ວັນທີ 24 ສິງຫາ 2023 ທີ່ວັດບ້ານໂພນສະຫວັນ ເມືອງຍົມມະລາດ ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ ເຂດເລືອກຕັ້ງທີ 12 ແຂວງຄໍາມ່ວນ ພ້ອມຄະນະ ໄດ້ລົງຊຸກຍູ້, ຕິດຕາມ ການກໍ່ສ້າງລະບົບນໍ້າປະປາຊຸມຊົນ ທີ່ໄດ້ຮັບການຊ່ວຍເຫຼືອທຶນຈາກການຮ່ວມມືໃນການພັດທະນາເຂດໂຣນ-ອານເປີປະເທດ ຝຣັ່ງ. ໃນໂຄງການເຂົ້າເຖິງນໍ້າສະອາດ ຂອງບ້ານໂພນສະຫວັນ ແລະ ສອງຄຸ້ມບ້ານຄື: ບ້ານສີວິໄລ ແລະ ຄຸ້ມບ້ານໜອງກະຈິງ. ເຊິ່ງທ່ານ ນໍ້າໃຈ ອຸດສາ ຮອງເຈົ້າເມືອງຍົມມະລາດ ໄດ້ລາຍງານໂດຍຫຍໍ້ຂອງໂຄງການດັ່ງກ່າວ ໃຫ້ຮູ້ວ່າ: ການກໍ່ສ້າງອ່າງເກັບນໍ້າ ມີຄວາມສູງ 10 ແມັດ, ສາມາດເກັບນໍ້າໄດ້ 35.000 ລິດ. ເມື່ອກໍ່ສ້າງສຳເລັດສາມາດແຈກຢາຍນໍ້າສະອາດໃຫ້ປະຊາຊົນຊົມໃຊ້ແຕ່ລະຄຸ້ມບ້ານເຊັ່ນ: ບ້ານໂພນສະຫວັນ ຈໍານວນ 85 ກົງເຕີ, ບ້ານໜອງອັ້ນ ສີວິໄລ 85 ກົງເຕີ ແລະ ບ້ານໜອງກະຈິງ 50 ກົງເຕີ ເຊິ່ງມີປະຊາຊົນ 1.000 ກວ່າຄົນ ຂອງເຂດດັ່ງກ່າວ, ລວມມີມູນຄ່າການກໍ່ສ້າງທັງໝົດ 150.000 ໂດລາສະຫະລັດ ເຊິ່ງໄດ້ຮັບການສະໜັບສະໜູນ ແລະ ຈັດຕັ້ງປະຕິບັດ ໂດຍສະມາຄົມພະລັງງານການຮ່ວມມືການພັດທະນາເຂດໂຣນ-ອານເປີ ປະເທດຝຣັ່ງ.
