(ສພຊ) – ຕອນບ່າຍວັນທີ 19 ຕຸລານີ້ ທີ່ຫໍປະຊຸມແຫ່ງຊາດ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ກ່າວປາໄສຕໍ່ກອງປະຊຸມຄົບຄະນະວາລະທີ 1 ຂອງກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ​​ ທັງເປັນປະທານ​​ AIPA ຄັ້ງທີ 45; ເຂົ້າຮ່ວມມີບັນດາທ່ານປະທານລັດຖະສະພາ, ຫົວໜ້າຄະນະຜູ້ແທນລັດຖະສະພາສະມາຊິກໄອປາ ແລະ ບັນດາທ່ານຫົວໜ້າຄະນະຜູ້ແທນລັດຖະສະພາສັງເກດການຂອງໄອປາ, ບັນດາທ່ານສະມາຊິກລັດຖະສະພາ, ທ່ານເລຂາທິການໃຫຍ່ໄອປາ, ທ່ານເລຂາທິການໃຫຍ່ອາຊຽນ ແລະ ບັນດາແຂກຖືກເຊີນ.

ທ່ານຮອງປະທານສະພາແຫ່ງຊາດ ແຫ່ງ ສປປລາວ ໄດ້ສະແດງຄວາມປິຕິຍິນດີເປັນຢ່າງຍິ່ງທີ່ໄດ້ຕ້ອນຮັບ ແລະ ຂອບໃຈບັນດາລັດຖະສະພາສະມາຊິກໄອປາ, ລັດຖະສະພາສັງເກດການໄອປາ, ບັນດາແຂກ ແລະ ຄູ່ຮ່ວມພັດທະນາຂອງໄອປາ ທີ່ໄດ້ໃຫ້ການຮ່ວມມື ແລະ ສະໜັບສະໜູນສະພາແຫ່ງຊາດ ແຫ່ງ ສປປລາວ ໃນການເປັນເຈົ້າພາບຈັດກອງປະຊຸມຄັ້ງນີ້. ເພື່ອສືບຕໍ່ເຮັດໃຫ້ອາຊຽນກາຍເປັນປະຊາຄົມແຫ່ງການເຊື່ອມໂຍງ-ເຊື່ອມຈອດຢ່າງຮອບດ້ານໃນຕໍ່ໜ້າ, ກອງປະຊຸມສະມັດຊາໃຫຍ່ໄອປາຄັ້ງທີ 45 ຈຶ່ງໄດ້ຈັດຂຶ້ນພາຍໃຕ້ຫົວຂໍ້: “ບົດບາດຂອງລັດຖະສະພາໃນການຊຸກຍູ້ການເຊື່ອມຈອດ ແລະ ການຈະເລີນເຕີບໂຕແບບກວມລວມຂອງອາຊຽນ” ເຫັນວ່າຄໍາຂວັນດັ່ງກ່າວ ແມ່ນສອດຄ່ອງກັບທ່າອຽງຂອງພາກພື້ນ ກໍຄືການຮັດແໜ້ນການເຊື່ອມໂຍງ ແລະ ເຊື່ອມຈອດທາງດ້ານເສດຖະກິດພາຍໃນພາກພື້ນໃຫ້ຫຼາຍຂຶ້ນ ເປັນຕົ້ນແມ່ນການຂົນສົ່ງ, ໂທລະຄົມມະນາຄົມ, ການຫັນເປັນດິຈິຕອນ, ພະລັງງານ, ສົ່ງເສີມການໄປມາຫາສູ່ຂອງປະຊາຊົນ, ອໍານວຍຄວາມສະດວກດ້ານການຄ້າ, ການລົງທຶນ, ການທ່ອງທ່ຽວ, ການຜະລິດ, ການບໍລິການ ແລະ ການສະໜອງແບບຕ່ອງໂສ້ການຜະລິດໃຫ້ມີຄວາມໂລ່ງລ່ຽນ, ສ້າງພື້ນຖານໂຄງລ່າງດ້ານເສດຖະກິດໃຫ້ມີຄວາມເຂັ້ມແຂງ, ກວມລວມ, ຍືນຍົງ, ຮັດແຄບຄວາມແຕກໂຕນທາງການພັດທະນາໃນປະເທດອາຊຽນ ແລະ ສາມາດສະກັດກັ້ນ, ແກ້ໄຂວິກິດການ ແລະ ສິ່ງທ້າທາຍຕ່າງໆທີ່ອາດຈະເກີດຂຶ້ນໃນອະນາຄົດ; ພ້ອມດຽວກັນນີ້, ຄຳຂວັນດັ່ງກ່າວຍັງສອດຄ່ອງກັບນະໂຍບາຍແຫ່ງຊາດ ກໍຄືຄວາມພະຍາຍາມຂອງ ສປປລາວ ທີ່ຈະຫັນປະເທດທີ່ບໍ່ມີຊາຍເເດນຕິດກັບທະເລ ໃຫ້ມີການເຊື່ອມໂຍງ ແລະ ເຊື່ອມຈອດກັບບັນດາປະເທດສະມາຊິກອາຊຽນຫຼາຍຂຶ້ນ ແລະ ກ້າວໄປສູ່ການເຊື່ອມໂຍງ-ເຊື່ອມຈອດກັບນອກພາກພື້ນ.

