ແລະ ເຂດຈຸດສຸມບ້ານດົງສະຫວັນ ເຊິ່ງມີມູນຄ່າເປັນຈຳນວນເງິນ 10 ກວ່າລ້ານກີບ.
(ຂ່າວ-ພາບ: ກົງທະນູຄຳ ພິພັດເສລີ)