(ສພຊ) ວັນທີ 31 ມັງກອນ 2024 ທີ່ຫ້ອງຮັບແຂກສະພາແຫ່ງຊາດ, ສະຫາຍ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງສະຫາຍ ຫວາງ ຊ້າງ ອຸປະທູດ ຂອງເອກອັກຄະລັດຖະທູດ ແຫ່ງ ສປຈີນ ປະຈຳ ສປປລາວ ເພື່ອມອບສານອວຍພອນຂອງສະຫາຍ ຈ້າວ ເລີຈີ້, ປະທານສະພາຜູ້ແທນປະຊາຊົນທົ່ວປະເທດຈີນ ໃຫ້ສະຫາຍ ໄຊສົມພອນ ພົມວິຫານ, ປະທານສະພາແຫ່ງຊາດ ແຫ່ງ ສປປລາວ ເນື່ອງໃນໂອ ກາດປີໃໝ່ສາກົນ 2024.

ໂອກາດດັ່ງກ່າວ, ສະຫາຍຮອງປະທານສະພາແຫ່ງຊາດລາວ ກໍໄດ້ກ່າວສະເເດງຄວາມຕ້ອນຮັບຢ່າງອົບອຸ່ນ ພ້ອມຕີລາຄາສູງຕໍ່ການພົວພັນຮ່ວມມືລະຫວ່າງ 2 ພັກ, 2 ລັດ ແລະ ປະຊາຊົນ 2 ຊາດ ລາວ-ຈີນ ກໍຄືລະຫວ່າງສອງອົງ ການນິຕິບັນຍັດໃນໄລຍະຜ່ານມາ, ໂດຍສະເພາະແມ່ນການປະຕິບັດແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ ໄລ ຍະປີ 2019-2023 ແລະ ໄລຍະປີ 2024-2028 ເຊິ່ງຈະເປັນໂອກາດດີສຳຫຼັບສອງຝ່າຍໃນການເສີມຂະຫຍາຍສາຍພົວພັນໃນຂົງເຂດຕ່າງໆໃຫ້ນັບມື້ນັບມີປະສິດທິຜົນ. ສະຫາຍຮອງປະທານສະພາແຫ່ງຊາດລາວ ຕາງໜ້າໃຫ້ປະທານສະ ພາແຫ່ງຊາດ ກ່າວຝາກຄຳອວຍພອນອັນປະເສີດໄປຍັງສະຫາຍປະທານສະພາຜູ້ແທນປະຊາຊົນທົ່ວປະເທດຈີນ ເນື່ອງໃນໂອກາດວັນປີໃໝ່ ຈົ່ງມີສຸຂະພາບເຂັ້ມແຂງ, ມີຜົນສຳເລັດໃນການນຳພາອົງການນິຕິບັນຍັດກ້າວຂຶ້ນຢ່າງເຂັ້ມແຂງ ທັງໄດ້ອວຍພອນໃຫ້ສະຫາຍ ຫວາງ ຊ້າງ ພ້ອມດ້ວຍພະນັກງານການນຳ ກໍຄືພະນັກງານທັງໝົດຂອງສະຖານທູດຈີນ ຈົ່ງມີສຸກຂະພາບເຂັ້ມແຂງ, ມີຜົນສຳເລັດຕະຫຼອດປີໃໝ່ ປີມັງກອນ 2024 ນີ້.

ຈາກນັ້ນ, ສະຫາຍ ຫວາງ ຊ້າງ ກໍໄດ້ກ່າວສະແດງຄວາມຂອບໃຈເປັນຢ່າງຍິ່ງຕໍ່ການຕ້ອນຮັບຢ່າງອົບອຸ່ນ ພ້ອມໄດ້ມອບສານອວຍພອນຂອງສະຫາຍ ຈ້າວ ເລີຈີ້, ປະທານສະພາຜູ້ແທນປະຊາຊົນທົ່ວປະເທດຈີນ ໃຫ້ສະຫາຍ ໄຊສົມພອນ ພົມວິຫານ, ປະທານສະພາແຫ່ງຊາດ ແຫ່ງ ສປປລາວ.

(ຂ່າວ-ພາບ: ກົງທະນູຄຳ ພິພັດເສລີ)