ທ່ານ ປອ. ນາງ ສູນທອນ ໄຊຍະຈັກ ກ່າວວ່າ: ໃນຂະບວນການສ້າງປະຊາຄົມອາຊຽນໃຫ້ມີຄວາມເຂັ້ມແຂງນັ້ນ, ໄອປາ ມີຄວາມຈໍາເປັນທີ່ຈະຕ້ອງໄດ້ເພີ່ມທະວີການຮ່ວມມືກັນ ໂດຍຜ່ານການເຊື່ອມໂຍງ-ເຊື່ອມຈອດ ແລະ ການເຕີບໂຕແບບກວມລວມ, ນໍາໃຊ້ດິຈິຕອນແບບກວມລວມເຂົ້າໃນການສ້າງຄວາມເຂັ້ມແຂງໃຫ້ແກ່ປະຊາຊາດໃນພາກພື້ນ, ສົ່ງ ເສີມການມີສ່ວນຮ່ວມຂອງປະຊາຊົນໃນການຮັກສາສັນຕິພາບ, ສະຖຽນລະພາບ ແລະ ການພັດທະນາ, ສົ່ງເສີມການລະ ດົມທຶນເພື່ອພັດທະນາການເຊື່ອມຈອດດ້ານພື້ນຖານໂຄງລ່າງ, ສົ່ງເສີມການເຊື່ອມໂຍງດ້ານເຕັກໂນໂລຊີດິຈິຕອນ ແລະ ດ້ານອື່ນໆ, ປະກອບສ່ວນສ້າງປະຊາຄົມອາຊຽນທີ່ປອດໄພ, ເຂັ້ມແຂງ ແລະ ກວມລວມ ແນໃສ່ຮັບປະກັນການປົກປັກຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ຄວາມຈະເລີນຮຸ່ງເຮືອງ ພ້ອມທັງຮັບປະກັນໃຫ້ສາມາດບັນລຸໄດ້ຕາມແຜນແມ່ບົດປະຊາຄົມອາຊຽນ 2025 ແລະ ຕໍ່ໜ້າ. ພ້ອມດຽວກັນນັ້ນ, ລັດຖະສະພາສະມາຊິກໄອປາ ຕ້ອງໃຫ້ຄວາມສຳຄັນຕໍ່ການຄຸ້ມຄອງລັດ-ຄຸ້ມຄອງສັງຄົມດ້ວຍລະບຽບກົດໝາຍ, ສືບຕໍ່ປັບປຸງຂອບກົດໝາຍ ແລະ ນະໂຍບາຍ ໃຫ້ມີຄວາມສອດຄ່ອງພາຍໃນປະເທດສະມາຊິກອາຊຽນ, ຊຸກຍູ້ການໃຫ້ສັດຕະຍາບັນແກ່ສັນຍາ ແລະ ສົນທິສັນຍາ ໃນຂອບການຮ່ວມມືດ້ານຕ່າງໆຂອງອາຊຽນ, ຕິດຕາມກວດກາການຈັດຕັ້ງປະຕິບັດນິຕິກຳທີ່ກ່ຽວຂ້ອງໃນຂົງເຂດວຽກງານຕ່າງໆຂອງອາຊຽນ ລວມທັງກົດບັດອາຊຽນ ໃຫ້ມີປະສິດທິພາບ ແລະ ມີປະສິດທິຜົນ ເພື່ອນໍາເອົາຜົນປະໂຫຍດສູງສຸດ ມາສູ່ປະຊາຊົນຢ່າງທົ່ວເຖິງ; ຕ້ອງສືບຕໍ່ຊຸກຍູ້ ແລະ ຮັດແໜ້ນການຮ່ວມມືກັບຄູ່ຮ່ວມມືພາຍນອກຂອງອາຊຽນ ເພື່ອປະກອບສ່ວນເຂົ້າໃນຂະບວນການສ້າງປະຊາຄົມອາຊຽນ ກໍຄືການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ ກໍຄືໃນໂລກ.

ທ່ານຮອງປະທານສະພາແຫ່ງຊາດ ແຫ່ງ ສປປລາວ ມີຄວາມເຊື່ອໝັ້ນວ່າ ລັດຖະສະພາສະມາຊິກໄອປາ ຈະສືບ ຕໍ່ເພີ່ມທະວີຍົກສູງກົນໄກການຮ່ວມມືເຊິ່ງກັນແລະກັນໃນການສ້າງຄວາມກົມກຽວທາງດ້ານກົດໝາຍ ເພື່ອອຳນວຍຄວາມສະດວກໃຫ້ແກ່ການ​ເຊື່ອມ​ໂຍງ-ເຊື່ອມຈອດຂອງອາຊຽນ ໃຫ້ກາຍເປັນຮູບປະທຳຫຼາຍຂຶ້ນ; ຊຸກຍູ້ລັດຖະບານໃຫ້ຍົກສູງວິທີການ ແລະ ກົນໄກການພົວພັນຮ່ວມມືທີ່ເໝາະ​ສົມກັບພາຍນອກ ເພື່ອສົ່ງເສີມການລົງທຶນດ້ານການກໍ່ສ້າງພື້ນຖານໂຄງລ່າງອາຊຽນ ທີ່ອຳນວຍຄວາມສະດວກໃຫ້ແກ່ການຂົນສົ່ງ, ການຄ້າ, ການລົງທຶນ, ອຸດສາຫະກຳການທ່ອງທ່ຽວ ແລະ ອື່ນໆ ເພື່ອບັນລຸໄດ້ຕາມວິໄສທັດປະຊາຄົມອາຊຽນ 2025 ແລະ ເປົ້າໝາຍການພັດທະນາແບບຍືນຍົງ 2030 ຕາມທີ່ອົງ ການສະຫະປະຊາຊາດໄດ້ກຳນົດໄວ້.

(ນາງ ສຸມົນທາ ງາໄຊ)